Шусьӧгъяс 11 - Коми Библия 2023

Веськыдлуныс вайӧдӧ олӧмӧ

¹ Ылӧг вескиыд – Господьлы зывӧк, стӧч вескиыд шогмана Сылы.

² Ыкшаасьӧмыд яналӧмӧдз вайӧдӧ, рамъяслы мывкыдлуныс воӧ. [Веськыда олысь кӧ кувсьӧ, сы вӧсна шогсьӧны, лёк вӧчысь кӧ виччысьтӧг кувсьӧ – нимкодясьӧны.]

³ Веськыда олысьӧс сӧстӧмлуныс нуӧдӧ, ылӧдчысьӧс наянлуныс бырӧдӧ.

⁴ Скӧралан лунӧ озырлуныд оз отсав, но веськыдлуныд кулӧмысь мездас.

⁵ Сӧстӧм мортлысь туйсӧ веськыдлуныс шыльӧдӧ, а лёк вӧчысь аслас лёклунӧ усьӧ.

⁶ Веськыда олысьӧс сылӧн веськыдлуныс мездӧ, а ылӧдчысьӧс сылӧн кӧсйӧмыс тывйыштӧ.

⁷ Лёк вӧчысьлӧн кулӧмкӧд бырас и сылӧн лачаыс, мыж вӧчысьлӧн виччысянаторйыс оз збыльмы.

⁸ Веськыда олысь мынӧ шогысь, сы пыдди сэтчӧ усьӧ лёк вӧчысь.

⁹ Ентӧг олысь аслас вомнас дойдӧ-бырӧдӧ матыссасӧ, веськыда олысьӧс тӧдӧмлуныс мездӧ.

¹⁰ Веськыда олысьлы кӧ бур, сэки карыс нимкодясьӧ, лёк вӧчысь кӧ кулӧ, карыс долыда гажӧдчӧ.

¹¹ Веськыда олысьяслӧн бурсиӧм пыр карыс кыптӧ, а лёк вӧчысьяслӧн сёрниӧн сійӧ киссьӧ-бырӧ.

¹² Вежӧртӧм морт лёкӧдӧ ассьыс матыссасӧ, вежӧра – чӧв олӧ.

¹³ Суклясьысь морт мӧдлысь гусяторсӧ восьтӧ, эскана морт – ас пытшкас кутӧ.

¹⁴ Мывкыд веськӧдлысьыд кор абу, войтырыд чинӧ-бырӧ, а туйдӧдысьыд кор уна, войтырыд бура олӧ.

¹⁵ Мӧд морт вӧсна кӧ кывтӧ сетан, аслыд лёксӧ вӧчан, он кӧ тэрмась кывтӧ сетны, оз и ков лёксьыс повны.

¹⁶ Мича гӧтырӧс ошкӧны, [Мича гӧтыр ошкӧм вайӧ верӧсыслы, а коді мустӧмтӧ веськыдлунсӧ, янӧдӧ верӧссӧ. Дышъяс овлӧны гӧльӧсь,] уджач мортыд озырмӧ.

¹⁷ Бур сьӧлӧма морт аслыс бур вайӧ, а чорыд сьӧлӧма ассьыс вир-яйсӧ жугӧдӧ.

¹⁸ Лёк вӧчысьлӧн удждоныс – ылӧг, а коді веськыдлун кӧдзӧ, вундас збыльсӧ.

¹⁹ Веськыдлуныс вайӧдӧ олӧмӧ, но лёкас сетчысь аслыс кулӧмсӧ корсьӧ.

²⁰ Наян сьӧлӧма мортыд – Господьлы зывӧк, сӧстӧма олысьыд – шогмана Сылы.

²¹ Тӧд, мый лёк морт мыждытӧг оз коль, а веськыда олысьлӧн рӧдыс мездмас.

²² Мывкыдтӧм аньлӧн мичлуныс порсь нырын югъялысь зарни ныркытш кодь.

²³ Веськыда олысьлӧн кӧсйӧмыс бурӧ вайӧдӧ, лёк вӧчысьлӧн – скӧрлунӧ.

²⁴ Лышкыда сетысьлы содӧ, топыд морт ӧтарӧ гӧльмӧ.

²⁵ Лышкыда сетысьлӧн ставыс тырмана, ва сетысьлӧн горшыс оз кут косьмыны.

²⁶ Няньсӧ дзебысьӧс ёрасны, вузалысьӧс бурсиасны.

²⁷ Бурсӧ корсьысь шудсӧ аддзӧ, а лёксӧ вӧчны мӧвпалысь дінӧ лёкыс воӧ.

²⁸ Аслас озырлун вылӧ лача кутысь усяс, а веськыда олысь веж пу моз кутас вежӧдны.

²⁹ Коді гортсаыслы шог вайӧ, сылы нинӧм оз вичмы, вежӧртӧм морт лоӧ кесйӧгӧн мывкыд мортлы.

³⁰ Веськыда олысьлӧн вотӧсысь быдмӧ олӧмыслӧн пу, мывкыд морт кыскӧ йӧзӧс ас дінас.

³¹ Веськыда олысьлы кӧ му вылас олігӧн на мынтысьӧны, дерт нин, лёк вӧчысьлы да мыжа мортлы мынтысясны.