Шусьӧгъяс 15 - Коми Библия 2023

Енмыс ставсӧ аддзӧ

¹ [Скӧралӧмыд бырӧдӧ весиг вежӧра йӧзӧс.] Скӧрмӧм мортлы кӧ лӧня вочавидзан, сійӧс лӧньӧдан, но лэчыд кывъя шуӧмыд сійӧс ыззьӧдас.

² Мывкыд морт бурсӧ висьталӧ, вежӧртӧм вомнас быгзьӧ.

³ Господьлӧн синмыс ставсӧ аддзӧ, лёк йӧзӧс и бур йӧзӧс.

⁴ Мелі сёрни олӧм вайӧ, а ылӧг сёрни ловтӧ жугӧдӧ.

⁵ Вежӧртӧм нинӧмӧ пуктӧ батьыслысь велӧдӧмсӧ, но коді кывзӧ ӧлӧдӧмсӧ, сійӧ – бур мывкыда. [Веськыдлунын – ыджыд вын, а лёк вӧчысьясӧс лоӧ бырӧдӧма му вывсьыс.]

⁶ Веськыда олысь керкаын озырлуныс уна, а лёк вӧчысьлӧн удждоныс шогӧдӧ.

⁷ Мывкыд мортыд сёрнинас тӧдӧмлун паськӧдӧ, вежӧртӧмыд – оз.

⁸ Лёк вӧчысьлӧн вайӧм висьыс Господьлы зывӧк, веськыда олысьлӧн кевмысьӧмыс Сылы шогмана.

⁹ Лёк вӧчысьлысь туйсӧ Господь зывӧктӧ, веськыдлунсӧ корсьысьӧс Сійӧ радейтӧ.

¹⁰ Веськыд туйысь кежысь чорыда мыжмас, ӧлӧдӧмсӧ мустӧмтысь кулас.

¹¹ Пыдӧстӧминсӧ да кулӧмаяслысь оланінсӧ Господь аддзӧ, дерт нин, Сійӧ аддзӧ мортлысь сьӧлӧмсӧ.

¹² Омӧльтысь морт чирыштӧмсӧ мустӧмтӧ, мывкыд морт дінӧ сійӧ оз мун.

¹³ Сьӧлӧмыд кӧ долыд, чужӧмыд югыд, сьӧлӧмыд кӧ шогалӧ, лолыд нюкыртчӧ.

¹⁴ Вежӧра мортлӧн сьӧлӧмыс тӧдӧмлун корсьӧ, вежӧртӧм сӧмын йӧйталӧмнас пӧткӧдчӧ.

¹⁵ Шудтӧм мортлӧн став олан луныс шогӧн тырӧма, долыд сьӧлӧмалы быд лун гажа.

¹⁶ Ыджыд озырлун да майшасьӧм дорысь бурджык этшаникыс да Господьысь полӧм.

¹⁷ Тшӧгӧдӧм ӧш яй сёйӧм да лӧгалӧмӧн олӧм дорысь бурджык градвыв пуктас сёйны да овны муслунпырысь.

¹⁸ Скӧралысь мортыд зыксьӧм кӧдзӧ, дӧзмытӧмыд – зык-венсӧ дугӧдӧ.

¹⁹ Дыш мортлӧн туй вылас лежнӧг быдмӧ, веськыда олысьлӧн туйыс шыльыд.

²⁰ Мывкыд пи батьыслысь сьӧлӧмсӧ гажӧдӧ, мывкыдтӧм – мамсӧ мустӧмтӧ.

²¹ Вежӧртӧм морт йӧйталӧмнас нимкодясьӧ, вежӧра морт веськыд туйӧд ветлӧ.

²² Туйдӧдтӧг вӧчӧмыд киссяс, а туйдӧдысьыс кор уна – артмас.

²³ Нимкодь, вочавидзнытӧ кӧ верман, бур, ас кадӧ кӧ кывтӧ шуны кужан!

²⁴ Мывкыд мортыд олӧмыслӧн туйӧд кайӧ, кулӧмаяслӧн оланінысь ылӧджык кежӧ.

²⁵ Ыкша мортлысь керкасӧ Господь куштас, дӧвалысь му юкӧнсӧ Сійӧ доръяс.

²⁶ Лёк мортлысь мӧвпъяссӧ Господь зывӧктӧ, сӧстӧм мортлӧн кывъясыс Сылы шогманаӧсь.

²⁷ Горшасьысь аслас керкаӧ шог вайӧ, а коді козинъяс вылӧ абу горш, сійӧ дыр олӧ.

²⁸ Веськыда олысь мӧвпыштӧмӧн вочавидзӧ, а мыж вӧчысьлӧн вомысь лёкыс петӧ. [Веськыда олысьлӧн туйыс Господьлы шогмана, веськыда олӧм ӧта-мӧдсӧ мустӧмтысьясӧс ёртъясӧн вӧчас.]

²⁹ Лёк вӧчысь дінысь Господь ылын, а веськыда олысьлысь кевмысьӧмсӧ Сійӧ кылӧ.

³⁰ Ясыд видзӧдлас сьӧлӧмтӧ долыдмӧдӧ, бур юӧр лыястӧ ёнмӧдӧ.

³¹ Коді ӧлӧдӧмсӧ кывзӧ, сійӧ – мывкыд морт.

³² Велӧдӧмсӧ ӧтдортысь аслас олӧмыс вӧсна оз тӧждысь, ӧлӧдӧмсӧ кывзысь вежӧрсялӧ.

³³ Господьысь полӧмыд мывкыдлун сетӧ, раммӧдчӧм бӧрти пыдди пуктӧм воӧ.