Шусьӧгъяс 5 - Коми Библия 2023

Видз асьтӧ йӧз гӧтырысь

¹ Пиӧй, кывзы менсьым мывкыд кывъясӧс, эн тупкы пельтӧ меысь,

² сэки тэ видзан вежӧртӧ, вомнад висьталан тӧдӧмлунсӧ. [Эн кывзы леститчысь аньӧс.]

³ Йӧз гӧтырыдлӧн сёрниыс ма моз визувтӧ, выйысь небыдджыка на мавтыштӧ,

⁴ но бӧрыннас курыд быдмӧгысь моз сійӧ курдас тэныд, бытшйӧдлас кыкнанладорсяньыс лэчтӧм шыпурт моз.

⁵ Сылӧн кокыс вайӧдӧ кулӧмӧ, воськовъясыс помасьӧны пыдӧстӧминын.

⁶ Сійӧ оз кӧсйы тӧдны олан туйсӧ, оз тӧд, кытчӧ вайӧдас сылӧн туйыс.

⁷ Пиӧй, кывзы менӧ, эн ӧтдорт менсьым кывъясӧс.

⁸ Йӧз гӧтыр дінысь ылыстчы, сылӧн керка ӧдзӧслань эн матыстчы.

⁹ Матыстчан кӧ, вынтӧ сетан мукӧдлы, олан лунъястӧ – тэнӧ дойдысьлы,

¹⁰ озырлуныд вуджас мӧдъяслы, уджыд – йӧз керкалы.

¹¹ Кор эбӧсыд бырас да вир-яйыд жебмас, сэки тэ ышловзьӧмӧн

¹² шуан: «Мыйла нӧ ме мустӧмті велӧдӧмсӧ, мыйла сьӧлӧмӧй нинӧмӧ пуктіс ӧлӧдӧмсӧ?

¹³ Мыйла эг кывзы, кор менӧ велӧдісны, мыйла пельӧс тупки, кор менӧ туйдӧдісны?

¹⁴ Нӧшта воськов, и ме эськӧ яналі йӧз чукӧр водзын!»

¹⁵ Аслад юкмӧсысь ю васӧ, аслад дзулькйысь – визувтан васӧ.

¹⁶ Тэнад дзулькйысь ваыд мед оз киськась ывлаӧ, мед оз визувт изэрд вылӧ.

¹⁷ Тэнад ӧтнадлӧн сійӧ мед лоас, эн юк сійӧс мукӧдкӧд.

¹⁸ Мед бурсиӧма лоас тэнад ва петаніныд, нимкодясь аслад том кадся гӧтырӧн,

¹⁹ аслад сьӧлӧмшӧрӧн, тэрыб вӧраса мича аньӧн. Сылӧн морӧс бердын мед быд кадӧ лоӧ лӧсьыд тэныд, сылӧн муслуныс мед пыр юкталас тэнӧ.

²⁰ Пиӧй, мыйла тэныд ылавнысӧ, мыйла кутлыны мӧдлысь гӧтырсӧ?

²¹ Господь аддзӧ мортлысь туйяссӧ, став туйсӧ сылысь мурталӧ.

²² Лёк вӧчысьӧс сылӧн вӧчӧмторъясыс кыйӧны, мыжыслӧн кӧртӧдӧ сійӧ ачыс шедӧ.

²³ Сійӧ велӧдтӧгыд кулӧ, аслас йӧйталӧм помысь вошӧ.