Закар 6 - Коми Библия 2023

Кӧкъямысӧд петкӧдчылӧм: нёль тарантас

¹ Ме бара лэпті синмӧс да аддзи: кык ыргӧн керӧс костысь петісны нёль тарантас.

² Медводдза тарантассӧ кыскисны гӧрд вӧвъяс, мӧдсӧ – сьӧд вӧвъяс,

³ коймӧдсӧ – еджыд вӧвъяс, а нёльӧдсӧ – пегана вӧвъяс. Ставныс найӧ вӧліны ёнӧсь.

⁴ Ме юалі мекӧд сёрнитысь анделлысь: «Мый тайӧ, ыджыдӧй?»

⁵ Андел вочавидзис: «Тайӧ – енэжыслӧн нёль тӧв. Найӧ петӧны Господьсянь, коді ыджыдалӧ став му вылас».

⁶ Сьӧд вӧвъяс мунасны войвыв муӧ, еджыдъяс – на бӧрся, пегана вӧвъяс – лунвыв муӧ.

⁷ Тайӧ ён вӧвъясыс педзисны, медым ӧдйӧджык котӧртны да кытшовтны муяссӧ. Господь шуис налы: «Мунӧй, кытшовтӧй». Вӧвъяс мӧдӧдчисны.

⁸ Господь корис менӧ да шуис: «Видзӧд, войвыв муӧ мунысь вӧвъяс лӧньӧдісны войвыв му дінӧ Менсьым скӧрлунӧс».

Господь тшӧктӧ пророкӧс вӧчны Исус аркирейлы юркытш

⁹ Меным вӧлі Господьсянь кыв:

¹⁰ «Мун Софонийлӧн Иосий пи ордӧ. Сэтысь аддзан Вавилон пленысь локтӧмаясӧс – Хелдайӧс, Товиӧс да Едайӧс.

¹¹ Босьт налысь эзысь-зарнисӧ да вӧч юркытш, сэсся пукты сійӧс юр вылас Исус аркирейлы, Иоседеклӧн пилы.

¹² Шу сылы, мый Господь Саваоф тадзи висьталӧ: Выль Вож нима морт петас тайӧ муысь да лэптас Господьлысь крамсӧ.

¹³ Сійӧ кыпӧдас Господьлысь крамсӧ, Сійӧс нимӧдасны ӧксыӧс моз, Сійӧ юравны-ыджыдавны пондас. Сійӧ пуксяс юралан пуклӧсӧ, Сыкӧд ыджыдавны пуксяс поп, и найӧ пондасны овны ӧти сьӧлӧмӧн.

¹⁴ Юркытшыс кольӧ Господьлӧн крамын, мед казьтывны Хелдайлысь, Товилысь, Едайлысь да Софонийлӧн Иосий пилысь бур вӧчӧмнысӧ».

¹⁵ Йӧзыс ылісянь локтасны, мед отсавны лэптыны Господьлысь крамсӧ. Сэки ті тӧдмаланныд, мый Господь Саваоф мӧдӧдіс менӧ тіян дінӧ. Тайӧ ставыс инас, ті кӧ понданныд сьӧлӧмсяньныд кывзысьны Господьлысь, асланыд Енлысь.