Яков 5 - Коми Библия 2023

Озыръясӧс ӧлӧдӧм

¹ Ӧні висьтала тіянлы, озыръяс: сыркъялӧмӧн бӧрдӧй, ӧд тіянӧс суасны шогъяс.

² Тіян озырлунныд сісьмӧма, паськӧмнытӧ воз сёйӧма.

³ Тіян зарни-эзысьныд сімӧма. Тайӧ сімыс кутас висьтавны тіян мыжлун йылысь, и сійӧ би моз сотас тіянлысь вир-яйнытӧ. Тайӧ бӧръя кадас ті чукӧртінныд аслыныд озырлунсӧ.

⁴ Со, кылӧ тіян му вылын уджалысьяслӧн горзӧмыс, ӧд ті энӧ мынтысьӧй налы. Налӧн горзӧмыс воис Господь Саваофлӧн пельӧдзыс.

⁵ Ті олінныд тайӧ му вылас лышкыда да быдторнас чӧсмасинныд. Ті тшӧгӧдінныд асьнытӧ, кыдзи пемӧсъясӧс тшӧгӧдӧны начкысян лун кежлӧ.

⁶ Ті мыждінныд да виинныд веськыда олысьӧс, сійӧ оз нин водзсась тіянлы.

Господьлӧн локтӧмыс матын

⁷ Вокъяс, терпитӧмӧн виччысьӧй Господьлысь локтӧмсӧ. Видзӧдлӧй, кутшӧм терпитӧмӧн му вӧдитысь виччысьӧ муыслысь дона быдтассӧ. Сійӧ виччысьӧ арся да тувсов зэръяс.

⁸ Ті тшӧтш дыр терпитӧй да лоӧй зумыдӧсь, ӧд Господьлӧн локтӧмыс матын нин.

⁹ Вокъяс, энӧ мыжалӧй ӧта-мӧднытӧ, медым Енмыс эз мыжды тіянӧс. Мыждысьыс сулалӧ нин ӧдзӧс дорын.

¹⁰ Вокъяс, видзӧдӧй пророкъяс вылӧ, кодъяс сёрнитісны Господь нимсянь. Найӧ терпитӧмӧн нуисны сьӧкыдсӧ.

¹¹ Ми лыддям шудаӧн найӧс, кодъяс зумыда сулалісны помӧдз. Ті, дерт, кывлінныд Иовлӧн зумыдлун йылысь да тӧданныд, мый дасьтіс сылы мелі да бур сьӧлӧма Господь.

¹² Вокъясӧй, медвойдӧр кора тіянӧс, энӧ сетӧй кывнытӧ ни енэж водзын, ни му водзын, ни мукӧдтор водзын. Тіян ”да”-ныд мед лоӧ сӧмын ”да”, тіян ”ог”-ныд мед лоӧ сӧмын ”ог”. Сэки тіянӧс оз мыждыны.

Веськыда олысьлӧн кевмысьӧмыс вына

¹³ Тіян пиысь кӧ кодкӧ сьӧкыдалӧ, мед кевмысьӧ. Нимкодясьӧ кӧ, мед сьылӧ Енмӧс ошкана сьыланкывъяс.

¹⁴ Висьӧ кӧ кодкӧ, мед корӧ вичкоса юрнуӧдысьясӧс. Найӧ мавтыштасны висьысьӧс выйӧн Господь нимсянь да кевмысясны сы вӧсна.

¹⁵ Сэки эскӧмӧн кевмысьӧмыс отсалас висьысьлы, и Господь бурдӧдас сійӧс. А вӧчис кӧ сійӧ мыжъяс, сылысь мыжъяссӧ лоӧ прӧститӧма.

¹⁶ Висьтасьӧй ӧта-мӧд водзаныд мыжъяссьыныд да кевмысьӧй ӧта-мӧд вӧснаныд, медым бурдінныд. Ӧд веськыда олысьлӧн кевмысьӧмыс вына, сійӧ вермӧ вӧчны унатор.

¹⁷ Илля вӧлі миян кодь морт. Сійӧ сьӧлӧмсяньыс кевмысис, медым эз зэр, и му вылас эз вӧв зэрыс куим во да джын.

¹⁸ Сэсся бара кевмысис, и енэжсяньыс киссис зэр, и муыс сетіс быдтас.

¹⁹ Вокъяс, тіян пиысь кӧ кодкӧ кежас збыльсьыс, да ті кӧ бӧр бергӧданныд сійӧс збыляс,

²⁰ тӧдӧй, мый мыжа мортӧс ылӧг туй вылысь бергӧдысь мездӧ сійӧс кулӧмысь да вевттьӧ сылысь уна мыж.