Сьылан 8 - Коми Библия 2023

¹ – Тэ кӧ эськӧ вӧлін менам вокӧн, кодӧс мамӧй нёньӧдліс! Сэки эськӧ ывлаын паныдасигӧн ме окалі тэнӧ, и менӧ некод эз мыжды.

² Сэки эськӧ босьті тэнӧ аскӧд, вайӧді тэнӧ аслам мам керкаӧ. Тэ эськӧ велӧдін менӧ, а ме юктӧді тэнӧ чӧскыд винаӧн, гранат вотӧса ваӧн.

³ Сылӧн шуйга киыс менам юр улын, веськыд кинас сійӧ кутлӧ менӧ.

⁴ Ерусалимса нывъяс, кыв сетӧй, мый онӧ садьмӧдӧй муслунсӧ кадысь водз. (Мукӧдъяс:)

Муслуныс кулӧм кодь вына

⁵ – Коді тайӧ, овтӧминысь локтысьыс? Сійӧ топӧдчӧма мусукыс бердӧ. (Ныв:) – Яблӧг пу улын ме садьмӧді тэнӧ, сэні коркӧ сьӧктаммис тэнад мамыд, сэні сійӧ чужтіс тэнӧ.

⁶ Пукты менӧ печатьӧс моз аслад сьӧлӧмад, чунькытшӧс моз новлы менӧ киад. Муслуныс кулӧм кодь вына, вежӧгтӧмыс ад кодь скӧр. Сылӧн ньӧвйыс – биа ньӧв, сійӧ ыпъялысь ыджыд би кодь.

⁷ Ыджыд ва оз вермы кусӧдны муслунсӧ, юяс оз вермыны пӧдтыны сійӧс. Мортыс кӧ сетас став ассьыс озырлунсӧ, мед ньӧбны муслунсӧ, сійӧс асьсӧ мустӧмтасны. (Вокъяс:)

⁸ – Миян чойным ичӧт на, сылӧн морӧсыс абу на гӧрддзасьӧма. Мый миянлы вӧчны чойнымкӧд, кор локтасны сійӧс коравны?

⁹ Сійӧ кӧ вӧлі карса стенмӧн, ми эськӧ мичмӧдім сійӧс эзысьӧн. Сійӧ кӧ вӧлі ӧдзӧсӧн, ми эськӧ эжим сійӧс сус пуӧн. (Ныв:)

¹⁰ – Ме – карса стен, менам морӧсӧй быттьӧ сюръяяс, мусукӧйлы ме кисьмӧм-воӧм ань. (Зон:)

¹¹ Ваал-Гамонын Соломонлӧн вӧлі виноград йӧр. Йӧрсӧ сійӧ сетіс кӧртымӧ виноград быдтысьяслы, вотӧсысь быдӧн сетіс сылы сюрс эзысь.

¹² А менам виноград йӧрӧй аслам. Сюрс эзысьыс мед лоӧ тэныд, Соломон, а кыксё эзысьыс – виноград быдтысьяслы.

¹³ Сад йӧрын олысь дзоридзӧй, тэнсьыд гӧлӧс шытӧ кывзӧны ёртъясӧй, лэдз меным тшӧтш кывны тэнӧ. (Ныв:)

¹⁴ – Тэрмась, мусукӧй, котӧрт газель моз, котӧрт том кӧр моз чӧскыда ӧвтысь керӧсъяс вывті.