Сьылан 2 - Коми Библия 2023

¹ – Ме – шаронса нарцисс, ковтысын быдмысь лилия. (Зон:)

² – Нывъяс шӧрын менам мусаӧй быттьӧ лежнӧг пиын дзоридзалысь лилия. (Ныв:)

³ – Зонъяс пӧвстын менам мусукӧй быттьӧ вӧрса пуяс костын яблӧг пу. Сылӧн вуджӧр улын меным нимкодь пукавны, сылӧн вотӧсыс юмов менам вомын.

⁴ Мусукӧй вайӧдіс менӧ гажӧдчанінӧ, сылӧн муслуныс дӧрапас моз дӧлаліс ме весьтын.

⁵ Вайӧй меным изюм, медым ёнмыштны, вайӧй меным яблӧг, медым ловзьыштны, ӧд ме муслунысь эбӧстӧмми.

⁶ Сылӧн шуйга киыс менам юр улын, веськыд кинас сійӧ кутлӧ менӧ.

⁷ Газель да лань водзын кыв сетӧй, ерусалимса нывъяс, мый онӧ садьмӧдӧй муслунсӧ кадысь водз. (Ныв:)

Мусукӧй – менам, а ме – сылӧн

⁸ – Мусукӧй локтӧ, ме кыла сылысь гӧлӧс шысӧ. Сійӧ котӧртӧ керӧсъяс вывті, чеччалӧ мылькъяс вомӧн.

⁹ Менам мусукӧй газель кодь, том кӧр кодь. Сійӧ сулалӧ нин керка дорын, кыйялӧ ӧшиньӧ, видзӧдчӧ ӧшинь тас костӧд.

¹⁰ Меным шуалӧ: «Чеччы, мусаӧй, пет, менам мичаӧй!

¹¹ Видзӧдлы, тӧлыс кольӧма, зэрыс дугдӧма, зэра кадыс помасьӧма.

¹² Дзоридзьяс мыччысьӧны, миян муын кылӧ гулюлӧн кургӧмыс – воис сьылан кад.

¹³ Инжир пулӧн вотӧсыс кисьмӧ, дзоридзалысь виноград чӧскыда ӧвтӧ. Чеччы, мусаӧй, пет, менам мичаӧй!

¹⁴ Гулюӧй менам, мыйла дзебсясян изкырта потасын, сайӧдчан джуджыд кыр бердын! Петкӧдлы меным чужӧмбантӧ, сет меным кывны гӧлӧс шытӧ, ӧд тэнад гӧлӧс шыыд – небыд, тэнад чужӧмбаныд – мичасьыс-мича!»

¹⁵ Кыйӧй ручьясӧс, куталӧй ручпиянӧс виноград йӧрысь. Найӧ бырӧдӧны винограднымӧс, а сійӧ миян дзоридзалӧ нин.

¹⁶ Мусукӧй – менам, а ме – сылӧн, лилия дзоридзьяс пӧвстын сылӧн йирсяніныс.

¹⁷ Кор луныс ыркыдӧн лолалӧ, кор вуджӧръяс пышйӧны, тэрмась, мусукӧй! Котӧрт газель моз, том кӧр моз котӧрт керӧс потасӧд.