Восьтӧм 10 - Коми Библия 2023

Андел киын гартӧм гижӧд

¹ Ме аддзи нӧшта ӧти вына анделӧс, коді лэччис енэжсяньыс. Сійӧс кытшаліс кымӧр, юр весьтас вӧлі ӧшкамӧшка. Сылӧн чужӧмыс вӧлі шонді кодь, а кокыс вӧлі биа сюръяяс кодьӧсь.

² Киас сійӧ кутіс неыджыд восьса гижӧд. Веськыд кокнас сійӧ сувтіс саридз вылӧ, а шуйганас – му вылӧ

³ и лев моз равӧстіс-горӧдіс ыджыд шыӧн. Сылӧн горӧдӧм бӧрын сизим гым кутісны гораа сёрнитны.

⁴ Сизим гымлӧн сёрнитӧм бӧрын ме кӧсйи гижны налысь сёрнисӧ, но енэжсяньыс ме кылі гӧлӧс шы. Сійӧ шуис меным: «Сизим гымлысь сёрнисӧ эн гиж, дзеб сійӧс».

⁵ Сэки андел, кодӧс ме аддзылі саридз да му вылын ӧтпырйӧ сулалысьӧн, лэптіс веськыд кисӧ енэжланьыс

⁶ да кыв сетіс помтӧг Олысь водзын, коді вӧчис енэжсӧ да сэні олысьясӧс, мусӧ да сы вылын олысьясӧс, саридзсӧ да сы пытшкын олысьясӧс. Сійӧ кыв сетӧмӧн шуис: «Кадыс оз нин ло.

⁷ Но сійӧ лунӧ, кор кылас сизимӧд анделлӧн трубаӧ тутсӧмыс, збыльмас Енлӧн гуся мӧвпыштӧмыс, мый йылысь Енмыс водзвыв висьтавліс пророкъяслы – Аслас кесйӧгъяслы».

⁸ Сэсся енэжсяньыс бара кыліс гӧлӧс шы, кодӧс ме кывлі нин. Сійӧ шуис меным: «Мун андел дінӧ, коді сулалӧ саридз да му вылын, да босьт сылӧн киысь восьса гижӧдсӧ».

⁹ Ме матыстчи андел дінӧ да кори сылысь гижӧдсӧ. Сійӧ шуис меным: «Босьт да сёй тайӧ гижӧдсӧ. Сійӧ лоӧ юмов ма кодь вом пытшкад, но гырк пытшкад лоӧ курыд».

¹⁰ Андел киысь ме босьті гижӧдсӧ да сёйи. Менам вомын сійӧ вӧлі юмов ма кодь. Но бӧрыннас менам гырк пытшкӧй ёна курдіс сыысь.

¹¹ Сэсся андел шуис меным: «Тэныд бара на ковмас водзвыв висьтавлыны, мый лоӧ войтыръяскӧд да чужанкотыръяскӧд, быд кыла йӧзкӧд да ӧксыяскӧд».