Восьтӧм 4 - Коми Библия 2023

Енэжас Енмӧс ошкӧм

¹ Сэсся ме видзӧдлі енэжас да аддзи сэтысь восьса ӧдзӧс. Сэсянь ме кылі гӧлӧс шы, сійӧ вӧлі труба шы кодь. Тайӧ гӧлӧс шысӧ ме водзынджык кывлі нин. Сійӧ шуис меным: «Кыпӧдчы татчӧ! Ме петкӧдла тэныд, мый лоӧ та бӧрти».

² Дзик пыр ме тыри Лолӧн да аддзи енэжсьыс пуклӧс да сы вылын Пукалысьӧс.

³ Сылӧн чужӧмыс дзирдаліс дона изъяс моз, яшма да сердолик моз. Пуклӧс весьтас югъяліс изумруд рӧма ӧшкамӧшка.

⁴ Пуклӧс гӧгӧрыс вӧлі нӧшта на кызь нёль пуклӧс. Сэні пукалісны кызь нёль юрнуӧдысь. Найӧ вӧліны еджыд паськӧмаӧсь да зарни юркытшаӧсь.

⁵ Пуклӧссянь петісны чардби да гым шы. Пуклӧс водзас ӧзйис сизим би, Енлӧн сизим лолыс.

⁶ Сэні вӧлі стеклӧысь саридз, мый югъяліс крусталь моз. Пуклӧс водзас да сы гӧгӧрыс вӧлі нёль ловъя олысь. Найӧ водзладорсяньыс и бӧрладорсяньыс вӧлі тырӧмаӧсь синъясӧн.

⁷ Ӧтиыс на пиысь вӧлі лев кодь, мӧдыс – ӧш кодь, коймӧдыслӧн чужӧмыс вӧлі мортлӧн кодь, а нёльӧдыс вӧлі лэбысь кутш кодь.

⁸ Быдӧн на пиысь вӧлі квайт бордъя, а налӧн борд ортсыыс да пытшкӧсладорыс вӧлі тырӧма синъясӧн. Лун и вой найӧ дугдывтӧг шуалӧны: – Вежа, вежа, вежа Господь Ен, Ставсӧвермысь, коді вӧлі, эм и локтас.

⁹ Кор ловъя олысьяс ошкӧны-нимӧдӧны да аттьӧалӧны юралан пуклӧсын Пукалысьӧс, помтӧг Олысьӧс,

¹⁰ сэки кызь нёль юрнуӧдысьыс уськӧдчӧны юралан пуклӧсын Пукалысь водзӧ да копыртчылӧны помтӧг Олысьлы. Ассьыныс юркытшсӧ пуклӧс водзӧ пуктӧмӧн найӧ шуалӧны:

¹¹ – Господьӧй, Тэ шогман сибӧдны ошкӧм-нимӧдӧмсӧ да вынсӧ, ӧд Тэ вӧчин ставсӧ. Тэнад кӧсйӧм серти вӧчӧма ставсӧ, Тэнад кӧсйӧм серти ставыс олӧ.