Сьылан 4 - Коми Библия 2023

Зон ошкӧ мусаыслысь мичлунсӧ

¹ – Кутшӧм мича тэ, мусаӧй, тэ мичасьыс-мича! Чужӧмвевттьӧд улад синмыд гулю кодь, юрсиыд Галаад керӧс вывсянь лэччысь кӧза чукӧр кодь.

² Тэнад пиньясыд шырӧм ыж чукӧр кодьӧсь, быттьӧ ыжъяс, кодъяс петӧны ваысь мыссьӧм бӧрын. Ставныс двӧйнипӧлаӧсь, весиг ӧти абу вошӧма.

³ Тэнад вомдорыд гӧрд лента кодь, льӧбъясыд чӧскыдӧсь. Тэнад бандзибъясыд гранат джын кодьӧсь, дзебсьӧмаӧсь чужӧмвевттьӧд улад.

⁴ Тэнад сьыліыд Давидлӧн башня кодь, кӧні ӧшалӧ сюрс мында сайӧдпӧв, тышкайӧзлӧн став сайӧдыс.

⁵ Тэнад морӧсыд – двӧйни кӧрпиян, лилия пӧвстын йирсьысь двӧйни газельяс.

⁶ Кор луныс ыркыдӧн лолалӧ, кор вуджӧръяс пышйӧны, ме кая смирна керӧс йылӧ, муна ладан ыб вылӧ.

⁷ Мусаӧй, тэ сэтшӧм мича, тэнад ставыс тыр-бур! (Зон:)

Муслунлӧн сад йӧр

⁸ – Лок, гӧтырпуӧй, ливанса керӧссянь, лок ме дінӧ Ливансянь! Лэччы Амана керӧс йывсянь, коль Сенир да Ермон керӧсъяс, левлысь сайӧдчанінсӧ, леопардлысь оланінсӧ.

⁹ Тэ пӧлӧнитін менсьым сьӧлӧмӧс, чоюкӧй-гӧтырпуӧй, гусялін аслад ӧтчыд видзӧдлӧмӧн, аслад сикӧтш молльӧн.

¹⁰ О, кутшӧм юмов тэнад муслуныд, чоюкӧй-гӧтырпуӧй! Тэнад муслуныд вина дорысь на чӧскыд! Тэнад мавтасыд став быдмӧгсьыс на чӧскыда ӧвтӧ.

¹¹ Ма войталӧ тэнад вомдорысь, гӧтырпуӧй, ма да йӧв тэнад вом пытшкын! Тэнад паськӧмысь ӧвтӧ ливанса вӧрӧн.

¹² Менам чоюкӧй-гӧтырпуӧй йигналӧм сад йӧр кодь, тупкыса юкмӧс кодь, пӧдса ва петанін кодь.

¹³ Тэ – сад йӧр, кӧні быдмӧны гранат, чӧскыд вотӧса пуяс, хна да нард,

¹⁴ нард да шафран, имбир да корица, чӧскыд дука пуяс, смирна да алоэ – став медбур ӧвтанторйыс.

¹⁵ Тэ – сад йӧрын ва петанін, ловъя ва юкмӧс, кытчӧ Ливан керӧссянь визувтӧ ва. (Ныв:)

¹⁶ – Кыпӧдчы, вой тӧв, пӧльышт, лун тӧв! Пӧльышт менам сад вылӧ, медым паськалас сылӧн чӧскыд дукыс! Мед локтас менам мусукӧй аслас сад йӧрӧ, мед видлас сэтысь чӧскыд вотӧссӧ.