Шусьӧгъяс 18 - Коми Библия 2023

Кывйыд ыджыдалӧ олӧмыс и кулӧмыс вылын

¹ Асныра мортыд сӧмын асьсӧ тӧдӧ, сійӧ бур велӧдӧмлы паныд сувтӧ.

² Вежӧртӧмыд оз кӧсйы гӧгӧрвонысӧ, кӧсйӧ сӧмын ассьыс мӧвпсӧ висьтавны.

³ Кытчӧ лёк вӧчысь мунӧ, сэтчӧ локтӧ зывӧктӧм, яналӧмкӧд локтӧ лёкӧдӧм.

⁴ Морт вомысь петан кывъясыд – джуджыд ва, визув ва моз сэтысь петӧ мывкыдлуныс.

⁵ Абу бур сулавны лёк вӧчысь дор да мыжтӧмӧс мыждыны.

⁶ Вежӧртӧм морттӧ сёрниыс зык-венӧ кыскас, вомыс тышкасьӧмӧдз вайӧдас.

⁷ Вежӧртӧмӧс сёрниыс бырӧдӧ, сылысь ловсӧ вомыс тывйыштӧ.

⁸ [Полӧмыс личкӧ дыш мортӧс, нывбаба оласнога айлов тшыгъявны кутас.]

⁹ Суклясьысьлӧн кывъясыс чӧскыдӧсь, кынӧм пытшкӧдзыд пырӧны.

¹⁰ Дышпырысь кӧ уджалан, тэ – бырӧдысьлы вок.

¹¹ Господьлӧн нимыс – зумыд изкар, веськыда олысь пышйӧ сэтчӧ, и лёкыс сійӧс оз су.

¹² Озырлы аслас эмбурыс изкар кодь, озырлуныс сылы джуджыд потшӧс кодь.

¹³ Усьӧм водзвылас мортыд вылӧ кыпӧдчӧ, пыдди пуктӧм водзвылас сійӧ раммӧдчӧ.

¹⁴ Мӧдӧс кывзытӧг вочавидзысь – вежӧртӧм, сійӧ асьсӧ янӧдӧ.

¹⁵ Мортыд ловнас кор вына, вермытӧмсӧ вермӧ, а нюкыртчӧм ловнад коді вермас овны?

¹⁶ Вежӧра мортлӧн сьӧлӧмыс тӧдӧмлунсӧ аддзӧ, мывкыд мортлӧн пельыс тӧдӧмлунсӧ корсьӧ.

¹⁷ Козинтӧ сетӧмыд туйяс восьтӧ, ыджыд йӧз дорӧдз вайӧдӧ.

¹⁸ Ёрд водзын веськыд сійӧ, коді медводдзаӧн сёрнитӧ, но локтӧ сыкӧд вензьысь да тӧдмалӧ сійӧс.

¹⁹ Пудъясьӧмыд лӧньӧдӧ вензьӧмтӧ, вына йӧз костын бӧръя кывсӧ шуӧ.

²⁰ Лӧгасьӧм вокыд – сибавтӧм изкар, зык-вензьӧмыд – дзиръяын тас.

²¹ Мортыд сёрнитӧмнас пӧтӧ, вомсьыс петан кывъяснас пӧткӧдчӧ.

²² Кывйыд ыджыдалӧ олӧмыс и кулӧмыс вылын, сёрнитны радейтысь пӧткӧдчӧ кывйыслӧн вотӧснас.

²³ [Шань] гӧтырӧс аддзысь шуд аддзӧ, сылы Господьсянь бурыс вичмӧ. [Шань гӧтырсӧ эновтысь шудсӧ эновтӧ, кырсалысь анькӧд олысь – вежӧртӧм да мыжа.]

²⁴ Гӧль мортыд кевмӧ-корӧ, озырыд чорыда вочавидзӧ.

²⁵ Уна йӧзкӧд ёртасян – аслыд лёксӧ вӧчан, но овлӧ, ёртыд вок дорсьыд на ёнджыка радейтӧ.