Закар 12 - Коми Библия 2023

Ерусалимӧс мездӧм

¹ Водзвыв висьталӧм. Израиль йылысь Господьлӧн кыв. Господь, коді шевкнитіс енэжсӧ, пуктіс мулы подувсӧ да артмӧдіс морт пытшкын ловсӧ, висьталӧ:

² «Ме вӧча Ерусалимӧс сы гӧгӧр олысь войтыръяслы вина тыра дозйӧн. Найӧ пондасны юны сэтысь да кодавны. Иуда тшӧтш кутас юны-кодавны, кор Ерусалимӧс лоӧ кытшалӧма.

³ Сійӧ лунӧ, кор войтыръяс чукӧртчасны Ерусалимлы паныд, Ме вӧча Ерусалимӧс налы сьӧкыд изйӧн. Коді вӧрзьӧдас изсӧ, асьсӧ вирӧдз дойдалас.

⁴ Сійӧ лунӧ, – висьталӧ Господь, – Ме дурмӧда вӧрӧглысь вӧвъяссӧ, а вӧв вылын пукалысьяссӧ йӧймӧда. Иудаӧс ог лэдзлы син улысь, а паныд сувтысь войтыръяслысь вӧвъяссӧ синтӧммӧда.

⁵ Иуда войтырлӧн юралысьяс мӧвпыштасны: ”Ерусалимын олысьяскӧд Господь Саваоф, налӧн Енмыс. Та вӧсна найӧ вынаӧсь да вермӧны отсавны миянлы”.

⁶ Сійӧ лунӧ Ме вӧча иудаса юралысьясӧс вӧрын ыпъялысь биӧн да кольтаяс костын ӧзтӧм бипурӧн. Найӧ бырӧдасны став войтыръяссӧ Ерусалим гӧгӧрысь – шуйгаладорсьыс и веськыдладорсьыс. А Ерусалимын олысьяс кольччасны овны асланыс карӧ».

⁷ Господь медводз мездас Иудалысь оланінсӧ, медым Давидлӧн рӧдыс да Ерусалимын олысьяс эз нимавны Иуда войтырысь ёнджыка.

⁸ Сійӧ лунӧ Господь доръяс Ерусалимын олысьясӧс, и жебъяс лоӧны Давид кодь вынаӧсь. Ерусалимын олысьяслы Давидлӧн рӧдыс лоӧ Ен кодьӧн, Господьлӧн андел кодьӧн.

Бӧрдӧм Сы вӧсна, кодӧс бытшкисны

⁹ Сійӧ лунӧ Ме бырӧда войтыръясӧс, кодъяс петасны Ерусалимлы паныд.

¹⁰ Ме сета Давид рӧдлы да Ерусалимын олысьяслы буралана да кевмысяна лов. Найӧ видзӧдласны Сы вылӧ, кодӧс бытшкисны. Найӧ пондасны бӧрдны Сы вӧсна, кыдзи бӧрдӧны ӧтка пи вӧсна, пондасны шогсьыны, кыдзи шогсьӧны медводдза пи вӧсна.

¹¹ Сійӧ лунӧ Ерусалимын кутас кывны гораа ырзӧм-бӧрдӧм, сэтшӧм бӧрдӧм, кутшӧмӧс кывлісны Хадад-Риммонын Мегиддо ковтысын.

¹² Став муыс пондас сыркъялӧмӧн бӧрдны. Быд рӧд торйӧн и быд рӧдысь аньяс торйӧн кутасны бӧрдны. Кутасны бӧрдны Давидлӧн, Нафанлӧн,

¹³ Левийлӧн да Шимейлӧн рӧдъясыс,

¹⁴ тшӧтш мукӧд рӧдъяс пондасны бӧрдны.