Сьылан 5 - Коми Библия 2023

¹ – Аслам сад йӧрӧ локті ме, чоюкӧй-гӧтырпуӧй, чӧскыд турун да смирна чукӧрті, вина-йӧв ме юи, мазі позйысь ма сёйи. (Мукӧдъяс:) – Сёйӧй, ёртъяс! Коддзымӧнныд юӧй, радейтчысьяс! (Ныв:)

Ме сійӧс корси, но эг аддзы

² – Ачым узя, а сьӧлӧмӧй оз узь. Кыла – мусукӧй игӧдчӧ. (Зон:) – Чоюкӧй, мусаӧй, сӧстӧм гулюӧй, восьт меным ӧдзӧстӧ! Юрӧй кӧтасис лысвасьыс, юрсиӧй вазис войся уль сынӧдсьыс. (Ныв:)

³ – Паськӧмӧс ме пӧрччи нин – выльысь ӧмӧй пасьтасьны? Кокӧс ме мыськи нин – бара ӧмӧй няйтӧсьтны?

⁴ Менам мусукӧй ӧдзӧс розьӧдыс кисӧ нюжӧдіс, и менам пытшкӧсӧй пондіс пессьыны.

⁵ Ме чеччи восьтны мусуклы, менам киысь смирна войталіс, чуньясысь войталіс ӧдзӧс вуг вылӧ.

⁶ Ме восьті ӧдзӧсӧс мусукӧйлы, но сійӧ, вӧлӧм, бӧр нин мунӧма. Таысь сьӧлӧмӧй кувмӧн жугыльтчис. Ме сійӧс корси, но эг аддзы, чуксалі, но сійӧ эз вочавидз.

⁷ Меным паныдасисны карсӧ кытшовтысь видзысьяс, найӧ нӧйтісны-дойдалісны менӧ, нетшыштісны менсьым вевттьӧдӧс.

⁸ Кыв сетӧй меным, ерусалимса нывъяс. Тіянлы кӧ паныдасяс менам мусукӧй, мый ті сылы висьталанныд? Висьталӧй, мый ме эбӧстӧмми муслунысь. (Мукӧдъяс:)

Мусукӧс ошкӧм

⁹ – Мыйӧн тэнад мусукыд бурджык мукӧдсьыс, медмича аньӧй? Мыйӧн тэнад мусукыд торъялӧ мукӧдсьыс, мыйла тэ кыв сетны коран миянӧс? (Ныв:)

¹⁰ – Менам мусукӧй вына, сійӧ банйӧм чужӧма, дас сюрсысь сы кодьыс оз сюр.

¹¹ Сылӧн юрыс сӧстӧм зарни кодь, читкыля юрсиыс кырныш кодь сьӧд.

¹² Синмыс ва дорын пукалысь кык гулю кодь, быттьӧ йӧлын мыссьӧм бӧрын шойччысь гулюяс.

¹³ Сылӧн бандзибъясысь ӧвтӧ сад йӧрысь моз, кӧні быдмӧны чӧскыда ӧвтысь быдмӧгъяс. Сылӧн вомдорыс лилия дзоридз кодь, вомдорсьыс войталӧ смирна.

¹⁴ Сылӧн киыс зарни шы кодь, мичмӧдӧма дона изъясӧн. Сылӧн кынӧмыс слӧн лыысь, вевттьӧма сапфир изъясӧн.

¹⁵ Сылӧн кокыс мрамор сюръя кодь, зарни подув вылӧ сувтӧдӧма. Сылӧн мыгӧрыс Ливан керӧс кодь, ыджыд сус пу кодь.

¹⁶ Сылӧн вомыс – юмовтор, ставыс сылӧн кыскӧ ас дінас. Татшӧм менам мусукӧй, татшӧм менам ёртӧй, ерусалимса нывъяс!