Софоний 2 - Коми Библия 2023

Господьӧс корсьысьяс мездмасны

¹ Тӧдмалӧй, тӧдмалӧй асьнытӧ, яндысьтӧм йӧз,

² кытчӧдз оз во индӧм кад, кытчӧдз лунъясыс оз лэбны кыд моз, кытчӧдз оз киссьы тіян вылӧ Господьлӧн яр скӧрлуныс, кытчӧдз оз су тіянӧс Господьлӧн скӧралан луныс.

³ Корсьӧй Господьӧс, мувывса рам сьӧлӧмаяс, Сылӧн Индӧд серти олысьяс. Корсьӧй веськыдлунсӧ, корсьӧй рамлунсӧ, сэки, гашкӧ, ті верманныд дзебсьыны Господьлӧн скӧралан лунӧ.

Филистим муӧс мыждӧм

⁴ Газаӧс эновтасны, Аскалон кушмас, Азотын олысьясӧс луншӧрнас вӧтласны, Экронӧс вужнас нетшыштасны.

⁵ Курыд шог саридздор муын олысьяслы, керетса войтырлы. Господь висьталӧ Ханаан му йылысь, шуӧ Филистим му йылысь: – Ме бырӧда тэнӧ, тэнад оз коль олысьыс.

⁶ Саридздорса му лоӧ йирсянінӧн, ыжъяслы йӧртӧдӧн.

⁷ Сійӧ муыс вичмас Иуда чужанкотырлӧн коляслы, сэні найӧ пондасны видзны ыж-мӧснысӧ, войнас найӧ пондасны узьны-шойччыны аскалонса керкаясын. Ӧд Господь Ен кутас тӧждысьны на вӧсна, Сійӧ бара сетас налы бур олӧм.

Моав да аммон войтыръясӧс мыждӧм

⁸ Ме кывлі Моавлысь омӧльтӧмсӧ, кывлі аммон войтырлысь лёкӧдӧмсӧ, кыдзи найӧ увтыртісны Менсьым войтырӧс, кыдзи повзьӧдлісны, мый уськӧдчасны на вылӧ.

⁹ Та вӧсна Ме кыв сетӧмӧн кӧсйыся Аслам олӧмӧн, – висьталӧ Господь Саваоф, Израильлӧн Ен, – Моав лоӧ Содом кодь, аммон войтыр лоӧ Гомора кодь, налӧн муясыс тырасны ёг турунӧн, лоӧны сола гуӧн, пыр кежлӧ лоӧны овтӧминӧн. Менам коляс войтырӧй куштас найӧс, Менам войтырысь ловйӧн кольӧмаяс босьтасны налысь мусӧ.

¹⁰ Тайӧ суас найӧс вылӧ кыпӧдчӧмысь, суас сыысь, мый найӧ омӧльтісны да повзьӧдлісны Господь Саваофлысь войтырсӧ.

¹¹ Найӧ кутасны ёна повны Господьысь, ӧд Господь бырӧдас мувывса став енсӧ. Став йӧзыс кутасны копрасьны Господьлы, быд морт копыртчас Сылы аслас муын.

Эфиопияӧс да Ассурӧс мыждӧм

¹² Ті, Эфиопия войтыр, куланныд Менам шыпуртысь.

¹³ Господь нюжӧдас Ассьыс кисӧ войвывлань да бырӧдас Ассур му, Сійӧ пазӧдас Ниневия кар, вӧчас сійӧс кос муӧн, овтӧминӧн.

¹⁴ Сэні кутасны узьны-шойччыны пемӧс чукӧръяс да вӧлявывса зверъяс, ёж да пеликан кутасны узьны усьӧм сюръяяс дорын, стен розьясысь кутас кывны налӧн гӧлӧс шыныс. Ӧдзӧс тагӧсъяссӧ лоӧ жугӧдӧма, сус пу эжӧдсӧ стенъяссьыс лоӧ кульӧма.

¹⁵ Татшӧмӧн лоӧ кар, кӧні йӧзыс гажӧдчылісны, тӧждысьтӧг олісны, ас пытшканыс шуалісны: «Миян кар кодь мӧдыс абу». Но ӧні сійӧ лои киссьӧм карӧн, зверъяслы – дзебсянінӧн. Сы дінті мунысьяс пондасны шутьлявны, кинас швачӧдны боканыс.