Шусьӧгъяс 22 - Коми Библия 2023

Господь дорйӧ коньӧрӧс

¹ Бур нимыд бурджык ыджыд озырлунысь, пыдди пуктӧмыд бурджык эзысь-зарниысь.

² Озыр да гӧль морт ӧткодьӧсь, кыкнаннысӧ Господь вӧчӧма.

³ Вежӧра морт казялӧ лёксӧ да дзебсьӧ, вежӧртӧм водзӧ мунӧ да мыждӧма лоӧ.

⁴ Раммӧдчӧм да Господьысь полӧм бӧрын тэныд воас озырлун, пыдди пуктӧм да олӧм.

⁵ Ылӧдчысьлӧн туйыс лежнӧга, тывъясӧн зэвтӧма, тэныд кӧ олӧмыд дона, эн мун сэтчӧ.

⁶ Веськӧд питӧ бур туй вылас ичӧтсяньыс, и весиг пӧрысь каднас сійӧ оз кеж сэтысь.

⁷ Гӧль вылын ыджыдалӧ озыр, уджйӧза вылын – сылы водзӧсалысь.

⁸ Ылӧгсӧ кӧдзысь вундас шог, пом воас сылӧн чорыд дзескӧдӧмлы. [Сьӧлӧмсяньыс сетысьӧс Енмыс радейтӧ, содтас сылы, мый оз судзсьы.]

⁹ Бур сьӧлӧмаӧс лоӧ бурсиӧма, ӧд юксьӧ гӧльяскӧд няньӧн. [Козин сетысьлы локтӧ вермӧм да нималӧм, и козин босьтысь лэдзӧ сійӧс аслас сьӧлӧмас.]

¹⁰ Лӧгалысьӧс вӧтлы, сэки зык-веныд помасяс, лёксьӧмыд да видчӧмыд вунас.

¹¹ Кодлы муса сӧстӧм сьӧлӧм, коді лӧсьыда-бура сёрнитӧ, сылы ӧксы ёрт лоӧ.

¹² Господь видзӧ збыльсӧ, а ылӧдчысьлысь сёрнисӧ Сійӧ бырӧдӧ.

¹³ Дыш мортыд шуӧ: «Ывлаын лев! Изэрд шӧрас менӧ виасны!»

¹⁴ Киысь киӧ ветлысь аньлӧн сёрниыс – джуджыд гу, Господь кодӧс ёрас, сійӧ сэтчӧ усяс.

¹⁵ Зонпилы кӧ йӧйлун кӧвъясьӧма, мезды сійӧс ньӧръялӧмӧн.

¹⁶ Коді дзескӧдӧ гӧльӧс да сетӧ озырлы, сійӧ ачыс гӧльмас, оз озырмы.

Кывзы мывкыд йӧзлысь кывъяссӧ

¹⁷ Копырт пельтӧ да кывзы мывкыд йӧзлысь кывъяссӧ, бергӧд сьӧлӧмтӧ менам тӧдӧмлунлань.

¹⁸ Тэныд нимкодь лоас, менсьым тӧдӧмлунӧс кӧ видзан сьӧлӧмад, мывкыд кывъясӧн кӧ кутан сёрнитны.

¹⁹ Талун ме велӧда тэнӧ, медым Господь вылӧ лачатӧ кутін.

²⁰ Комын шусьӧг гижи тэныд, медым велӧдны да туйдӧдны тэнӧ,

²¹ медым тэ тӧдін збыльсӧ, кужин вочавидзны тэнӧ мӧдӧдысьяслы.

²² Гӧль мортӧс эн дзескӧд сылӧн гӧльлун вӧсна, коньӧрӧс эн кедзовт ёрд водзын.

²³ Ӧд Господь сувтас сы дор, сійӧс дзескӧдӧм понда бырӧдас тэнӧ.

²⁴ Эн ёртась дӧзмысь морткӧд, ӧдйӧ пузьысь морткӧд эн волысь,

²⁵ медым тэ эн велав сылӧн оласногӧ да ассьыд ловтӧ дзугйӧ эн сюй.

²⁶ Эн вӧч на моз, кодъяс кыв сетӧны да мӧдлысь уджйӧзсӧ ас выланыс босьтӧны,

²⁷ вештысьнытӧ кӧ он кут вермыны, вольпасьтӧ тэ улысь нуасны.

²⁸ Пӧльясӧн важӧн пуктӧм мудор пассӧ орчча му вылӧ эн вешты.

²⁹ Сяммысь-кужысь морт вылӧ видзӧд – сійӧ кутас кесъявны ӧксыяслы, оз прӧстӧй йӧзлы.