Восьтӧм 7 - Коми Библия 2023

Пасйӧмаяслӧн лыдыс

¹ Та бӧрти ме аддзи нёль анделӧс. Найӧ сулалісны нёльнан му пельӧсас да кутісны мулысь нёльнан тӧвнырсӧ, медым тӧлыс эз пӧльт му вылӧ, саридз вылӧ да некутшӧм пу вылӧ.

² Сэсся ме аддзи асыввывсянь кыпӧдчысь анделӧс. Киас сійӧ кутіс ловъя Енлысь пас пуктансӧ. Сійӧ гораа шыасис нёль андел дінӧ, кодъяслы вӧлі сетӧма вын вӧчны лёксӧ мулы да саридзлы. Андел шуис:

³ «Энӧ вӧчӧй лёксӧ мулы, саридзлы да пуяслы, кытчӧдз огӧ пуктӧй плешканыс пас миян Енлӧн кесйӧгъяслы».

⁴ Сэсся ме кылі пасйӧмаяслысь лыдсӧ. Тайӧ лыдыс вӧлі сё нелямын нёль сюрс морт. Найӧ вӧліны Израиль войтырлӧн быд чужанкотырысь:

⁵ Иуда чужанкотырысь – дас кык сюрс морт, Рувим чужанкотырысь – дас кык сюрс, Гад чужанкотырысь – дас кык сюрс,

⁶ Асир чужанкотырысь – дас кык сюрс, Неффалим чужанкотырысь – дас кык сюрс, Манассей чужанкотырысь – дас кык сюрс,

⁷ Симеон чужанкотырысь – дас кык сюрс, Левий чужанкотырысь – дас кык сюрс, Иссакар чужанкотырысь – дас кык сюрс,

⁸ Завулон чужанкотырысь – дас кык сюрс, Ӧсип чужанкотырысь – дас кык сюрс да Венямин чужанкотырысь – дас кык сюрс морт.

Мездмӧмаяслӧн лыдыс – лыдтӧм-тшӧттӧм

⁹ Сэсся ме видзӧдлі да аддзи, мый юралан пуклӧс водзын да Баля водзын сулаліс лыдтӧм-тшӧттӧм йӧз чукӧр. Найӧ вӧліны быд чужанвужйысь да чужанкотырысь, быд кыла йӧз пытшкысь да быд войтырысь. Найӧ вӧліны еджыд паськӧмаӧсь, а кианыс кутісны пальма росъяс

¹⁰ да гораа горзісны: – Мездмӧмыс – миян Енсянь, юралан пуклӧсын Пукалысьсянь, да Балясянь!

¹¹ Сэки став анделыс, кодъяс кытшалісны юралан пуклӧссӧ, юрнуӧдысьясӧс да нёль ловъя олысьсӧ, кымынь уськӧдчисны пуклӧс водзӧ да копыртчылісны Енмыслы.

¹² Найӧ шуалісны: – Аминь! Дзирдлуныс да мывкыдлуныс, выныс да ёнлуныс, ошкӧм-нимӧдӧмыс да аттьӧалӧмыс миян Енлы нэмъяс чӧж! Аминь.

¹³ Сэки юрнуӧдысьяс пӧвстысь ӧти юаліс менсьым: «Кодъяс тайӧ еджыд паськӧмаясыс? Кытысь найӧ локтісны?»

¹⁴ «Ыджыдӧй, тэ ачыд тӧдан», – вочавидзи ме. Сэки сійӧ шуис меным: – Тайӧ йӧзыс мунісны уна сьӧкыд пыр. Найӧ мыськисны паськӧмнысӧ Баля вирӧн, и паськӧмныс лои еджыд.

¹⁵ Та вӧсна найӧ сулалӧны Ен пуклӧс водзын, лун и вой кесъялӧны Енмыслы Сылӧн крамын. Юралан пуклӧсын Пукалысьыс лоӧ накӧд да видзӧ найӧс.

¹⁶ Найӧ оз нин кутны тшыгъявны, налӧн оз косьмы горшыс, найӧс оз пӧж шондіыс, оз сот гожйыс.

¹⁷ Ӧд Баляыс, пуклӧс водзын Сулалысьыс, кутас видзны найӧс, Сійӧ вайӧдас найӧс ловъя ва петанінӧ, и Енмыс чышкас налысь став синвасӧ.