Шусьӧгъяс 7 - Коми Библия 2023

Мывкыдлуныс видзӧ йӧз гӧтырысь

¹ Пиӧй, видз менсьым кывъясӧс, тшӧктӧмъясӧс дзеб сьӧлӧмад. [Пиӧй, вылӧ пукты Господьӧс, сэки ён лоан, Сыысь кындзи некодысь эн пов.]

² Ов менам туйдӧдӧм да тшӧктӧмъяс серти, синтӧ моз найӧс видз,

³ чунькытш моз найӧс новлы, гиж найӧс сьӧлӧмад.

⁴ Мывкыдлуныслы шу: «Тэ менам чой», вежӧрсӧ шу аслад рӧдвужӧн.

⁵ Сэки найӧ видзасны тэнӧ йӧз гӧтырысь, аньысь, коді небыд кывъяснас кыскӧ ас дінас.

⁶ Коркӧ ӧшиньӧд ывлаӧ видзӧдіг, ӧшинь тас пырыс ме аддзи:

⁷ мывкыдтӧм томулов пӧвстын бергаліс вежӧртӧм зон.

⁸ Туй вывті мунігас туйвежӧ воис да, ань керкалань веськӧдчис

⁹ рытъя рӧмыднас, пемыд вой пуксигӧн.

¹⁰ Сылы воча петіс аньыс, кырсалан паськӧма, наян сьӧлӧма,

¹¹ этш тӧдтӧм да ӧвсьытӧм, гортас сылы оз овсьы,

¹² туй вылӧ, изэрд вылӧ петалӧ, быд пельӧссянь кыйӧдчӧ.

¹³ Ань кутліс-окаліс зонмӧс, яндысьтӧг шуаліс сылы:

¹⁴ «Бурасян вись ме вайи, кыв сетан вись талун вайи.

¹⁵ Та вӧсна петі тэнӧ паныдавны, корси тэнӧ да аддзи.

¹⁶ Вольпасьӧс мичмӧді египетса уна рӧма дӧраӧн,

¹⁷ узьланінӧс резі смирнаӧн, алоэӧн да корицаӧн.

¹⁸ Лок мунам, асылӧдзыс мусукасям, сьӧлӧм бурмытӧдз гажӧдчам.

¹⁹ Верӧсӧй ылі туйын, гортын дыр на оз ло.

²⁰ Сійӧ босьтӧма аскӧдыс сьӧм, гортӧ воас, кор енэжас тӧлысьыс тырвыйӧ содас».

²¹ Ань ылӧдліс зонмӧс мелі сёрнинас, кыскис ас дорас небыд кывъяснас.

²² Начкыны нуӧдан ӧш моз, [чеп йылӧ домалӧм пон моз,] лыйлыны нуӧдан кӧр моз зонмыд ань бӧрся муніс.

²³ Дзугйӧ шыбитчысь лэбач моз сійӧ эз тӧд, мый олӧмсӧ воштас, мый сылысь муссӧ ньӧв розьӧдас.

²⁴ Пиянӧй, кывзӧй менӧ, пель саяныд сюркнялӧй менсьым кывъясӧс.

²⁵ Тэнад сьӧлӧмыд мед оз вӧтлысь йӧз гӧтыр бӧрся, эн шӧйт сылӧн туй вывті.

²⁶ Сійӧ унаӧс нин дойдіс-уськӧдіс, уна мортӧс сійӧ виис.

²⁷ Сы керкасянь туйыс вайӧдӧ пыдӧстӧминӧ, нуӧдӧ кулӧмыслӧн жыръясӧ.