Шусьӧгъяс 19 - Коми Библия 2023

Эскана сьӧлӧмтӧ вылӧ донъялӧны

¹ Гӧль да сӧстӧма олысьыд бурджык ылӧдчысь [озыр] мортысь, коді нӧшта на вежӧртӧм.

² Тӧдӧмлунтӧгыд лолыдлы абу бур, тэрмасьӧмӧн мунысьыд вошӧ.

³ Йӧйлун вӧснаыс мортыдлӧн торксьӧ олӧмыс, а сьӧлӧмыс скӧралӧ Господь вылӧ.

⁴ Озырлун помысь содӧны ёртъясыд, а гӧль мортӧс весиг ёртыс эновтӧ.

⁵ Ылӧгсӧ висьталысьӧс мыждӧм виччысьӧ, ылӧдчысь оз мездмы.

⁶ Унаӧн леститчӧны нималана йӧз водзын, козин сетысьыдлы быдӧн ёрт.

⁷ Гӧль морттӧ мустӧмтӧны вокъясыс, бергӧдчӧны сыысь весиг ёртъясыс. Сійӧ кӧсйӧ сёрнитны, но найӧ абуӧсь нин.

⁸ Тӧдӧмлун корсьысь радейтӧ олӧмсӧ, вежӧрсӧ видзысь аддзӧ шуд.

⁹ Ылӧг висьталысьӧс виччысьӧ мыждӧм, ылӧдчысьӧс – кулӧм.

¹⁰ Вежӧртӧмлы оз лӧсяв красуйтчана да лышкыда олӧм, кесйӧглы – ӧксыяс вылын ыджыдалӧм.

¹¹ Мортлӧн бур вежӧрыс видзӧ сійӧс скӧрмӧмысь, ошкӧмыс лоӧ сылы, коді лёксӧ вунӧдӧ.

¹² Ӧксылӧн скӧрмӧмыс левлӧн равзӧм кодь, сылӧн бурлуныс турунвыв лысва кодь.

¹³ Вежӧртӧм пиыд ыджыд шог вайӧ батьыслы, броткысь гӧтырыд – письтӧм керка вевт кодь.

¹⁴ Керкаыд да озырлуныд бать-мамсянь вуджӧ, а мывкыд гӧтыртӧ Господь сетӧ.

¹⁵ Дышӧдчигад унзіль личкывлӧ, дыш морттӧ тшыгъялӧм суӧ.

¹⁶ Тшӧктӧмъяс серти олысь ассьыс олӧмсӧ видзӧ, веськодя олысь кулӧ.

¹⁷ Гӧль мортлы отсалысь водзӧсӧн сетӧ Господьлы, ӧд Господь мынтысяс сылы бурсӧ вӧчӧмысь.

¹⁸ Эм на кӧ лачаыд, чирышт питӧ, сылӧн горзӧмысь эн скӧрмы.

¹⁹ Лӧгалысьӧс мед мыждӧмыс суӧ, норман кӧ сы дінӧ, чорыдджыка на мыждыны ковмас.

²⁰ Кывзы туйдӧдӧмсӧ да сибӧд ӧлӧдӧмсӧ, сэки мывкыд лоан.

²¹ Мортыд ас водзас уна мог сувтӧдӧ, но инас сӧмын Господьӧн шуӧмаыс.

²² Мортлысь эскана сьӧлӧмсӧ вылӧ донъялӧны, гӧль мортыд бурджык ылӧг мортысь.

²³ Господьысь полӧмыд олӧмтӧ видзӧ, сэки и чӧскыда узян, и лёкыс оз су тэнӧ.

²⁴ Дышӧдчысь босьтӧ тасьтісьыс сёянсӧ, но кисӧ вомӧдзыс оз кӧсйы лэптыны.

²⁵ Омӧльтысьӧс кӧ нӧйтан, мывкыдтӧмъяс вежӧрсяласны, вежӧра мортӧс кӧ ӧлӧдан, сійӧ гӧгӧрвоас велӧдӧмсӧ.

²⁶ Батьыслысь овмӧссӧ мырддьысь да мамсӧ вӧтлысь – яндысьтӧм пи, сійӧ бур нимсӧ воштӧ.

²⁷ Пиӧй, дугдан кӧ кывзыны велӧдӧмсӧ, тӧдӧмлунтӧгыд вошан.

²⁸ Ёрд водзын ылӧдлысь веськыда мыждӧмсӧ омӧльтӧ, лёк вӧчысь ылӧгсӧ сёйӧ-ньылалӧ.

²⁹ Мывкыдлунсӧ омӧльтысьӧс мыждӧм виччысьӧ, мывкыдтӧмлысь мышкусӧ – орс.