Титлы 2 - Коми Библия 2023

Эскысьясӧс велӧдӧм

¹ Тэ висьтавлы веськыд велӧдӧмыслы лӧсяланасӧ.

² Олӧма айуловӧс велӧд лоны авъяӧн, садь да сюсь вежӧраӧн. Мед найӧ топыда кутчысясны эскӧмас, муслунас да зумыдлунас.

³ Олӧма аньяс мед оласны вежавидзӧмӧн, оз суклясьны, вина оз юны, туйдӧдасны томджыкъясӧс бурас,

⁴ велӧдасны найӧс радейтны верӧснысӧ да ныв-пинысӧ.

⁵ А сідзжӧ мед велӧдасны найӧс лоны сюсь вежӧраӧн, сӧстӧм сьӧлӧмаӧн, шаньӧн, тӧждысьны гортныс вӧсна да кывзысьны верӧсныслысь. Сэки Енлысь кывсӧ оз ло омӧльтӧма.

⁶ Зонъясӧс тшӧтш велӧд лоны сюсь вежӧраӧн.

⁷ Вӧч быд бурсӧ, мед мукӧдыс тэ вылӧ видзӧдӧмӧн тшӧтш велаласны татчӧ. Велӧд сӧстӧм сьӧлӧмӧн, вежавидзӧмӧн да Енлысь кывсӧ торкавтӧг.

⁸ Сёрнит веськыда да тырвыйӧ эскӧд, медым паныд сувтысь яналас да нинӧм лёксӧ оз вермы шуны миян йылысь.

⁹ Кесйӧгъяс мед быдторйын кывзысясны асланыс ыджыдныслысь, зілясны кывшутӧг шогмыны сылы.

¹⁰ Мед оз гусясьны, мӧдарӧ, быдторйын мед петкӧдласны, мый налы позьӧ тырвыйӧ эскыны. Сэки на пыр лоӧ пыдди пуктӧма Ен Мездысьнымлысь велӧдӧмсӧ.

¹¹ Енмыс петкӧдліс Ассьыс буралӧмсӧ, медым став йӧзсӧ мездыны.

¹² Буралӧмыс велӧдӧ миянӧс, мед ми эновтчим Ентӧг олӧмсьыс да быдпӧлӧс мувывса ыштӧмсьыс, вӧлім сюсь вежӧраӧсь тайӧ нэмас, олім веськыда да вежавидзӧмӧн,

¹³ виччысим вына Енлысь да миян Мездысь Исус Кристослысь дзирдлуна воссьӧмсӧ да шуда лачанымлысь збыльмӧмсӧ.

¹⁴ Кристос сетіс Асьсӧ миян вӧсна, медым мездыны миянӧс быд лёксьыс, сӧстӧммӧдны миянӧс да торйӧдны Аслыс войтырӧс, коді сьӧлӧмсяньыс пондас вӧчны бурсӧ.

¹⁵ Тадзи велӧд, ышӧд да янӧд тэныд сетӧм вынӧн. Эн сет асьтӧ некодлы увтыртны.