Шусьӧгъяс 14 - Коми Библия 2023

Господьысь полӧмыс вайӧ олӧм

¹ Мывкыд гӧтырнад керкаыд сулалӧ, вежӧртӧм гӧтырыд ачыс керкасӧ кисьтӧ.

² Господьысь полысь веськыд туйӧд мунӧ, Господьӧс мустӧмтысь вошӧ.

³ Вежӧртӧмлӧн сӧрӧмыс ньӧрйӧн аслыс бергӧдчас, мывкыд мортӧс кывйыс видзас.

⁴ Ӧшкыд кӧ абу, лясниыд куш, ӧшъясыд кӧ ёнӧсь, няньыд уна.

⁵ Эскана аддзылысь-висьталысь оз ылӧдчы, пӧръялысь абутӧмсӧ висьталӧ.

⁶ Омӧльтысь морт корсьӧ мывкыдлунсӧ да оз аддзы, вежӧра мортлы тӧдӧмлуныс кокньыда шедӧ.

⁷ Ылыстчы вежӧртӧм морт дінысь, сылӧн тӧдӧмлуныс абу.

⁸ Вежӧра мортлӧн мывкыдлуныс тыдалӧ туйсӧ тӧдӧмас, вежӧртӧмлӧн йӧйталӧмыс тыдалӧ пӧръясьӧмас.

⁹ Вежӧртӧм морт сералӧ мыж вылын, веськыда олысьлы бурыс вуджӧ.

¹⁰ Сьӧлӧмыд тӧдӧ ассьыс шогсӧ, и долыдлунсӧ мӧдкӧд оз юк.

¹¹ Лёк вӧчысьлӧн керкаыс киссяс, веськыда олысьлӧн – кутас дзоридзавны.

¹² Туйтӧ чайтан веськыдӧн, но туй помад виччысьӧ кулӧм.

¹³ Сералігад корсюрӧ висьӧ сьӧлӧмыд, и нимкодьлуныд помасьлӧ шогӧн.

¹⁴ Бур морт аслас олӧмысь пӧтас, веськыдлунсӧ ӧтдортысь – асласысь.

¹⁵ Вежӧртӧм морт эскӧ быд кывлы, вежӧра морт мӧвпалӧ, кытчӧ воськовтны.

¹⁶ Мывкыд морт полӧ да ылыстчӧ лёксьыс, вежӧртӧм – ӧдйӧ пузьӧ да аслыс сӧмын эскӧ.

¹⁷ Ӧдйӧ пузьысь уна ковтӧмсӧ вӧчӧ, лёк вӧчны мӧвпалысьӧс мустӧмтӧны.

¹⁸ Вежӧртӧмлӧн олан пайыс – йӧйталӧм, вежӧралӧн юркытшыс – тӧдӧмлун.

¹⁹ Лёк йӧз копыртчасны бур йӧз водзын, мыж вӧчысьяс – веськыда олысьяслӧн дзиръя дорын.

²⁰ Гӧльӧс мустӧмтӧ весиг аслас матыссаыс, а озырӧс кытшалӧ уна ёрт.

²¹ Коді матыссасӧ мустӧмтӧ, сійӧ мыж вӧчӧ, коді гӧль морт дінӧ бур сьӧлӧма, сійӧ – майбыр.

²² Лёк вӧчны мӧвпалысь вошӧ, [лёк вӧчысь оз тӧд буралӧмсӧ ни збыльсӧ,] а бур вӧчны мӧвпалысьлӧн – буралӧмыс да збыльыс.

²³ Сьӧкыд уджысь эм содтӧд, больгӧмысь – гӧльлун.

²⁴ Мывкыда мортлӧн юркытшыс – озырлун, вежӧртӧмлӧн мывкыдтӧмлуныс – йӧйталӧм.

²⁵ Эскана аддзылысь-висьталысь мездӧ мортлысь олӧмсӧ, пӧръясьысь ылӧгнас лолалӧ.

²⁶ Господьысь полӧмыс – тэнад зумыд лачаыд, Сыысь полӧмыс видзас тшӧтш тэнсьыд ныв-питӧ.

²⁷ Господьысь полӧмыс вайӧ олӧм, ылыстӧ кулӧмыслӧн тывйысь.

²⁸ Кор войтырыс уна, ӧксы нималӧ, кор этша, ӧксы бырӧ.

²⁹ Ӧдйӧ пузьысь петкӧдлӧ ассьыс вежӧртӧмлунсӧ, коді вермӧ кутчысьнысӧ, сійӧ – вежӧра морт.

³⁰ Лӧнь сьӧлӧмыд вир-яйтӧ бурдӧдӧ, вежӧгтӧмыд лыястӧ сісьтӧ.

³¹ Коді дзескӧдӧ коньӧрӧс – омӧльтӧ сійӧс Вӧчысьӧс, коді бурӧ пуктӧ Енсӧ – отсалӧ гӧльяслы.

³² Лёк вӧчысь аслас лёклуныс вӧсна усьӧ, веськыда олысьлӧн весиг кулігас лачаыс лоӧ.

³³ Мывкыдлуныс олӧ вежӧра сьӧлӧмын, но кӧсйӧ, медым и вежӧртӧм сы йылысь тӧдіс.

³⁴ Веськыда олӧм кыпӧдӧ войтырсӧ, а мыж вӧчӧм янӧдӧ.

³⁵ Ӧксыыд бур сьӧлӧма мывкыд кесйӧг дінӧ, но сійӧс янӧдысь кесйӧг вылӧ скӧрмӧ.