Шусьӧгъяс 26 - Коми Библия 2023

Вежӧртӧмъяс, дышӧдчысьяс да ылӧдчысьяс йылысь шусьӧгъяс

¹ Кыдзи гожӧм шӧрын лым да вундан кадӧ зэр – тадзи вежӧртӧмӧс оз лӧсяв ошкынысӧ.

² Кыдзи пышкай жбыркнитӧ, кыдзи джыдж лэбзьӧ – тадзи нинӧм абусьыс ёрӧмыс вешйӧ тэ дінысь.

³ Вӧвлы – орс, осёллы – домповод, а вежӧртӧмлы – ньӧр.

⁴ Эн вочавидз вежӧртӧмлы сылӧн йӧйлун серти, медым ачыд эн ло сы кодь.

⁵ Вочавидз вежӧртӧмлы сылӧн йӧйлун серти, медым асьсӧ мывкыдӧн эз чайт.

⁶ Коді мӧдӧдӧ вежӧртӧмӧс юӧр висьтавны, сійӧ ассьыс коксӧ чегӧ да асьсӧ дойдалӧ.

⁷ Вежӧртӧмлӧн вомас шусьӧгыд – чотігтырйи мунысь кок кодь.

⁸ Коді вежӧртӧмӧс нимӧдӧ, сійӧ лыйсян кӧвйӧ из кӧрталӧ.

⁹ Вежӧртӧмлӧн вомас шусьӧгыд – коддзӧм морт киын лежнӧг кодь.

¹⁰ Коді уджавны медалӧ вежӧртӧмӧс либӧ сідз-тадз кодӧскӧ, сійӧ – ньӧввужйӧн кытчӧ веськалӧ лыйысь кодь.

¹¹ Кыдзи понйыд аслас вос дорӧ бергӧдчӧ, тадзи вежӧртӧм морт ассьыс пыр нырӧ.

¹² Асьсӧ мывкыдӧ пуктысь морт дорысь бурджык вежӧртӧм вылӧ лача кутны.

¹³ Дыш мортыд шуӧ: «Туй вылас лев! Ывлаын звер кыйӧдчӧ!»

¹⁴ Ӧдзӧсыд бергалӧ дзир вылас, дыш мортыд – вольпасяс.

¹⁵ Дышӧдчысь босьтӧ тасьтісьыс сёянсӧ, но кисӧ вомӧдзыс сьӧкыд лэптыны.

¹⁶ Дышӧдчысь чайтӧ асьсӧ мывкыдджыкӧн сизим морт дорысь, кодъяс кужӧны сюся вочавидзны.

¹⁷ Мунігкостіыд кӧ йӧзлӧн зык-венӧ ныртӧ сюян, понйӧс пельӧдыс кватитысь кодь лоан.

¹⁸ Кыдзи йӧйталысь лыйӧ ньӧвйӧн да виӧ биа ньӧвъяснас,

¹⁹ тадзи вӧчӧ сійӧ, коді ёртсӧ пӧръялӧ, а бӧрыннас шуӧ, ме пӧ шмониті.

²⁰ Пескыд кор помасяс, биыд кусас, суклясьтӧг зыксьӧмыд лӧняс.

²¹ Ӧгыр сетӧ шоныд, пессянь кыптӧ би, а пинясьысь пестӧ лӧглун.

²² Суклясьысьлӧн кывъясыс чӧскыдӧсь, кынӧм пытшкӧдзыд пырӧны.

²³ Мелі сёрниа, но лёк сьӧлӧма мортыд эзысьӧн эжӧм сёй дозмук кодь.

²⁴ Мустӧмтысь сайӧдчӧ мелі кывъясыс сайӧ, но сьӧлӧмас ылӧгсӧ лӧсьӧдлӧ.

²⁵ Эн эскы сылы, мед кӧть и меліа сёрнитӧ, ӧд сійӧ тырӧма лёкнас.

²⁶ Мед кӧ сійӧ дзебӧ мустӧмтӧмсӧ, но йӧз водзын сылӧн лёклуныс воссяс.

²⁷ Коді гу кодйӧ мӧдлы, ачыс сэтчӧ усьӧ, коді из быгыльтӧ, ачыс из улас веськалӧ.

²⁸ Ылӧдчысь мустӧмтӧ мортӧс, кодӧс дойдаліс, леститчан кывйыд бырӧдӧм дасьтӧ.