Восьтӧм 21 - Коми Библия 2023

Выль енэж да выль му

¹ Сэсся ме аддзи выль енэж да выль му. Медводдза енэжыс да муыс бырисны, и саридзыс эз нин вӧв.

² Ме, Иоан, аддзи вежа кар – выль Ерусалим. Сійӧ лэччис енэжсяньыс, Енсянь. Сійӧс вӧлі мичмӧдӧма, быттьӧ гӧтырпуӧс верӧспуыслы.

³ Ме кылі енэжсянь гора шы. Сійӧ шуис: – Со, мувывса йӧз пӧвстын Енлӧн оланін! Енмыс кутас овны накӧд, найӧ лоӧны Сылӧн войтырӧн. Ачыс Енмыс лоас накӧд, да лоӧ налӧн Енмӧн,

⁴ Сійӧ чышкас налысь став синвасӧ. Кулӧмыс оз нин ло, оз ло шогсьӧм, бӧрдӧм ни висьӧм, ӧд важыс кольӧма.

⁵ Юралан пуклӧсын Пукалысь шуис: «Видзӧд, Ме ставсӧ вӧча выльӧс!» Сэсся содтіс: «Гиж тайӧс, ӧд тайӧ кывъясыс веськыдӧсь да збыльӧсь».

⁶ Сійӧ шуис меным: «Ставсӧ вӧчӧма! Ме эм Альфа и Омега, Панасыс и Помыс. Кодлӧн косьмӧ горшыс, сійӧс дон босьттӧг юктӧда ваӧн, коді визувтӧ ловъя ва петанінысь.

⁷ Вермысьлы Ме сета тайӧс ставсӧ. Ме лоа сылӧн Енмӧн, а сійӧ – Менам пиӧн.

⁸ Полысьясӧс, эскытӧмъясӧс, зывӧк оласногаясӧс, морт виысьясӧс, кырсалысьясӧс, тшыкӧдчысьясӧс, идоллы юрбитысьясӧс да став ылӧдчысьсӧ лоӧ шыбитӧма биӧн да тэгйӧн сотчысь тыӧ. Тайӧ мӧд кулӧм».

Выль Ерусалим

⁹ Ме дінӧ матыстчис андел. Сійӧ вӧлі сизим андел пӧвстысь, кодъяслӧн вӧлі сизим чаша бӧръя сизим бырӧданторнас. Андел шуис меным: «Лок татчӧ, ме петкӧдла тэныд Балялысь гӧтырпусӧ, коді лоас Сылы гӧтырӧн!»

¹⁰ Ме вӧлі тырӧма Лолӧн, и андел вайӧдіс менӧ ыджыд да джуджыд керӧс вылӧ да петкӧдліс меным ыджыд кар – вежа Ерусалим, коді лэччис енэжсяньыс, Енсянь.

¹¹ Сійӧ югъяліс Ен дзирдлунӧн да дзирдаліс дона из моз, югъялысь яшма моз.

¹² Карсӧ кытшаліс кыз да джуджыд стен. Сэні вӧлі дас кык дзиръя, на дорын сулалісны дас кык андел. Дзиръяяс вылас вӧлі гижӧма израильса дас кык чужанкотырлысь нимъяссӧ.

¹³ Куим дзиръяыс видзӧдіс асыввылӧ, куимыс – войвылӧ, куимыс – лунвылӧ да куимыс – рытыввылӧ.

¹⁴ Карыслӧн стенмыс подуласис дас кык из вылӧ, а изъяс вылас вӧлі гижӧма Балялӧн дас кык апостоллысь нимъяссӧ.

¹⁵ Мекӧд сёрнитысь анделлӧн вӧлі зарни бедь, медым муртавны карсӧ, сылысь дзиръяяссӧ да стенсӧ.

¹⁶ Карыс вӧлі нёль пельӧса, сылӧн кузьтаыс да пасьтаыс вӧлі ӧткодь. Андел мурталіс карсӧ бедьнас, и карлӧн кузьтаыс лои дас кык сюрс стадий. А карыслӧн судта-пасьтаыс вӧлі ӧткодь карыслӧн кузьтакӧд.

¹⁷ Сэсся андел мурталіс карлысь стенсӧ, кыдзи мувывса йӧз мурталӧны, да стенлӧн джудждаыс лои сё нелямын нёль гырддза.

¹⁸ Карлысь стенсӧ вӧлі вӧчӧма яшмаысь, а асьсӧ карсӧ – сӧстӧм зарниысь, сійӧ югъяліс стеклӧ моз.

¹⁹ Стеныслысь подув изъяссӧ вӧлі мичмӧдӧма быдпӧлӧс дона изъясӧн. Медводдза подув изйыс вӧлі яшмаысь, мӧдыс – сапфирысь, коймӧдыс – халцедонысь, нёльӧдыс – изумрудысь,

²⁰ витӧдыс – сардониксысь, квайтӧдыс – сердоликысь, сизимӧдыс – хризолитысь, кӧкъямысӧдыс – бериллысь, ӧкмысӧдыс – топазысь, дасӧдыс – хризопразысь, дас ӧтиӧдыс – гиацинтысь, дас кыкӧдыс – аметистысь.

²¹ Дас кыкнан дзиръясӧ вӧлі вӧчӧма дас кык жемчугысь, быд дзиръя – ӧти жемчугысь. Карыслӧн паськыд туйыс вӧлі сӧстӧм зарниысь, сійӧ югъяліс стеклӧ моз.

²² Крамсӧ тайӧ карсьыс ме эг аддзыв, ӧд крамыс сэні – Ставсӧвермысь Господь Ен да Баля.

²³ Карыслы югзьӧдӧм вылӧ оз ков шонді ни тӧлысь, ӧд Енлӧн дзирдлуныс югзьӧдӧ сійӧс, а сылӧн биыс – Баляыс.

²⁴ Мездмӧм войтыръяс кутасны овны сылӧн югыдас. Мувывса ӧксыяс ваясны тайӧ карас ассьыныс ошйысян-нимӧданторнысӧ.

²⁵ Карыслӧн дзиръяясыс лоӧны пыр восьсаӧсь, ӧд войыс сэні оз ло.

²⁶ Сэтчӧ лоӧ вайӧма войтыръяслысь ошйысян-нимӧданторсӧ.

²⁷ Нинӧм пежыс оз пыр тайӧ карас, некутшӧм пӧръясьысь да зывӧксӧ вӧчысь оз пыр сэтчӧ. Пырасны сӧмын найӧ, кодъяслысь нимсӧ гижӧма Балялӧн небӧгӧ – Олӧмыслӧн небӧгӧ.