Шусьӧгъяс 28 - Коми Библия 2023

Коді дугдӧ вӧчны мыжсӧ, сы дінӧ Енмыс буралӧ

¹ Лёк вӧчысь пышйӧ, весиг кӧ сійӧс оз вӧтӧдны, но веськыда олысь лев кодь повтӧм.

² Войтырыс кӧ лёк вӧчӧмӧн олӧ, сэки веськӧдлысьыс уна, но сюсь вежӧра юралысь дырйи канмуыслӧн нэмыс кузь.

³ Гӧль морт, коді дзескӧдӧ коньӧрӧс, кӧдзӧм нянь кылӧдысь зэр кодь.

⁴ Енлысь Индӧдсӧ вунӧдысь лёк вӧчысьясӧс ошкӧ, а Индӧд серти олысь лёк вӧчысьяслы паныд сувтӧ.

⁵ Лёк йӧз веськыда мыждӧмсӧ оз гӧгӧрвоны, а Господьӧс корсьысьяс сійӧс бура вежӧртӧны.

⁶ Гӧль да сӧстӧма олысьыд бурджык озыр мортысь, коді пежас олӧ.

⁷ Индӧд серти олысь пи – вежӧра, но коді ёртасьӧ эмбур лотысьяскӧд, сійӧ янӧдӧ ассьыс батьсӧ.

⁸ Уджйӧзалысь содтӧдӧн босьтысь чукӧртӧ сылы, коді отсалӧ гӧльяслы.

⁹ Коді оз кӧсйы кывзыны Индӧдсӧ, сылӧн кевмысьӧмыс – зывӧк.

¹⁰ Коді веськыда олысьӧс лёкас кыскӧ, сійӧ ачыс аслас гуӧ усяс, а сӧстӧмъяслы бурыс вичмас.

¹¹ Озыр мортыд асьсӧ мывкыдӧн чайтӧ, но вежӧра гӧль морт тӧдӧ, кутшӧм сійӧ.

¹² Кор вермӧны веськыда олысьяс, йӧзыс долыдмӧны, но кор лёк вӧчысьяс ыджыдалӧны, йӧзыс дзебсьӧны.

¹³ Коді дзебӧ мыжъяссӧ, сылӧн нинӧм оз артмы, но коді висьтасьӧ да дугдӧ мыж вӧчны, сы дінӧ Енмыс буралӧ.

¹⁴ Енмысь полысь – майбыр, сьӧлӧмсӧ чорзьӧдысь лёкас веськалӧ.

¹⁵ Эргысь лев да тшыг ош – татшӧм лёк юралысь гӧль войтырлы.

¹⁶ Вежӧртӧм юралысь дзескӧдӧ войтырсӧ, а коді оз горшась, сылӧн нэмыс кузь.

¹⁷ Вир кисьтысь пондас кувтӧдзыс пышъявны – энӧ кутӧй сійӧс.

¹⁸ Сӧстӧма олысь повтӧг ветлӧ, а коді чукльӧдлӧ, виччысьтӧг усьӧ.

¹⁹ Му вӧдитысь оз кут тшыгъявны, абутӧмсӧ кыйӧдысь дзикӧдз гӧльмас.

²⁰ Кодлы позьӧ эскыны, сійӧс лоӧ ёна бурсиӧма, но коді тэрмасьӧ озырмыны, мыждытӧг оз коль.

²¹ Чужӧм вылӧ видзӧдӧмӧн вӧчны – абу бур, мортыд весиг няньтор вӧсна вермӧ лёксӧ вӧчны.

²² Колысь морт тэрмасьӧ озырмыны, но оз тӧд, мый гӧльлун суас сійӧс.

²³ Мортыд бӧрыннас пыдди пуктас сійӧс ӧлӧдысьӧс, а оз кывнас мавтыштысьӧс.

²⁴ Коді гусясьӧ бать-мамыслысь да шуӧ: «Тайӧ абу мыж», сійӧ бырӧдысьлы ёрт.

²⁵ Ыкша мортыд зык-вен пестӧ, Господь вылӧ лача кутысь пондас бура овны.

²⁶ Ас вылас лача кутысь – вежӧртӧм, мывкыда олысь повтӧг ветлӧ.

²⁷ Гӧльлы сетысь оз гӧльмы, а коді оз отсав гӧльлы, сійӧс ёрӧм суас.

²⁸ Кор лёк вӧчысьяс ыджыдалӧны, йӧзыс дзебсьӧны, а кор лёк вӧчысьяс усьӧны, веськыда олысьяслӧн лыдыс содӧ.