Титлы 1 - Коми Библия 2023

¹ Гижӧ Павел, Енлӧн кесйӧг да Исус Кристослӧн апостол. Менӧ мӧдӧдӧма, мед отсавны Енлӧн бӧрйӧмаяслы эскыны да тӧдны збыльсӧ, медым эськӧ найӧ вермисны овны вежавидзӧмӧн

² да помтӧм олӧм вылӧ лачаӧн. Помтӧм олӧмсӧ Ен кӧсйысис му пуксьытӧдзыс на, и Ассьыс кывсӧ Сійӧ оз веж.

³ Ас кадӧ Ен Мездысьным сетіс тӧдны кывсӧ бурвисьталӧм пыр. Сылӧн тшӧктӧм серти менӧ пуктӧма бурвисьтавны тайӧ кывсӧ.

⁴ Чолӧмала тэнӧ, Тит. Ӧтувъя эскӧманым тэ меным збыльысь пи кодь. Бурсетӧм, буралӧм да лӧнь олӧм тэныд Ен Батьсянь да миян Мездысь Господь Исус Кристоссянь.

Титлы тшӧктӧм

⁵ Ме коли тэнӧ Критӧ, мед тэ эштӧдін сэні помавтӧмторсӧ да быд карын индін вичкоса юрнуӧдысьясӧс, кыдзи тай ме тэныд тшӧктылі.

⁶ Юрнуӧдысь мед вӧлі бур оласнога, ӧти гӧтыра, ныв-пиыс мед эскисны, быдторйын кывзысисны да лэдзчысьӧмӧн эз овны, на йылысь мед эз кыв лёк сёрни.

⁷ Вичкоса веськӧдлысьӧн вермӧ лоны сӧмын бур оласнога морт, ӧд сылы сетӧма вӧчны Енлысь удж. Мед сійӧ эз вӧв асныра, эз вӧв дӧзмысь, эз ю, эз усьлась мукӧд вылӧ, аслыс эз курав,

⁸ ветлысь-мунысьӧс мед сибӧдіс, бурсӧ радейтіс, вӧлі сюсь вежӧра, быдторйын веськыд, вежавидзысь да кужис асьсӧ кутны.

⁹ Сійӧ мед вӧлі зумыда кутчысьӧма велӧдӧмыслӧн збыль кывъясӧ, кужис веськыд велӧдӧмнас туйдӧдны мукӧдӧс да вермис янӧдны паныд сувтысьӧс.

¹⁰ Унаӧн асныралӧны, ковтӧмсӧ сёрнитӧны да мукӧдсӧ пӧрйӧдлӧны, и унджыкыс найӧ вундыштчӧмаяс пӧвстысь.

¹¹ Татшӧмъясыслысь колӧ тупкыны вомсӧ. Яндысьтӧм горшлунныс вӧсна найӧ асланыс велӧдӧмӧн шӧйӧвоштӧны дзонь керкаяс, мыйӧ оз ков велӧдӧны.

¹² Налӧн асланыс гижысьыс весиг шулӧма: – Критсаяс – пӧръясьысьяс, скӧр да горш зверъяс, дыш руньӧяс.

¹³ Веськыда шуӧма на йылысь. Та вӧсна чорыда янӧд татшӧм йӧзсӧ, медым налӧн эскӧмыс вӧлі веськыд.

¹⁴ Найӧ мед оз кывзыны иудейяслысь мойдъяссӧ да йӧзлысь ас лӧсьӧдӧм тшӧктӧмъяссӧ. Татшӧм йӧзыс ӧд кежӧмаӧсь збыльсьыс.

¹⁵ Сӧстӧмлы ставыс сӧстӧм, а пежасьӧмалы да эскытӧмлы нинӧм абу сӧстӧм. Налӧн пежасьӧма вежӧрыс, весиг сьӧлӧмыс.

¹⁶ Найӧ шуӧны, тӧдам пӧ Енсӧ, но уджыс налӧн мӧдтор йылысь висьталӧ. Найӧ мустӧмӧсь, кывзысьтӧмӧсь и бурсӧ вӧчны оз сяммыны.