Сьылан 3 - Коми Библия 2023

Кӧні менам радейтанаӧй?

¹ – Войнас вольпасьын ме гажтӧмтчи аслам радейтанаысь, ме корси сійӧс, но эг аддзы.

² Ме шуи чеччыны, кытшовтны карсӧ, изэрд-улич вылысь корсьны ассьым радейтанаӧс. Ме корси сійӧс, но эг аддзы.

³ Меным паныдасисны карсӧ кытшовтысь видзысьяс. Ме юалі налысь: «Аддзылінныд-ӧ менсьым радейтанаӧс?»

⁴ Муртса вешйи на дінысь, и ме аддзи ассьым радейтанаӧс. Ме шашаритчи сыӧ, эг лэдз ас дінысь, ме вайӧді сійӧс мам керкаӧ, пырті менӧ чужтысьлӧн вежӧсӧ.

⁵ Газель да лань водзын кыв сетӧй, ерусалимса нывъяс, мый онӧ садьмӧдӧй муслунсӧ кадысь водз. (Мукӧдъяс:)

Ӧксылӧн гӧтрасьӧм

⁶ – Коді тайӧ, овтӧминысь локтысьыс? Сійӧ локтӧ тшын сюръя моз, ӧвтӧ сысянь смирнаӧн да ладанӧн, ылі муысь вайӧм чӧскыд ӧвтанторйӧн.

⁷ Видзӧдлӧй, тайӧ ӧд Соломонлӧн пуклӧсыс! Сы гӧгӧр квайтымын тышка морт, Израильлӧн медвынаясыс.

⁸ Найӧ ставныс шыпуртаӧсь, тышкасьны кужысьяс. Быдӧнлӧн ки улас шыпурт, медым дорйысьны весиг войнас.

⁹ Ассьыс новлӧдлан пуклӧссӧ Соломон ӧксы вӧчӧма ливанса пуысь,

¹⁰ потшъяссӧ – эзысьысь, мышсӧ – зарниысь, пукаланінсӧ эжӧма пемыдгӧрд дӧраӧн, пытшкӧсладорсӧ мичмӧдӧма муслунӧн. Ерусалимса нывъяс,

¹¹ петӧй, сионса нывъяс, видзӧдлӧй Соломон ӧксы вылӧ! Сылӧн юр вылас юркытш – сійӧс мамыс пуктӧма сылӧн гӧтрасян лунӧ, сьӧлӧмсӧ гажӧдан лунӧ.