Шусьӧгъяс 3 - Коми Библия 2023

Мывкыдлуныс – Енмӧс пыдди пуктӧмсянь

¹ Пиӧй, эн вунӧд менсьым туйдӧдӧмӧс, сьӧлӧмад видз менсьым тшӧктӧмъясӧс,

² ӧд найӧ содтасны тэнсьыд олан лунъястӧ, ваясны тэныд лӧнь олӧм.

³ Эн эновт буралӧмсӧ да збыльсӧ, гартышт найӧс сьылі гӧгӧрыд, гиж найӧс сьӧлӧмад.

⁴ Сэки буралӧмыс да муслуныс Енсянь да йӧзсянь тэныд лоас.

⁵ Эскы Господьлы став сьӧлӧмнад, эн аслад вежӧр вылӧ подулась.

⁶ Став аслад туйясын Господьӧс тӧдмав, тэнсьыд туйястӧ Сійӧ веськыдӧн вӧчас.

⁷ Асьтӧ сюсьӧ эн пукты, Господьысь пов да ылыстчы лёксьыс.

⁸ Вир-яйыдлы тайӧ дзоньвидзалун ваяс, тэнсьыд лыястӧ ёнмӧдас.

⁹ Пыдди пукты Господьӧс – сет аслад эмбурысь, вай Сылы ассьыд медводдза няньтӧ да вотӧстӧ,

¹⁰ сэки тэнад йӧртӧдъясыд чукйӧн тырасны, вийӧданінсьыд пондас тюргыны вина.

¹¹ Пиӧй, эн ӧтдорт Господьлысь чирыштӧмсӧ, эн дӧзмы Сылӧн ӧлӧдӧмысь.

¹² Ӧд Господь чирыштӧ сійӧс, кодӧс радейтӧ, кыдзи бать чирыштӧ ассьыс муса писӧ.

Мывкыдлуныс вайӧ бур олӧм

¹³ Шуда сійӧ, коді аддзӧ мывкыдлунсӧ, майбыр сійӧ, коді вежӧрсялӧ.

¹⁴ Мывкыдлуныс ӧд эзысь дорысь бурджык, зарни дорысь сійӧ унджык сетӧ.

¹⁵ Дона изъясысь сійӧ донаджык, некутшӧм кӧсйӧмтор он ӧткодяв сыкӧд. [Лёкыс оз вермы сылы паныд сувтны, сійӧс тӧдӧны сы дінӧ матыстчысьяс.]

¹⁶ Веськыд киас сылӧн – кузь нэм, шуйгаас – озырлун да пыдди пуктӧм. [Сылӧн вомысь петӧ збыльыс, сійӧ висьталӧ Индӧд да буралӧм йылысь.]

¹⁷ Туйясыс сылӧн бурӧсь, ордымъясыс сылӧн лӧсьыдӧсь.

¹⁸ Мывкыдлуныс – олӧмыслӧн пу налы, кодъяс босьтӧны сійӧс, майбырӧсь найӧ, кодъяс видзӧны сійӧс.

¹⁹ Мывкыдлуннас Господь вӧчис мусӧ, Аслас вежӧрӧн вӧчис енэжсӧ.

²⁰ Аслас тӧдӧмлуннас Сійӧ восьтіс пыдӧстӧм йиръяс, кымӧръяслы Сійӧ тшӧктіс разӧдны ва.

²¹ Пиӧй, видз вежӧртӧ да мывкыдлунтӧ, эн ылыстчы наысь,

²² ӧд наын – тэнад олӧмыд, найӧ мичмӧдӧны тэнсьыд сьылітӧ.

²³ Сэки повтӧг мунан аслад туйӧд, он крукась, он дойд коктӧ,

²⁴ узьны водігад он кут повны, унмыд лоӧ чӧскыд.

²⁵ Он повзьы, кор лёкыс суас виччысьтӧг, он повзьы, кор мыж вӧчысьясӧс суас бырӧдӧмыс,

²⁶ ӧд тэнад лачаыд – Господь, Сійӧ видзас коктӧ налькйӧ шедӧмысь.

²⁷ Тэ кӧ верман бурсӧ вӧчны, вӧч, кодлы тайӧ колӧ.

²⁸ Тэнад кӧ эм мый сетны, эн шу матыссаыдлы: «Ӧні мун да аски волы, аски сета тэныд». [Тэ ӧд он тӧд, мый аскиа луныс ваяс.]

²⁹ Матыссаыдлы, коді олӧ тэкӧд лӧня, лёк вӧчны эн мӧвпав.

³⁰ Мортыс кӧ эз вӧч тэныд лёксӧ, эн вензьы сыкӧд нинӧм абусьыс.

³¹ Эн вежав лёк вӧчысьлы, сылысь туйсӧ эн бӧрйы.

³² Наян сьӧлӧмаыд – зывӧк Господьлы, веськыда олысьыд – Сылӧн ёрт.

³³ Лёк вӧчысьлӧн керкаыс Господьлӧн ёрӧм улын, а веськыда олысьлысь керкасӧ Сійӧ бурсиӧ.

³⁴ Омӧльтысьясӧс Господь омӧльтӧ, а рамъяс дінӧ Сійӧ буралӧ.

³⁵ Мывкыд йӧз кутасны нимавны, а вежӧртӧмъяс яналасны.