Восьтӧм 22 - Коми Библия 2023

¹ Сэсся андел петкӧдліс меным ю, сэні визувтіс сӧстӧм ловъя ва. Сійӧ вӧлі крусталь кодь югыд. Ваыс петіс Енлӧн да Балялӧн юралан пуклӧссянь.

² Карлӧн паськыд туй шӧрас, ю ӧтар-мӧдар бокас, быдмис Олӧмыслӧн пу, коді вайӧ вотӧссӧ быд тӧлысь, вонас – дас кыкысь. Сылӧн коръясыс бурдӧдӧны войтыръясӧс.

³ Нинӧм ёрӧмаыс оз ло тайӧ карас. Сэні лоӧ Енлӧн да Балялӧн юралан пуклӧсыс, и Енлӧн кесйӧгъясыс кутасны кесъявны Сылы.

⁴ Найӧ аддзасны Енлысь чужӧмбансӧ, и Сылӧн нимыс лоӧ налӧн плешканыс.

⁵ Войыс сэні оз ло. Налы оз нин ков бисянь либӧ шондісянь югыдыс, ӧд налӧн югзьӧдысьнас лоас Господь Ен. Найӧ кутасны ыджыдавны нэмъяс чӧж.

Исуслӧн локтӧм

⁶ Андел шуис меным: «Тайӧ кывъясыс веськыдӧсь да збыльӧсь. Вежа пророкъяслӧн Господь Ен мӧдӧдіс Ассьыс анделсӧ, медым петкӧдлыны Аслас кесйӧгъяслы, мый колӧ лоны регыдъя кадӧ».

⁷ «Со, Ме регыд локта! Шуда сійӧ, коді олӧ тайӧ небӧгас водзвыв висьталӧмыс серти!»

⁸ Ме, Иоан, ставсӧ тайӧс кывлі да аддзылі. А кывлӧм да аддзылӧм бӧрас ме уськӧдчи муас, медым копыртчывны анделлы, коді петкӧдліс меным ставсӧ тайӧс.

⁹ Но андел шуис меным: «Эн вӧч тайӧс! Ме кесъяла Енмыслы тэ моз, пророкъяс-вокъясыд моз да на моз, кодъяс олӧны тайӧ небӧгас гижӧм серти. Енмыслы копыртчыв!»

¹⁰ Сэсся содтіс: «Эн тупкы печатьӧн тайӧ небӧгас водзвыв висьталӧмасӧ, ӧд кадыс матын нин».

¹¹ Лёксӧ вӧчысь мед водзӧ вӧчас лёксӧ, пеж оласнога мед водзӧ на вӧчас пежсӧ, а веськыда олысь мед водзӧ вӧчас веськыда, вежа морт мед водзӧ на вежаммас.

¹² «Со, Ме регыд локта да вая Аскӧд удждон, медым быдӧнлы мынтысьны сылӧн уджъясыс серти.

¹³ Ме эм Альфа и Омега, Панасыс и Помыс, Медводдзаыс и Медбӧръяыс».

¹⁴ Шудаӧсь найӧ, кодъяс олӧны Енлӧн тшӧктӧм серти, ӧд Енмыс сетас налы пӧткӧдчыны Олӧмыслӧн пуысь да пырны тайӧ карас дзиръяӧдыс.

¹⁵ А понъяс, тшыкӧдчысьяс, кырсалысьяс, морт виысьяс, идоллы юрбитысьяс, ылӧгсӧ радейтысьяс да пӧръясьысьяс колясны кар ортсыас.

¹⁶ «Ме, Исус, мӧдӧді Ассьым анделӧс висьтавны тайӧс тіянлы вичкоясын. Ме петі Давид чужанвужйысь да чужанкотырысь, Ме эм асъя югыд кодзулыс».

¹⁷ Лов да гӧтырпу шуӧны: «Лок!» Тайӧс кылысь мед тшӧтш шуӧ: «Лок!» Кодлӧн косьмӧ горшыс, мед локтӧ! Коді кӧсйӧ юны, мед босьтӧ ловъя васӧ дон мынтытӧг.

¹⁸ Ме эскӧда быдӧнӧс, коді кылӧ тайӧ небӧгсьыс водзвыв висьталӧмасӧ: коді содтас мыйкӧ тайӧ кывъясыс дінӧ, Енмыс мӧдӧдас сылы бырӧданторъяс, мый йылысь гижӧма тайӧ небӧгас.

¹⁹ Коді чинтас мыйкӧ тайӧ небӧгас водзвыв висьталӧмсьыс, сылысь нимсӧ Енмыс вуштас Олӧмыслӧн небӧгысь, сылӧн оз ло пайыс вежа карын да сыын, мый йылысь гижӧма тайӧ небӧгас.

²⁰ Тайӧ кывъяссӧ Висьталысьыс шуӧ: «Ме регыд локта, тайӧ тадзи!» Аминь. Лок, Господьӧй Исусӧй!

²¹ Миян Господь Исус Кристослӧн буралӧмыс ставныдкӧд тіянкӧд! Аминь.