Шусьӧгъяс 30 - Коми Библия 2023

Агурлӧн кывъяс

¹ Якейлӧн Агур пиыс висьталӧма тайӧ кывъяссӧ Итиэллы, висьталӧма Итиэллы и Укаллы.

² Збыльысь, йӧз пӧвстын ме медся вежӧртӧмыс, йӧзлӧн кодь сюсьлун менам абу,

³ мывкыдлунсӧ ме эг тӧдмав, вежа Енмӧс ог тӧд.

⁴ Коді кыпӧдчывліс енэжас да лэччыліс сэтысь? Коді киас вермӧ кутны тӧвсӧ? Коді гартыштіс васӧ дӧраӧн? Коді доргӧгӧраліс мусӧ? Кыдзи сійӧс шуӧны? Кыдзи шуӧны сылысь писӧ? Тӧдан-ӧ?

⁵ Енмыслӧн быд кыв сӧстӧм. Сійӧ дорйӧ быдӧнӧс, коді лача кутӧ Сы вылӧ.

⁶ Содтан кӧ мыйкӧ Сылӧн кывъясыс дінӧ, ылӧдчысь лоан – и Сійӧ янӧдас тэнӧ.

⁷ Кыктор ме Тэнсьыд кора, вӧч меным тайӧс менам олігӧн:

⁸ вешты ме дінысь ковтӧм сёрни да пӧръясьӧм, гӧльлун да озырлун эн сет меным, тырмымӧн пӧткӧд менӧ няньӧн.

⁹ Коланасьыс унджык мед оз ло менам, ӧд сэки ме верма бергӧдчыны Тэысь, верма шуны: «Ог тӧд Господьӧс». А гӧльма кӧ, пета гусясьны да Тэнсьыд нимтӧ, Енмӧй, янӧда.

¹⁰ Кесъялысьӧс ыджыдыс водзын эн лёкӧд, ӧд тэ мыжман, ёрӧмыс ас вылад усяс.

¹¹ Курыд шог налы, кодъяс батьнысӧ ёрӧны да мамнысӧ оз бурсины.

¹² Курыд шог налы, кодъяс чайтӧны асьнысӧ сӧстӧмӧн, збыльвылас найӧ пежӧсь на.

¹³ Курыд шог налы, кодъяс асьнысӧ лэптӧны да вылісянь видзӧдӧны.

¹⁴ Курыд шог налы, кодъяслӧн пиньныс шыпурт кодь, черлыныс пурт кодь, кодъяс бырӧдӧны гӧльясӧс му вылысь, коньӧръясӧс – йӧз пӧвстысь.

¹⁵ Пӧтлытӧм синлӧн кык ныв, найӧ ӧтарӧ горзӧны: «Вай да вай!» Со куим пӧтлытӧм, весиг нёль, и найӧ оз шуны, тырмас пӧ!

¹⁶ Пыдӧстӧмин да нӧбасьтӧм кынӧм, ваӧн пӧтлытӧм му да би оз шуны, тырмас пӧ!

¹⁷ Коді сералӧ батьсӧ да мустӧмтӧ мамыслысь тшӧктӧмъяссӧ, сылысь синсӧ ковтысын кокаласны кырныш да кутшпиян.

¹⁸ Куимтор шензьӧдӧ менӧ, нёльтор ме ог гӧгӧрво:

¹⁹ кутшлысь енэжті лэбалӧмсӧ, змейлысь изъяс вывті кыссьӧмсӧ, корабльлысь саридзті кывтӧмсӧ, айловлысь ань дінӧ сьӧлӧм кыскӧмсӧ.

²⁰ А киысь киӧ ветлысь аньлӧн туйыс татшӧм: сёяс, вомдорсӧ чышкыштас, сэсся шуас, ме пӧ лёксӧ нинӧм эг вӧч.

²¹ Куимторйысь муыс тіралӧ, нёльтор сійӧ оз вермы нунысӧ:

²² ӧксыӧ пуксьысь кесъялысьӧс, пӧттӧдзыс сёйысь вежӧртӧм мортӧс,

²³ верӧс сайӧ петысь мустӧм аньӧс да аслас кӧзяйкаыс пыдди пуксьысь кесйӧг аньӧс.

²⁴ Му вылын эмӧсь нёльӧн, найӧ ичӧтӧсь, но мывкыдаясысь на мывкыдӧсь.

²⁵ Кодзувкот абу вына, но аслыс сёянсӧ дасьтӧ гожӧмнас.

²⁶ Даман абу ён, но поздысьӧ изкыртаӧ.

²⁷ Саранчалӧн ӧксыыс абу, но найӧ чукӧрӧн-чукӧрӧн кыпӧдчӧны.

²⁸ Черань кокнас везйӧ кутчысьӧ, но овлӧ ӧксы керкаын.

²⁹ Со куим, кодлӧн ветласыс лӧсьыд, нёль, коді ветлӧ мичаа:

³⁰ лев, зверъяс пӧвстын медвынаыс, коді туйсӧ некодлы оз сет,

³¹ [курӧгъяс водзын] восьлалысь петук, [чукӧрыс водзын мунысь] ай кӧза да аслас войтырыс водзын ӧксы.

³² Тэ кӧ йӧйталігад асьтӧ вылӧ пуктін, мӧвпыштін лёк вӧчны, сэки ӧдйӧджык тупкы вомтӧ.

³³ Ӧд йӧвтӧ кӧ гудралан, артмӧ вый, нырад кӧ зургасны, петӧ вир, скӧрлун кӧ кӧдзан, вундан зыксьӧм.