Сьылан 6 - Коми Библия 2023

¹ – Кытчӧ тэнад мусукыд мунӧма, медмича аньӧй? Кодарланьӧ тэнад сьӧлӧмшӧрыд кежӧма? Висьтав, и ми тэкӧд корсям сійӧс. (Ныв:)

² – Менам мусукӧй лэччӧма аслас сад йӧрӧ, кӧні быдмӧны чӧскыда ӧвтысь быдмӧгъяс, сійӧ пӧткӧдчӧ сад йӧр вотӧснас, ӧктӧ сэтысь лилия.

³ Ме – мусукӧйлӧн, а мусукӧй – менам, сылӧн йирсяніныс лилия дзоридзьяс пӧвстын. (Зон:)

Менам мусаысь мичаыс абу

⁴ – Мусаӧй, тэ Тирза кар кодь мича, тэнад мичлуныд Ерусалимлӧн кодь, тэ дӧрапасӧн локтысь тышкайӧз кодь шемӧсмӧдана.

⁵ Вешты синтӧ ме вылысь, тэнад видзӧдласыд менӧ шӧйӧвоштӧ!

⁶ Тэнад юрсиыд Галаад керӧс вывсянь лэччысь кӧза чукӧр кодь. Тэнад пиньясыд шырӧм ыж чукӧр кодьӧсь, быттьӧ ыжъяс, кодъяс петӧны ваысь мыссьӧм бӧрын. Ставныс двӧйнипӧлаӧсь, весиг ӧти абу вошӧма.

⁷ Тэнад бандзибъясыд гранат джын кодьӧсь, дзебсьӧмаӧсь чужӧмвевттьӧд улад.

⁸ Мед кӧ ӧксылӧн квайтымын ӧксы-ань, кӧкъямысдас кесйӧг-гӧтыр да унасьыс-уна том ныв,

⁹ но менам сӧстӧм гулюӧй сӧмын ӧти, мамыслӧн ӧтка ныв, чужтысьыслӧн медся донаыс. Нывъяс видзӧдӧны сы вылӧ да нимӧдӧны сійӧс, ӧксы-аньяс да ӧксылӧн гӧтыръяс ошкӧны сійӧс:

¹⁰ «Коді тайӧ? Сійӧ асъя кыа моз дзирдалӧ, сійӧ тӧлысь кодь мича, шонді кодь югыд, дӧрапасӧн локтысь тышкайӧз кодь шемӧсмӧдана». (Ныв:)

Бергӧдчы, бӧр лок!

¹¹ – Ме муні кольтуся сад йӧрӧ, лэччи веж ковтысӧ видзӧдлыны, эз-ӧ мыччысь виноград кор, оз-ӧ дзоридзав гранат пу.

¹² Эг и тӧдлы, кыдзи сьӧлӧмӧй кыскис менӧ менам войтырысь пыдди пуктанаяслӧн тарантас дорӧ.