Яков 2 - Коми Библия 2023

Озыръяс да гӧльяс

¹ Вокъяс, ті эсканныд Исус Кристослы, миян дзирдлуна Господьлы. Сідзкӧ, энӧ торйӧдӧй йӧзсӧ чужӧм вылӧ видзӧдӧмӧн.

² Шуам, тіян чукӧртчанінӧ пырас озыр паськӧма, зарни чунькытша морт, пырас тшӧтш омӧлик паськӧма гӧль морт.

³ Озыр паськӧма вылӧ видзӧдӧмӧн ті шуанныд сылы: «Пуксьы татчӧ, тані бурджык местаыс», а гӧль мортлы шуанныд: «Тэ сэтчӧ сувт» либӧ «Татчӧ пуксьы, менам кок дорӧ».

⁴ Тадзи вӧчигӧн ті торйӧданныд йӧзсӧ бурджык да лёкджык вылӧ да лоанныд лёкнога мыждысьясӧн.

⁵ Кывзӧй, муса вокъяс! Енмыс бӧрйис тайӧ муюгыдсьыс гӧльясӧс, медым озырмӧдны найӧс эскӧмӧн да вичмӧдны налы Юраланінсӧ, мый Енмыс кӧсйысис сетны Сійӧс радейтысьяслы.

⁶ Но ті увтыртанныд гӧльясӧс. Оз ӧмӧй озыръяс дзескӧдны тіянӧс да кыскыны тіянӧс ёрдӧ?

⁷ Оз ӧмӧй озыръяс лёкӧдны бур нимнытӧ, мый сетӧма тіянлы?

⁸ Ті кӧ збыльысь оланныд Гижӧдыслӧн медыджыд Индӧд серти: «Радейт матыссатӧ асьтӧ моз», – бура вӧчанныд.

⁹ Но ті кӧ торйӧданныд йӧзсӧ чужӧм вылӧ видзӧдӧмӧн, сэки мыж вӧчанныд, тіянӧс мыждасны Индӧд торкысьӧс моз.

¹⁰ Коді олӧ Индӧдыс серти, но торкӧ Индӧдсьыс кӧть ӧти тшӧктӧм, сійӧ лоӧ дзоньнас Индӧдсӧ торкысьӧн.

¹¹ Коді шуис: «Гозъякост олӧм эн пежав», Сійӧ тшӧтш шуис: «Эн ви». Та вӧсна, гозъякост олӧм кӧ он пежав, но виан кодӧскӧ, – лоан Индӧд торкысьӧн.

¹² Сідзкӧ, олӧй да сёрнитӧй на моз, кодъясӧс кутасны мыждыны мездлунсӧ сетысь индӧд серти.

¹³ Ӧд буралӧмыд ёна ыджыдджык мыждӧм дорысь. Но коді оз ло бур сьӧлӧма мӧд дінӧ, сійӧс лоӧ мыждӧма бурсьӧлӧмтчытӧг.

Эскӧм да бур уджъяс

¹⁴ Вокъяс, коді шуӧ «ме эска», а уджъясыс сылӧн абуӧсь, мый нӧ таысь бурыс? Вермас-ӧ татшӧм эскӧмыс мездыны сійӧс?

¹⁵ Шуам, кутшӧмкӧ чойлӧн либӧ воклӧн кӧ абу колана паськӧмыс, весиг лун кежлӧ сёяныс,

¹⁶ а тіян пиысь кодкӧ шуас сылы: «Мун лӧнь сьӧлӧмӧн, сёй-ю да шонтысь», но ачыс оз сет сылы коланаторсӧ, мый таысь бурыс?

¹⁷ Тадзи позьӧ шуны тшӧтш эскӧм йылысь: мортыслӧн уджъясыс кӧ абуӧсь, сылӧн эскӧмыс кулӧма.

¹⁸ Дерт, кодкӧ вермас шуны: «Ӧтилӧн эм эскӧм, а мӧдлӧн – уджъяс». Сылы тадзи вочавидза: «Петкӧдлы ассьыд эскӧмтӧ уджъястӧгыд, а ме петкӧдла ассьым эскӧмӧс уджъяс пыр».

¹⁹ Тэ эскан, мый Енмыс ӧти. Тэ бура вӧчан. Весиг пеж ловъяс тадзи эскӧны да тіралӧны полӧмнысла.

²⁰ Но кӧсъян-ӧ тӧдны, мывкыдтӧм мортӧй, мый уджъястӧм эскӧмыд – кулӧм эскӧм.

²¹ Миян Ӧвраам батьным вайис ассьыс Исаак писӧ висьпуктанін вылӧ. Эз-ӧ тадзи вӧчигӧн сійӧ ло Ен водзын веськыдӧн?

²² Тэ аддзан, мый сылӧн эскӧмыс вӧлі йитчӧма уджъяскӧд, а уджыс пыр сылӧн эскӧмыс лои тыр-бурӧн.

²³ Тадзи инісны Гижӧдысь кывъясыс: «Ӧвраам эскис Енлы, та вӧсна Енмыс шуис сійӧс веськыдӧн». Сійӧс шуӧма тшӧтш Енлӧн ёртӧн.

²⁴ Ті аддзанныд, мый мортыс лоӧ веськыдӧн оз сӧмын эскӧмыс пыр, но и уджъясыс пыр.

²⁵ Тадзи вӧлі тшӧтш Раавкӧд, кырсалысь анькӧд. Сійӧ сибӧдіс гортас израильса кыйӧдчысьясӧс да отсаліс налы пышйыны мӧд туйӧд. Тайӧ бур вӧчӧмыс вӧсна Енмыс лыддис сійӧс веськыдӧн.

²⁶ Кыдзи вир-яйыд ловтӧгыс кулӧма, тадзи эскӧмыд уджъястӧгыс тшӧтш кулӧма.