Шусьӧгъяс 8 - Коми Библия 2023

Мывкыдлунсӧ радейтысь аддзӧ олӧм

¹ Мывкыдыс чуксалӧ, вежӧрыс гӧлӧссӧ кыпӧдӧ.

² Туйбокса керӧсъяс вылын, туйвежъясын сійӧ сулалӧ.

³ Карса дзиръя дорын сійӧ чуксалӧ, карӧ пыранінын шыалӧ:

⁴ «Дона йӧз, тіян дорӧ шыася, морт пиянлы висьтала.

⁵ Кага мывкыдаяс, велӧдчӧй сюсьлунӧ, мывкыдтӧмъяс, вежӧрсялӧй.

⁶ Кывзӧй, ӧд ме висьтала коланасӧ, менам вомӧй сёрнитӧ веськыда.

⁷ Ме висьтала збыльсӧ, менам вомӧй зывӧктӧ лёксӧ.

⁸ Менам кывъясӧй веськыдӧсь, менам сёрниын наянлуныс да ылӧгыс абу.

⁹ Вежӧра мортлы найӧ ясыдӧсь, тӧдӧмлунсӧ корсьысьлы – веськыдӧсь.

¹⁰ Энӧ эзысь, а менсьым велӧдӧмӧс босьтӧй, энӧ весалӧм зарни, а тӧдӧмлунсӧ сибӧдӧй,

¹¹ мывкыдлуныс ӧд дона изйысь на бурджык, некутшӧм кӧсйӧмтор оз позь ӧткодявны сыкӧд.

¹² Ме – мывкыдлуныс, ола сюсьлункӧд, тӧдӧмлуныс да вежӧрыс – мекӧд.

¹³ Коді Господьысь полӧ, сійӧ мустӧмтӧ лёксӧ. Тшапитчӧм да асьтӧ вылӧ пуктӧм, лёк оласног да ылӧг сёрни ме мустӧмта.

¹⁴ Туйдӧдӧмыс да мывкыда олӧмыс месянь локтӧ, гӧгӧрвоӧмсӧ да вынсӧ ме сета.

¹⁵ Ме отсӧгӧн ӧксыяс юралӧны, ыджыдалысьяс веськыд индӧдъяс гижӧны.

¹⁶ Ме отсӧгӧн юралӧны юралысьяс, веськӧдлысьяс да ёрдысьяс.

¹⁷ Менӧ радейтысьӧс ме радейта, менӧ корсьысь аддзас менӧ.

¹⁸ Месянь – озырлун да пыдди пуктӧм, бырлытӧм эмбур да веськыда олӧм.

¹⁹ Менам вотӧсӧй сӧстӧм зарниысь бурджык, менам козинӧй весалӧм эзысь дорысь донаджык.

²⁰ Ме ветла веськыдлуныслӧн туйӧд, веськыда вӧчӧмыслӧн ордымӧд,

²¹ менӧ радейтысьлы ме озырлун козьнала, сылысь йӧртӧдъяссӧ чукйӧдзыс тырта. [Быдлунсяыс йылысь висьталігӧн ме ог вунӧдлы и бырлытӧмыс йылысь.]

²² Ме вӧлі Господькӧд, кор Сійӧ паніс уджсӧ, кор Сылӧн вӧчӧмторъясыс эз на вӧвны.

²³ Кадсӧ арталӧмыс эз на вӧв, а ме вӧлі нин, му пуксьытӧдзыс на ме вӧлі.

²⁴ Ме чужи йиръяс артмӧдтӧдз, ва петанінъяс вӧчтӧдз.

²⁵ Ме чужи керӧсъяс сувтӧдтӧдз, кор мылькъяс эз на мыччысьны,

²⁶ кор Енмыс эз на вӧч мусӧ да видзьяссӧ, кор муюгыдас весиг лыа чир на эз вӧв.

²⁷ Кор Енмыс вӧчис енэжсӧ, ме вӧлі сэні, вӧлі, кор йир весьтас серпасаліс му кытшсӧ,

²⁸ кор выліас сувтӧдіс кымӧръяс, вынаӧн вӧчис йирпытшса ва петанінъяс,

²⁹ кор саридзлы тшӧктіс кутны васӧ, пуктіс муыслы подувсӧ.

³⁰ Сэки Ен дорын ме киподтуя вӧчасьысьнас вӧлі, быд лун нимкодьлун вайи, Сы водзын дугдывтӧг гажӧдчи,

³¹ Сылӧн му вӧсна нимкодяси, и морт пиян сетісны меным долыдлун.

³² Ныв-пиӧй, кывзӧй менӧ! Майбырӧсь менам туйӧд ветлысьяс.

³³ Кывзӧй велӧдӧмӧс да вежӧрсялӧй, энӧ кежӧй менам туйдӧдӧмысь.

³⁴ Майбыр менӧ кывзысь, коді быд лун сулалӧ менам дзиръя дорын, видзӧдӧ менам ӧдзӧсӧ.

³⁵ Менӧ аддзысь аддзӧ олӧм, сылы Господьсянь бурыс вуджӧ.

³⁶ Меным паныд мыж вӧчысь аслыс лёксӧ вӧчӧ, менӧ мустӧмтысь кулӧмсӧ радейтӧ».