Восьтӧм 6 - Коми Библия 2023

Печатьяс жугӧдӧм

¹ Ме аддзи, мый Баля жугӧдіс сизим печать пиысь медводдзасӧ, и кылі, мый нёль ловъя олысь пӧвстысь ӧтиыс гым кодь гора шыӧн шуис: «Лок да видзӧд!»

² Ме видзӧдлі да аддзи еджыд вӧлӧс. Сы вылын пукалысьлӧн киас вӧлі ньӧввуж. Сылы вӧлі сетӧма юркытш, и вермысь моз сійӧ муніс, медым вермыны.

³ Кор Баля жугӧдіс мӧд печатьсӧ, ме кылі мӧд ловъя олысьлысь шуӧмсӧ: «Лок да видзӧд!»

⁴ Сэки петіс мӧд вӧв, сійӧ вӧлі би гӧрд рӧма. Сы вылын пукалысьлы вӧлі сетӧма вын – босьтны му вылысь лӧньлунсӧ, медым йӧзыс виалісны ӧта-мӧднысӧ. Сылы вӧлі сетӧма ыджыд шыпурт.

⁵ Кор Баля жугӧдіс коймӧд печатьсӧ, ме кылі коймӧд ловъя олысьлысь шуӧмсӧ: «Лок да видзӧд!» Ме видзӧдлі да аддзи сьӧд вӧлӧс. Сы вылын пукалысьлӧн киас вӧлі вески.

⁶ Сэсся нёль ловъя олысь шӧрысь ме кылі кодлыськӧ гӧлӧс шысӧ. Сійӧ шуис: «Ӧти хиникс шобдіысь – ӧти динар. Куим хиникс идйысь – тшӧтш сы мында. Но выйсӧ да винасӧ эн тшыкӧд!»

⁷ Кор Баля жугӧдіс нёльӧд печатьсӧ, ме кылі нёльӧд олысьлысь шуӧмсӧ: «Лок да видзӧд!»

⁸ Ме видзӧдлі да аддзи быгалӧм рӧма вӧлӧс да сы вылын пукалысьӧс, кодлӧн нимыс вӧлі Кулӧм. Сы бӧрся вӧтчис ачыс Адыс. Налы вӧлі сетӧма ыджыдавны мулӧн нёльӧд юкӧныс вылын: виавны йӧзсӧ шыпуртӧн да тшыгйӧдӧмӧн, кулана висьӧмъясӧн да зверъяс отсӧгӧн.

⁹ Кор Баля жугӧдіс витӧд печатьсӧ, висьпуктанін улысь ме аддзи ловъяссӧ налысь, кодъясӧс вӧлі виӧма Ен кыв вӧсна да Ен йылысь висьталӧм вӧсна.

¹⁰ Найӧ гораа горӧдісны: «Вежа да збыль Ыджыдӧй! Кор нин Тэ мыждан мувывса олысьясӧс да перъян налысь водзӧссӧ миян вир вӧсна?»

¹¹ Сэки быдӧнлы налы сетісны еджыд паськӧм да тшӧктісны виччысьыштны, кытчӧдз оз тыр на моз виӧм уджъёртъясныслӧн да вокъясныслӧн лыдыс.

¹² Кор Баля жугӧдіс квайтӧд печатьсӧ, ме аддзи, мый муыс кутіс ёна вӧрны, шондіыс пемдіс да лои сьӧд дӧра кодь, а тӧлысьыс лои вир гӧрд рӧма.

¹³ Енэжсьыс кодзувъясыс усисны му вылӧ ён тӧвнырысь гылалысь инжир вотӧс моз.

¹⁴ Енэжыс гартыштчис тубрасӧ да саяліс, а керӧсъяс да діяс вешйисны асланыс местаысь.

¹⁵ Мувывса ӧксыяс, юралысьяс, озыръяс, тышкайӧзӧн веськӧдлысьяс, ыджыдалысьяс, кесйӧгъяс да мездлуна йӧз, – ставныс дзебсисны кырта горсъясӧ да керӧс потасъясӧ.

¹⁶ Керӧсъяслы да изкырталы найӧ шуалісны: «Усьӧй миян вылӧ да дзебӧй миянӧс юралан пуклӧсын Пукалысьлӧн синмысь да Балялӧн скӧрлунысь!

¹⁷ Ӧд Сылӧн ыджыд Скӧралан луныс воис нин. Коді вермас сулавны?»