Титлы 3 - Коми Библия 2023

Зільӧй вӧчны бурсӧ

¹ Казьтыв эскысьяслы, медым кывзысясны юралысьяслысь да пуктӧм йӧзлысь, пыдди пуктасны налысь веськӧдлӧмсӧ да лоасны дасьӧсь вӧчны быд бурсӧ.

² Мед оз омӧльтны некодӧс, зыкӧ оз пырны, лоасны шаньӧсь да быдӧнкӧд рамӧсь.

³ Ми ӧд асьным коркӧ вӧлім вежӧртӧмӧсь да кывзысьтӧмӧсь, вошӧмаӧсь олӧмас, сетчӧмаӧсь ыштӧмас да быдпӧлӧс ковтӧм гажӧдчӧмас. Олім лёк пытшкас, вежалім, вӧлім мустӧмӧсь, да мукӧдсӧ тшӧтш мустӧмтім.

⁴ Но Ен Мездысьным петкӧдліс миян дінӧ Ассьыс бурлунсӧ да муслунсӧ.

⁵ Сійӧ мездіс миянӧс. Мездіс эз веськыд уджъясным серти, но Аслас буралӧмыс вӧсна. Ен мыськаліс миянӧс да сетіс миянлы выльысь чужны. Сійӧ выльмӧдіс миянӧс Вежа Ловнас.

⁶ Исус Кристос Мездысьным пыр Сійӧ лышкыда кисьтіс миян пытшкӧ Вежа Ловсӧ,

⁷ медым Сылӧн буралӧмсянь ми лоим веськыдӧсь да миянлы вичмис помтӧм олӧм. Тайӧ и эм миян лачаным.

⁸ Тайӧ кывъясыс эсканаӧсь. Ме кӧсъя, мед тэ тӧдчӧдӧмӧн пыр казьтылін тайӧс, медым Енлы эскысьяс тӧждысисны бурсӧ вӧчны. Тайӧ бур да йӧзыслы колана.

⁹ Тӧлктӧм вензяна сёрниысь, ордпу йылысь да Индӧд кузя зыксьӧм-пинясьӧмысь ылыстчы. Ставыс тайӧ ковтӧмтор да весьшӧрӧ.

¹⁰ Ылӧгас кежӧдысьӧс ӧтчыд да мӧдысь ӧлӧдӧм бӧрын эновт.

¹¹ Тӧд, мый татшӧм мортыс тшыкӧма, мыж вӧчӧмнас сійӧ ачыс асьсӧ мыждӧм улас сюйӧ.

Павеллӧн бӧръя корӧм

¹² Ӧртемӧс либӧ Тихикӧс кор мӧдӧда тэ дінӧ, тэрмась волыны ме дінӧ Никопольӧ. Сэні тай шуи тӧвйынысӧ.

¹³ Отсав петны туйӧ оланпас тӧдысь Зенаслы да Аполослы, медым налы ставыс вӧлі судзсяна-тырмана.

¹⁴ Миян эскысьяс мед тшӧтш велӧдчасны бурсӧ вӧчны, сетны колана отсӧг, сэки найӧ вотӧстӧг оз кольны.

¹⁵ Чолӧм тэныд ыстӧны тасянь ставныс. Висьтав чолӧм миянӧс радейтысь эскысь чой-воклы. Енлӧн буралӧмыс ставныдкӧд тіянкӧд. Аминь.