Закар 1 - Коми Библия 2023

Бергӧдчӧй Господь дінӧ!

¹ Дарий ӧксылӧн мӧд веськӧдлан воӧ, кӧкъямысӧд тӧлысьӧ Закар пророклы, Иддо Береклӧн пилы, вӧлі Господьсянь кыв:

² «Господь чорыда скӧрмӧма тіян батьяс вылӧ.

³ Висьтав войтырыслы Господь Саваофлысь шуӧмсӧ. Бергӧдчӧй Ме дінӧ, и Ме бергӧдча тіян дінӧ, – висьталӧ Господь Саваоф. –

⁴ Энӧ лоӧй батьясныд кодьӧсь, кодъяс дінӧ водзынджык шыасьлісны пророкъяс. Найӧ юӧртлісны: ”Господь Саваоф тадзи висьталӧ: бергӧдчӧй асланыд лёк туй вылысь да эновтчӧй пеж уджъяссьыныд”. Но тіян батьясныд эз кывзыны Менӧ да эз сибӧдны Менсьым кывъясӧс, – висьталӧ Господь. –

⁵ Кӧнӧсь ӧні тіян батьясныд? Пророкъяс тшӧтш оз овны нэмъяс чӧж.

⁶ Но Менам кывъясӧй инісны. Сійӧ, мый йылысь Ме ӧлӧдӧмӧн висьтавлі Меным кесъялысь пророкъяс пыр, суис батьяснытӧ. Сэки найӧ бергӧдчывлісны мыжсьыныс шуалӧмӧн: ”Господь Саваоф кыдзи шуис, сідзи и вӧчис. Сійӧ вӧчис миянкӧд асланым бӧрйӧм туйным да лёк вӧчӧмным серти”».

Медводдза петкӧдчылӧм: ковтысын сулалысь верзьӧмаяс

⁷ Дарий ӧксылӧн мӧд веськӧдлан воӧ, шеват нима дас ӧтиӧд тӧлысьлӧн кызь нёльӧд лунӧ Закар пророклы, Иддо Береклӧн пилы, вӧлі Господьсянь кыв.

⁸ Войнас ме аддзылі петкӧдчылӧм. Ковтысын мирт пуяс пӧвстын сулаліс гӧрд вӧла верзьӧма. Сы бӧрвылын сулалісны гӧрд, пегана да еджыд вӧвъяс.

⁹ Ме юалі: «Ыджыдӧй, тайӧ кодъяс?» Мекӧд сёрнитысь андел шуис меным: «Ме тэныд петкӧдла, кодъяс найӧ».

¹⁰ Мирт пуяс пӧвстын сулалысь верзьӧма шуис: «Тайӧ вӧлаяссӧ Господь мӧдӧдіс кытшовтны мусӧ».

¹¹ Сэки вӧлаяс шуисны Господьлӧн анделлы, мирт пуяс пӧвстын сулалысь верзьӧмалы: «Ми кытшовтім мусӧ. Гуын моз гӧгӧр лӧнь».

¹² Сэки андел шыасис Господь дінӧ: «Господь Саваоф, дыр-ӧ на Тэ он бурсьӧлӧмтчы Ерусалим да мукӧд Иуда каръяс дінӧ? Сизимдас во нин Тэ скӧралан на вылӧ».

¹³ Господь лӧньӧдіс мекӧд сёрнитысь анделӧс бур кывъясӧн.

¹⁴ Та бӧрын мекӧд сёрнитысь андел шуис меным: «Юӧрт йӧзыслы, мый Господь Саваоф тадзи висьталӧ: – Ме вежӧгтӧмӧдз радейта Ерусалимӧс, ёна вежӧгтӧмӧй вӧсна доръя Сионӧс.

¹⁵ Но Ме чорыда скӧрала сійӧ войтыръяс вылӧ, кодъяс олӧны ышнясьӧмӧн. Кор Ме эг ёна скӧрав Аслам войтыр вылӧ, сэки войтыръяс уна лёксӧ вӧчисны Менам войтырлы.

¹⁶ Та вӧсна Господь тадзи висьталӧ: Ме бӧр бергӧдча Ерусалим дінӧ да лоа бур сьӧлӧма сы дінӧ. Сэні выльысь лэптасны Менсьым крамӧс, – висьталӧ Господь Саваоф, – мурталӧм бӧрын выльысь лэптасны Ерусалим кар.

¹⁷ Нӧшта юӧрт, мый Господь Саваоф тадзи висьталӧ: – Менам каръясын бара пуксяс бур олӧм. Господь бара бурӧдас Сионӧс, выльысь бӧръяс Ерусалим кар».

Мӧд петкӧдчылӧм: нёль сюр да нёль дорччысь

¹⁸ Ме лэпті синмӧс да аддзи нёль сюр.

¹⁹ Ме юалі мекӧд сёрнитысь анделлысь: «Мый тайӧ?» Андел вочавидзис: «Тайӧ сюръясыс найӧ, кодъяс вӧтлісны-разӧдісны Иудаысь, Израильысь да Ерусалимысь олысьяссӧ мукӧд муясӧ».

²⁰ Сэсся Господь петкӧдліс меным нёль дорччысьӧс.

²¹ Ме юалі: «Мый найӧ лӧсьӧдчӧны вӧчны?» Господь вочавидзис: «Сюръясыс вӧтлісны-разӧдісны Иуда войтырӧс сідз, мый некод юрсӧ эз лысьт кыпӧдны. А тайӧ дорччысьясыс локтісны, мед повзьӧдны вӧтлысьясӧс-разӧдысьясӧс да чегъявны сюръяссӧ сійӧ войтыръяслысь, кодъяс уськӧдчисны Иуда му вылӧ да разӧдісны сэтчӧс олысьясӧс».