Шусьӧгъяс 16 - Коми Библия 2023

Господь вылӧ лача кутысь – майбыр

¹ Мортыд сьӧлӧмас тэчӧ, мый шуны, но кывъясыс Господьсянь воӧны.

² Быдӧн чайтӧ ассьыс туйсӧ сӧстӧмӧн, но Господь тӧдмалӧ мортлысь сьӧлӧмсӧ.

³ Господь вылӧ лача кутӧмӧн ассьыд уджъястӧ вӧч, сэки збыльмас ставыс, мый кӧсъян вӧчнытӧ.

⁴ Господь ставсӧ вӧчӧма мыйкӧ могысь, весиг мыж вӧчысьӧс лёк луныс кежлӧ вӧчӧма.

⁵ Господь зывӧктӧ ыкша мортӧс, мыждытӧг сійӧс оз коль. [Бур туйыд веськыда вӧчӧмсянь заводитчӧ, вись вайӧм дорысь Енмыслы тайӧ шогманаджык. Господьӧс корсьысь аддзас тӧдӧмлун да веськыдлун, сьӧлӧмсяньыс Господьӧс корсьысь аддзас лӧньлун.]

⁶ Буралӧм да збыль вештӧны мыжсӧ, Господьысь полӧм ылыстӧ лёксьыс.

⁷ Весиг мустӧмтысьяс бурасьӧны сыкӧд, кодлӧн туйыс Господьлы шогмана.

⁸ Ылӧдчӧмӧн аслыд куралӧм дорысь бурджык этшаникнас тырмӧдчыны, но веськыда овны.

⁹ Мортыд бӧрйӧ ассьыс туйсӧ, а Господь веськӧдлӧ сылӧн воськовъясӧн.

¹⁰ Ӧксылӧн кывъясыс – вылісянь, сійӧ веськыда мыждӧ.

¹¹ Господь лӧсьӧдӧма стӧча веситчӧмсӧ, Сысянь став вески-гираыс.

¹² Ӧксыяс зывӧктӧны лёк вӧчӧмсӧ, ӧд веськыдлун отсӧгӧн налӧн юралӧмыс вына.

¹³ Ӧксылы шогмана веськыда сёрнитысь, сылы муса збыльсӧ висьталысь.

¹⁴ Ӧксылӧн скӧрмӧмыс кулӧм вайӧ, но мывкыд морт вермас лӧньӧдны сійӧс.

¹⁵ Ӧксылӧн югыд видзӧдласын – олӧм, сылӧн бур сьӧлӧмыс тувсов зэр кодь.

¹⁶ Зарни дорысь бурджык мывкыдлун чӧжны, эзысь чӧжӧм дорысь бурджык вежӧрсявны.

¹⁷ Веськыда олысьлӧн туйыс кежӧ лёксьыс, аслас туй бӧрся видзӧдысь олӧмсӧ видзас.

¹⁸ Вылӧ кӧ пуксян – олӧмтӧ жугӧдан, ныртӧ кӧ кутан лэптавны – усян.

¹⁹ Ыкша йӧзкӧд мырддялӧм эмбур юклӧм дорысь бурджык гӧльяс пӧвстын раммӧдчӧмӧн овны.

²⁰ Мӧвпалӧмӧн уджсӧ вӧчысь бурсӧ аддзас, Господь вылӧ лача кутысь – майбыр.

²¹ Мывкыд сьӧлӧмаӧс вежӧра мортӧн шуӧны, бур кывъясӧн велӧдӧмыд вына.

²² Мывкыд мортлы вежӧрыс вайӧ олӧм, вежӧртӧмлы велӧдчӧмыс – йӧйталӧм.

²³ Мывкыд сьӧлӧмыд кывъястӧ мывкыдӧн вӧчӧ, мывкыд сьӧлӧмӧн велӧдӧмыд вына.

²⁴ Лӧсьыда шуӧм кывйыд – ма кодь, ловтӧ гажӧдӧ, лыястӧ бурдӧдӧ.

²⁵ Туйтӧ чайтан веськыдӧн, но туй помад виччысьӧ кулӧм.

²⁶ Мортыд уджалӧ, медым кынӧмпӧт перйыны, уджавнысӧ сылы рушкуыс тшӧктӧ.

²⁷ Шогмытӧм мортыд лёксӧ вӧчны мӧвпалӧ, сылӧн сёрниыс сотысь би кодь.

²⁸ Ылӧдчысь кӧдзӧ зыксьӧм, удтысьысь торйӧдӧ ёртъясӧс.

²⁹ Лёк вӧчысь кыскӧ матыссасӧ лёкас, нуӧдӧ сійӧс лёк туй вылӧ.

³⁰ Синсӧ читкыралысь гусьӧн пурны мӧвпалӧ, пиньсӧ йирысь лёксӧ вӧчны лӧсьӧдчӧ. [Сійӧ пушкӧ лӧглунӧн.]

³¹ Дзор юрсиыд – нималӧмлӧн юркытшыс, сійӧс веськыда олысьлы сетӧны.

³² Збоялӧм дорысь бурджык терпитны, кар босьтӧм дорысь бурджык асьтӧ кутны.

³³ Паськӧм дорышӧ пудсӧ шыбитан, но кодлы пудйыс усяс – тайӧ Господьсянь.