Шусьӧгъяс 6 - Коми Библия 2023

Эн кӧсйысь мынтыны йӧзлысь уджйӧзсӧ

¹ Пиӧй, аслад матысса вӧсна кӧ кӧсйысин, кыв сетін йӧзлысь уджйӧзсӧ мынтыны,

² тэ аслад кывъясӧн асьтӧ кӧрталін, вомсьыд петан кывъясӧн асьтӧ тывъялін.

³ Пиӧй, мезды асьтӧ матыссалӧн кипод улысь, мун уськӧдчы сылы кок улас да кевмы,

⁴ синтӧ эн кунь, эн вуграв.

⁵ Морт киӧ шедӧм газель моз, кыйсьысь киӧ веськалӧм лэбач моз мезды асьтӧ.

Эн дышӧдчы

⁶ Дышӧдчысь, видзӧд кодзувкот бӧрся, видзӧд, кыдзи сійӧ уджалӧ. Вежӧрсяв!

⁷ Юралысьыс сылӧн абу, веськӧдлысьыс ни ыджыдалысьыс абу,

⁸ но сійӧ гожӧмнас дасьтӧ сёянсӧ, вундан кадӧ чукӧртӧ няньсӧ. [Либӧ ветлы видзӧдлы мазі вылӧ, кутшӧм сійӧ зіль. Сійӧ вӧчӧ бур удж, вайӧ дзоньвидзалун ӧксыяслы да прӧстӧй йӧзлы. Быдӧн сійӧс радейтӧ да ошкӧ, мед кӧ сылӧн выныс этша, но мывкыдлуныс уна.]

⁹ Дыр-ӧ на тэ, дышӧдчысь, пондан узьны, кор нин палялан аслад унмысь?

¹⁰ Узьыштан, вугралыштан, китӧ сюркнялӧмӧн пукалыштан,

¹¹ да он и казяв, кыдзи шӧйтысь моз гӧльлуныд локтас, гусясьысь моз тшыгъялӧмыд пырас. [А он кӧ дышӧдчы, ва моз ыльӧбтас-воас вундан кадыд, гӧльлуныд пышъяс тэ дінысь.]

Господь мустӧмтӧ лёк вӧчысьӧс

¹² Лёк вӧчысь – шогмытӧм морт, сійӧ ветлӧ-пӧръясьӧ,

¹³ синсӧ читкыралӧ, ки-кок отсӧгӧн пасъяс петкӧдлӧ.

¹⁴ Сійӧ – ылӧг сьӧлӧма, пыр мӧвпалӧ лёк вӧчны, дугдывтӧг кӧдзӧ зыксьӧм.

¹⁵ Таысь сійӧс виччысьтӧг суас шогыс, тӧдлытӧг сійӧс лоӧ жугӧдӧма, и сійӧ оз нин бурд.

¹⁶ Со, квайттор, мый мустӧмтӧ Господь, весиг сизимтор, мый зывӧктӧ:

¹⁷ ыкша син, пӧръясьысь кыв, мыжтӧмлысь вир кисьтысь ки,

¹⁸ лёк вӧчны мӧвпалысь сьӧлӧм, лёк вӧчны котӧртысь кок,

¹⁹ ылӧг висьталысьӧс, коді содталӧ-лӧсьӧдлӧ, да сійӧс, коді вокъяс костын панӧ зык-вен.

Бать-мамлӧн велӧдӧмыс видзӧ тэнӧ

²⁰ Пиӧй, видз батьыдлысь тшӧктӧмъяссӧ, эн ӧтдорт мамыдлысь туйдӧдӧмсӧ.

²¹ Пыр кежлӧ пукты найӧс сьӧлӧмад, гартышт найӧс сьылі гӧгӧрыд.

²² Кутан мунны – и найӧ нуӧдасны тэнӧ, водан узьны – и видзасны тэнӧ, садьман – и пондасны сёрнитны тэкӧд.

²³ Тшӧктӧмыс югыд вайӧ, туйдӧдӧмыс югдӧдӧ, ӧлӧдӧмыс олӧмӧ бергӧдӧ.

²⁴ Найӧ видзасны тэнӧ шогмытӧм аньысь, йӧз гӧтырлӧн мавтыштан сёрниысь.

²⁵ Сьӧлӧмад эн ышты сылӧн мичлуныс вылӧ, [синмыд мед оз корсь сійӧс,] син лапйӧдлӧмнас мед оз тывйышт тэнӧ.

²⁶ Киысь киӧ ветлысь аньлы няньӧн мынтысян, а йӧз гӧтыр вӧсна тэ меддонаторсӧ, олӧмтӧ, воштан.

²⁷ Вермас-ӧ кодкӧ питшӧгас би новлӧдлыны ассьыс паськӧмсӧ соттӧг?

²⁸ Вермас-ӧ кодкӧ биа ӧгыр вывті ветлӧдлыны ассьыс коксӧ соттӧг?

²⁹ Тадзи лоӧ сыкӧд, коді ветлӧ йӧз гӧтыр дінӧ, мыждытӧг оз коль сійӧ, коді инмӧдчӧ мӧдлӧн гӧтыр дінӧ.

³⁰ Мустӧмтӧны-ӧ сійӧс, коді гусясьӧ тшыгъялӧм вӧсна?

³¹ Но кутасны кӧ сійӧс, вештысяс сизим пӧвстӧн, керкасьыс став эмбурсӧ сетас.

³² Йӧз гӧтыркӧд кырсалысь воштӧма вежӧрсӧ, кырсалӧмнас сійӧ ассьыс ловсӧ виӧ.

³³ Сійӧс виччысьӧ нӧйтӧм да янӧдӧм, пеж вӧчӧмыс сылӧн оз вушйы.

³⁴ Вежӧгтысь верӧсыд скӧрмӧ, жалиттӧг водзӧссӧ перйӧ,

³⁵ оз босьт некутшӧм дон, оз сайкав, кӧть кутшӧм козин сылы он сет.