Шусьӧгъяс 25 - Коми Библия 2023

Верд да юктав тэнӧ мустӧмтысьӧс

¹ Соломонлӧн нӧшта шусьӧгъяс, чукӧртӧмаӧсь найӧс иудаса Езекей ӧксылӧн йӧзыс.

² Ошкӧм Енлы, коді гусяторсӧ дзебӧ, ошкӧм ӧксылы, коді гусяторсӧ тӧдмалӧ.

³ Енэжлысь судтасӧ, мулысь пыдтасӧ да ӧксылысь сьӧлӧмсӧ он вермы тӧдны.

⁴ Весав эзысьтӧ, торйӧд сэтысь сорассӧ, та бӧрын позяс дозмуктӧ вӧчны,

⁵ вӧтлы ӧксы дінысь лёк йӧзӧс, сэки веськыдлуныс вынсьӧдас сылысь юралӧмсӧ.

⁶ Ӧксы водзын асьтӧ эн кыпӧд, тӧдчана йӧз пӧвстӧ эн пуксьы.

⁷ Тӧдчана морт дырйи тэнӧ ылӧджык пуксьӧдӧм дорысь бурджык, пуксьӧдасны кӧ тэнӧ ӧксы дінӧ матӧджык. Сійӧс, мый аддзылін,

⁸ эн тэрмась ёрдӧ вайны. Мый кутан вӧчны, янӧдасны кӧ тэнӧ?

⁹ Ас кузяыд матыссаыдкӧд вензьы, а мӧдлысь гусяторсӧ эн восьт.

¹⁰ Восьтан кӧ – тайӧс кывзысь тэнӧ асьтӧ янӧдас, и лёк сёрни тэ йылысь паськалас. [Муслун да ёртасьӧм мездӧны: видз найӧс, медым эз увтыртны тэнӧ. Сэки ассьыд туйтӧ видзан, кутан лӧня овны.]

¹¹ Ас кадӧ шуӧм кывйыд быттьӧ эзысь тасьтіын зарни яблӧг.

¹² Мывкыд мортлӧн ӧлӧдӧмыс сійӧс кывзысьлы пельтӧ мичмӧдысь зарни исерга кодь.

¹³ Кӧдзыд ва ыркӧдӧ нянь вундысьӧс – татшӧм жӧ эскана кесйӧг аслас мӧдӧдысьлы, сійӧ вын сетӧ аслас ыджыдыслы.

¹⁴ Коді ошйысьӧ козинъясӧн, но нинӧм оз сет, сійӧ зэртӧм кымӧр да тӧвныр кодь.

¹⁵ Рамлуныд эскӧдӧ юралысьӧс, небыд кывйыд весиг лы чегӧ.

¹⁶ Сюрис кӧ тэныд ма, сёй мыйта колӧ, сӧмын эн восмӧныд.

¹⁷ Ёртыд дінӧ помся эн ветлӧдлы, дышӧдан да, мустӧмман сылы.

¹⁸ Коді матыссаыс йылысь ылӧдчӧмӧн висьталӧ ёрд водзын, сійӧ – кӧрт нӧш, шыпурт да ёсь ньӧв.

¹⁹ Ылӧдчысь морт вылӧ шог дырйи лача кутӧмыд – чегӧм пинь да эбӧстӧм кок.

²⁰ Коді шог сьӧлӧма мортлы долыд сьыланкыв сьылӧ, сійӧ – кӧдзыд лунӧ паськӧмсӧ пӧрччысь морт кодь, шог сьӧлӧмалысь дойсӧ уксусӧн кисьталысь морт кодь. [Мортлысь сьӧлӧмсӧ йирысь шогыд – паськӧм сёйысь воз да пу сёйысь номыр кодь.]

²¹ Тэнӧ мустӧмтысь кӧ тшыг, верд сійӧс, горшыс кӧ косьмӧ, юктав сійӧс.

²² Тадзи тэ чукӧртан сылы юр вылас биа ӧгыръяс, а Господь тэныд бурӧн мынтысяс.

²³ Вой тӧв вайӧ зэр, гуся сёрни – лӧг чужӧмъяс.

²⁴ Бурджык ӧтнадлы керка вевт вылын овны пинясьысь гӧтыркӧд керкаын олӧм дорысь.

²⁵ Ылі муысь бур юӧрыд – горш косьмигӧн ыркыд ва кодь.

²⁶ Веськыда олысь кӧ тіралӧ мыжа йӧз водзын, сійӧ гудыр ваа дуксьӧм юкмӧс кодь.

²⁷ Абу бур – уна ма сёйны, абу бур – ошкӧмсӧ корсьны.

²⁸ Коді оз сяммы асьсӧ кутны, сійӧ – стентӧг сулалысь киссьӧм кар кодь.