Закар 2 - Коми Библия 2023

Коймӧд петкӧдчылӧм: Ерусалимӧс мурталӧм

¹ Ме бара лэпті синмӧс да аддзи мортӧс, коді киас кутіс мурталан кӧв.

² Ме юалі сылысь: «Кытчӧ тэ мунан?» Сійӧ вочавидзис: «Муртавны Ерусалимлысь пасьта-кузьтасӧ».

³ Буретш сэки мыччысис андел, коді водзынсӧ сёрнитіс мекӧд. Мӧд андел локтіс сылы воча

⁴ да шуис: «Мун ӧдйӧджык да висьтав мурталысь том мортлы: Ерусалим гӧгӧр оз нин кутны лэптыны стен, ӧд сы мында сэні олысьыс да ыж-мӧскыс лоӧ.

⁵ Ме лоа сы гӧгӧр биа стенмӧн, – висьталӧ Господь. – Лоа сы пытшкын дзирдлунӧн».

⁶ – Тэрмасьӧй, тэрмасьӧй! Пышйӧй войвыв муысь, – висьталӧ Господь. – Ӧд тӧвруӧс моз Ме разӧді тіянӧс нёльнан му пельӧсӧ, – висьталӧ Господь. –

⁷ Эновт вавилонса оланінъястӧ, Сион! Пет сэтысь!

⁸ Господь Саваоф Ассьыс дзирдлунсӧ петкӧдлӧм могысь мӧдӧдіс менӧ войтыръяс дінӧ, кодъяс куштісны тіянӧс. Сійӧ тадзи висьталӧ на йылысь: – Коді инмӧдчас Менам войтыр дінӧ, сійӧ инмӧдчас Менам донатор дінӧ.

⁹ Регыд Ме лэпта киӧс тіянӧс куштысь войтыръяс вылӧ, и налӧн жӧ кесйӧгъясыс куштасны найӧс. Сэки ті тӧдмаланныд, мый Господь Саваоф мӧдӧдіс менӧ.

¹⁰ Нимкодясь да гажӧдчы, Сион ныв! Ме локта да овмӧдча тэ ордӧ, – висьталӧ Господь.

¹¹ Сійӧ лунӧ уна мукӧд войтыр локтасны Господь дінӧ да лоӧны Сылӧн войтырӧн. Господь кутас овны тэ ордын, и тэ тӧдмалан, мый Господь Саваоф мӧдӧдіс менӧ тэ дінӧ.

¹² Вежа муын Господь вӧчас Иудаӧс Аслас войтырӧн, бара бӧръяс Аслыс Ерусалим кар.

¹³ Господь водзын мед ланьтас быд морт, ӧд Господь петӧ Аслас вежа оланінысь.