Закар 13 - Коми Библия 2023

¹ Сійӧ лунӧ Давид рӧдлы да Ерусалимын олысьяслы воссяс ва петанін, медым мыськавны найӧс мыжысь да пежысь.

Ылӧгпророкъясӧс лоӧ бырӧдӧма

² «Сійӧ лунӧ, – висьталӧ Господь Саваоф, – Ме бырӧда тайӧ мусьыс идолъясӧс, весиг налысь нимъяссӧ вунӧдасны. Нӧшта Ме бырӧда тайӧ мусьыс ылӧгпророкъясӧс да пеж лолӧс.

³ Пондас кӧ кодкӧ ылӧдлӧмӧн пророкавны, сэки сылӧн бать-мамыс шуасны сылы, тэ пӧ ылӧгсӧ висьталан Господь нимсянь, та вӧсна тэ он кут овны. Аслас бать-мамыс кувмӧныс бытшкасны сійӧс ылӧг пророкалӧмсьыс.

⁴ Сэки мукӧд ылӧгпророкъяслы яндзим лоӧ асланыс восьтӧмъясысь. Найӧ оз нин кутны пророкавны да пророк моз оз кутны пасьтасьны гӧнысь кыӧм паськӧмӧ, мед ылӧдлыны йӧзсӧ.

⁵ Быдӧн шуас, ме пӧ абу пророк, ме пӧ му вӧдитысь. Менӧ пӧ ичӧтдырйи на ньӧблӧмаӧсь кесйӧг туйӧ.

⁶ Сылысь кӧ юаласны, мыйсяма дойяс морӧс вылад, мӧдыс вочавидзас, менӧ пӧ дойдалісны ёртъясӧй ордын».

Видзысьтӧг кольӧм ыжъяс

⁷ – Ырыштчы, шыпуртӧй, Менам видзысь вылӧ, Аслам медматысса вылӧ, – висьталӧ Господь Саваоф. – Кувмӧн дойд видзысьсӧ, и ыжъясыс разаласны. Ичӧт баляяс вылӧ Ме лэпта Ассьым киӧс.

⁸ – Тайӧ муас олысьясысь, – висьталӧ Господь Саваоф, – кык юкӧныс кулас-бырас, сӧмын коймӧд юкӧныс ловйӧн коляс.

⁹ Тайӧ коймӧд юкӧнсӧ Ме нуӧда би пыр, сывда эзысьӧс моз, весала зарниӧс моз. Найӧ шыасясны Ме дінӧ, и Ме вочавидза налы. Шуа: «Ті – Менам войтыр», а найӧ воча шуасны: «Господь – миян Ен!»