Закар 4 - Коми Библия 2023

Витӧд петкӧдчылӧм: зарни бикок да кык олив пу

¹ Андел, коді водзынсӧ сёрнитіс мекӧд, бӧр локтіс да узян унмысь моз садьмӧдіс менӧ.

² Сійӧ юаліс менсьым: «Мый тэ аддзан?» Ме вочавидзи: «Аддза зарни бикок. Бикок вылас вый доз. Доз дорыш гӧгӧрыс – сизим би петанін, быд би петанінын ӧзъялӧ сизим петель.

³ Бикокыскӧд орччӧн сулалӧны кык олив пу: ӧтиыс – веськыдладорас, мӧдыс – шуйгаладорас».

⁴ Ме юалі мекӧд сёрнитысь анделлысь: «Мый тайӧ татшӧмыс, ыджыдӧй?»

⁵ «Тэ он тӧд, мый тайӧ?» – воча юаліс андел. «Ог, ыджыдӧй», – шуи ме.

⁶ Андел шуис меным: – Тайӧ Господьлӧн кывйыс Зоровавельлы: он тышкайӧзӧн, он аслад вынӧн тэ вермы, а Менам Лолӧн, – висьталӧ Господь Саваоф. –

⁷ Коді тэ, джуджыд керӧсӧй? Шыльӧдӧм муӧн тэ лоан Зоровавель водзын. Йӧзлӧн гораа ошкигтырйи сійӧ пуктас крамлы пельӧс изсӧ.

⁸ Меным вӧлі Господьсянь кыв:

⁹ – Зоровавель пуктіс подувсӧ крамлы, сійӧ помӧдзыс и лэптас сійӧс. Сэки ті тӧдмаланныд, мый Господь Саваоф мӧдӧдіс менӧ тіян дінӧ.

¹⁰ Весиг найӧ, кодъяс нинӧмӧ пуктісны крам панӧмсӧ, кутасны нимкодясьны, кор Зоровавельлӧн киысь аддзасны изъя кӧв. «Сизим биыс – тайӧ Господьлӧн синъясыс, кодъяс видзӧдӧны став муюгыд бӧрсяыс».

¹¹ Ме юалі анделлысь: «А мый лоӧ тайӧ кык олив пуыс, кодъяс сулалӧны бикок веськыдладорын да шуйгаладорын?»

¹² Нӧшта юалі: «Мый лоӧ олив пулӧн кык вожйыс, кытысь тюргӧ зарни вый кык зарни воргаӧд?»

¹³ «Тэ он тӧд, мый тайӧ?» – юаліс андел. «Ог, ыджыдӧй», – шуи ме.

¹⁴ Андел висьталіс: «Тайӧ индӧ кык мавтыштӧм морт вылӧ. Найӧ кесъялӧны Господьлы, коді ыджыдалӧ став му вылас».