Закар 7 - Коми Библия 2023

Кывзысьтӧм вӧсна войтырӧс мыждӧм

¹ Дарий ӧксылӧн нёльӧд веськӧдлан воӧ, ӧкмысӧд кислев тӧлысьлӧн нёльӧд лунӧ Закарлы вӧлі Господьсянь кыв.

² Сэки Вефильын олысьяс мӧдӧдісны Сарецерӧс да Регем-Мелекӧс сылӧн йӧзкӧд кевмысьны Господьлы

³ да юавны пророкъяслысь да Господь Саваоф крамын кесъялысь попъяслысь, колӧ-ӧ миянлы витӧд тӧлысьнас видзалӧмӧн пасйыны бӧрдан лун, кыдзи уна во чӧж нин ми вӧчам.

⁴ Сэки меным вӧлі Господь Саваофсянь кыв:

⁵ – Висьтав тайӧ муас олысьяслы да попъяслы: кор ті шогалінныд да видзалінныд сизимдас во чӧж витӧд да сизимӧд тӧлысьясӧ, Меным-ӧ тайӧс ті вӧчинныд?

⁶ А кор ті сёянныд-юанныд, онӧ ӧмӧй аслыныд тайӧс вӧчӧй?

⁷ Та йылысь Господь важӧн нин висьтавліс пророкъяс пыр, кор Ерусалим вӧлі уна йӧза да лӧнь карӧн, и кор сыгӧгӧрса каръясын, Негев муын да керӧсбердса муын олісны йӧз.

⁸ Закарлы вӧлі Господьсянь кыв:

⁹ – Господь Саваоф тадзи висьталӧ: веськыда мыждӧй, лоӧй бур сьӧлӧмаӧсь да меліӧсь ӧта-мӧдныд дінӧ.

¹⁰ Дӧваясӧс да батьтӧм-мамтӧмъясӧс, йӧз муысь локтысьясӧс да гӧльясӧс энӧ дзескӧдӧй, ӧта-мӧдныдлы лёксӧ вӧчны энӧ мӧвпалӧй.

¹¹ Но тіян батьясныд эз кӧсйыны кывзыны, пельнысӧ тупкісны да бергӧдісны Меланьӧ мышнысӧ.

¹² Сьӧлӧмнысӧ чорзьӧдісны, эз кутны кывны Индӧдсӧ да сійӧ, мый Господь Саваофлӧн Лолыс висьтавліс воддза пророкъяс пыр. Таысь найӧс суис Господь Саваофлӧн ыджыд скӧрлуныс.

¹³ Ме шыасьлі на дінӧ, но найӧ эз кывзыны Менӧ. Тадзи жӧ Ме найӧс эг кывзы, кор найӧ шыасьлісны Ме дінӧ, – висьталӧ Господь Саваоф. –

¹⁴ Ме разӧді найӧс войтыръяс пӧвстӧ, кодъясӧс найӧ эз тӧдлыны водзын. Налӧн эновтӧм муыс кушмис, сэтчӧ некод эз кут волыны. Тадзи на вӧсна бур муныс пӧри овтӧминӧ.