Шусьӧгъяс 10 - Коми Библия 2023

Веськыда олысь бура олӧ

¹ Соломонлӧн шусьӧгъяс. Мывкыд пи гажӧдӧ батьсӧ, вежӧртӧм пи мамыслы шог вайӧ.

² Ылӧдчӧмӧн озырмӧдчӧмыд бурсӧ оз вай, но веськыдлуныд мездӧ кулӧмысь.

³ Веськыда олысьлы Господь оз сет тшыгъявны, лёк вӧчысьлысь кӧсйӧмсӧ Сійӧ оз збыльмӧд.

⁴ Дышӧдчысь киыд гӧльмӧдӧ, а зільыд – озырмӧдӧ.

⁵ Вотӧссӧ гожӧмнас чукӧртысь – мывкыд морт, а вундан кадӧ узьысь асьсӧ янӧдӧ.

⁶ Бурсиӧмыс – веськыда олысьлӧн юр вылас, лёкыс – Ентӧг олысьлӧн вомас.

⁷ Веськыда олысьӧс бурӧн казьтывласны, а лёк вӧчысьлысь нимсӧ вунӧдасны.

⁸ Мывкыд мортлӧн сьӧлӧмыс тшӧктӧмъястӧ сибӧдӧ, вежӧртӧм морт сёрнинас асьсӧ крукӧдӧ.

⁹ Сӧстӧма олысь повтӧг ветлӧ, а коді чукльӧдлӧ, сійӧс мыждасны.

¹⁰ Синсӧ читкыралысь шог вайӧ, вежӧртӧм морт сёрнинас асьсӧ крукӧдӧ.

¹¹ Веськыда олысьлӧн вомысь олӧм визувтӧ, а Ентӧг олысьлӧн вомыс лёкӧн тырӧма.

¹² Лӧглуныд зык-вен чужтӧ, а муслуныд вевттьӧ став мыжсӧ.

¹³ Вежӧра мортлӧн вомас мывкыдлун, вежӧртӧмлы мышкуас ньӧр инмӧ.

¹⁴ Мывкыдаяс тӧдӧмлунсӧ видзӧны, вежӧртӧм мортлӧн сёрниыс бырӧдӧм вайӧ.

¹⁵ Озырлы аслас эмбурыс изкар кодь, гӧль мортӧс судзсьытӧмлуныс виӧ.

¹⁶ Веськыда олысьлӧн удждоныс – олӧм, лёк вӧчысьлӧн – мыждӧм.

¹⁷ Коді велӧдӧмсӧ кывзӧ, сійӧ олӧмыслӧн туй вылын, коді ӧлӧдӧмсӧ оз кывзы, сійӧ вошӧ.

¹⁸ Лӧгалӧмсӧ дзебысь пӧръясьӧ, суклясьӧмсӧ паськӧдысь – вежӧртӧм.

¹⁹ Бызгысь вомаыд мыжӧ усьӧ, вомсӧ тупкысьыд – вежӧра.

²⁰ Веськыда олысьлӧн кывйыс весалӧм эзысь кодь, лёк вӧчысьлӧн мӧвпъясыс грӧш ни дон оз сулавны.

²¹ Веськыда олысьлӧн кывйыс унаӧс вердӧ, мывкыдтӧмъяс куласны вежӧртӧмлунныс вӧсна.

²² Господьлӧн бурсиӧмыс озырмӧдӧ, аслад уджӧн тэ нинӧм он содты аслыд.

²³ Вежӧртӧмлы лёк вӧчӧмыс ворсӧдчӧм кодь, вежӧра мортӧс долыдмӧдӧ мывкыдлуныс.

²⁴ Лёк вӧчысьӧс суас сійӧ, мыйысь полӧ, веськыда олысьлӧн кӧсйӧмыс збыльмас.

²⁵ Тӧвныр мунас – и лёк вӧчысь бырӧ, а веськыда олысь бырлытӧм подув вылын сулалӧ.

²⁶ Дыш мортыд аслас веськӧдлысьлы – пинь тшыкӧдысь шома ва кодь, син курӧдысь тшын кодь.

²⁷ Господьысь полӧмыд нэмтӧ нюжӧдӧ, но лёк вӧчысьлӧн олан луныс чинӧ.

²⁸ Веськыда олысь долыда виччысьӧ, а лёк вӧчысьлӧн лачаыс абу.

²⁹ Сӧстӧмъясӧс Господь дорйӧ Аслас туй вылын, а лёк вӧчысьясӧс бырӧдӧ.

³⁰ Веськыда олысь пыр зумыда сулалӧ, а лёк вӧчысь оз дыр ов му вылын.

³¹ Веськыда олысьлӧн вомысь петӧ мывкыдлун, а пеж вомалысь кывсӧ керыштасны.

³² Веськыда олысьлӧн кывъясыс шогманаӧсь, лёк вӧчысьлӧн – пежӧсь.