Сьылан 7 - Коми Библия 2023

¹ – Бергӧдчы, бӧр лок, суламса нылӧй! Бергӧдчы, бӧр лок, кӧсъям видзӧдлыны тэ вылӧ. (Ныв:) – Мыйла тіянлы видзӧднысӧ суламса ныв вылӧ, видзӧдны маханаимса йӧктысьяс вылӧ моз? (Зон:)

Кутшӧм мича тэ, мусаӧй!

² – Кутшӧм лӧсьыд тэнад сандалиа кокыд, пыдди пуктана нылӧй! Тэнад коскыд сикӧтш кодь, кужысь киӧн гӧгрӧстӧма.

³ Тэнад гӧгйыд гӧгрӧс дозмук кодь, кытысь оз чинлы чӧскыд винаыс. Тэнад кынӧмыд шобді чукӧр кодь, кытшалӧма лилия дзоридзӧн.

⁴ Тэнад морӧсыд – двӧйни кӧрпиян, двӧйни газельяс кодьӧсь.

⁵ Тэнад сьыліыд слӧн лыысь вӧчӧм сюръя кодь, синмыд хешбонса вайӧртӧд кодь, Бат-Раббим дзиръядорса вайӧртӧд кодь, нырыд Дамасклань видзӧдысь ливанса башня кодь.

⁶ Юрыд Кармил керӧс кодь, юрсиыд лӧсталӧ пемыдгӧрд вурун моз, тэнад юрсиыд весиг ӧксыӧс тывйыштӧ.

⁷ Кутшӧм мича тэ, мусаӧй, лӧсьыд видзӧдны тэ вылӧ, менсьым сьӧлӧмӧс гажӧдан!

⁸ Тэнад мыгӧрыд пальма кодь, морӧсыд виноград роз кодь.

⁹ Ме мӧвпышті: кавшася тайӧ пальма вылас, кутчыся сылӧн вотӧса увъясӧ. Морӧсыд лоӧ меным виноград розйӧн, лолалӧмыд – яблӧг ӧвтӧмӧн,

¹⁰ вомдорыд лоӧ бур винаӧн, мый визувтӧ радейтчысьлы, кӧтӧдӧ мудзӧмалысь вомдорсӧ. (Ныв:)

Лок, мусукӧй!

¹¹ – Ме – мусукӧйлӧн, ме дінӧ сійӧс кыскӧ.

¹² Лок, мусукӧй, мунам видз вылӧ, войсӧ коллялам хна пӧвстын.

¹³ Асъядорыс мунам виноград йӧрӧ, видзӧдлам, мыччысьӧма-ӧ виноград корйыс, гӧрддзасьӧма-ӧ сылӧн вотӧсыс, видзӧдлам, дзоридзалӧ-ӧ гранат пу. Сэні ме козьнала тэныд муслунӧс.

¹⁴ Мандрагора дзоридз чӧскыда нин ӧвтӧ, ӧдзӧс дораным миян быд чӧскыд вотӧсыс – выльыс и важыс. Ме видзи найӧс тэныд, мусукӧй!