Шусьӧгъяс 1 - Коми Библия 2023

¹ Израильса Соломон ӧксылӧн, Давид пилӧн, шусьӧгъяс.

² Тайӧ шусьӧгъясыс велӧдӧны да сетӧны мывкыдлун, отсалӧны гӧгӧрвоны мывкыд шуӧмъяс,

³ велӧдӧны бур оласногӧ, веськыдлунӧ, веськыда вӧчӧмӧ да збыльӧ.

⁴ Кага вежӧралы найӧ сетӧны сюсьлун, том мортлы – тӧдӧмлун да вежӧр.

⁵ Мывкыда морт кывзас да сюсьджык лоӧ, вежӧра морт аддзас аслыс туйдӧдӧм,

⁶ гӧгӧрвоас шусьӧгъяссӧ да кывйӧзъяссӧ, мывкыд йӧзлысь шуӧм кывъяссӧ да нӧдкывъяссӧ.

⁷ Тӧдӧмлуныс чужӧ Господьысь полӧмсянь, [Сыысь полӧмӧн олысь – вежӧра морт, Господьӧс пыдди пуктӧмсянь чужӧ вежӧрлуныс,] сӧмын вежӧртӧм йӧз мустӧмтӧны мывкыдлунсӧ да велӧдӧмсӧ.

Мыж вӧчысьлӧн туйыс нуӧдӧ кулӧмӧ

⁸ Пиӧй, кывзы батьыдлысь велӧдӧмсӧ, эн ӧтдорт мамыдлысь туйдӧдӧмсӧ.

⁹ Налӧн велӧдӧмыс – тэнад юр вылӧ пуктӧм мича юркытш кодь, сьылітӧ мичмӧдысь сикӧтш кодь.

¹⁰ Эн сетчы, пиӧй, тэнӧ кӧ мыж вӧчысьяс кутасны ыштӧдны

¹¹ да шуны: «Мунам миянкӧд, кыйӧдам да виам мыжтӧмӧс,

¹² пыдӧстӧмин моз ньылыштам ловйӧн, ловъявывсьыс сійӧс гуалам.

¹³ Босьтам сылысь быдсяма донаторсӧ, тыртам керканымӧс мырддялӧм эмбурнас,

¹⁴ пудъясьӧмӧн юклам ас костаным, миян лоӧ ӧти куд».

¹⁵ Пиӧй, эн мун накӧд, налӧн туй вылӧ весиг кок пӧвнад эн тувччы.

¹⁶ Налӧн кокныс котӧртӧ лёксӧ вӧчны, тэрмасьӧ вир кисьтны.

¹⁷ Лэбачыд кӧ аддзылас лэч октӧмсӧ, сэтчӧ оз шедӧдчы,

¹⁸ а тайӧ йӧзыс ассьыныс вирсӧ кисьтны дасьӧсь, асланыс ловлы лэчсӧ пуктӧны.

¹⁹ Татшӧм туйыс сылӧн, коді горшасьӧ йӧз эмбур вылӧ, сэті мунысь воштӧ ловсӧ.

Мывкыдлуныс чуксалӧ

²⁰ Мывкыдлуныс ывлаын юӧртӧ, изэрдъяс вылын шыалӧ-горалӧ,

²¹ йӧзаинъясын чуксалӧ, карса дзиръя дорын шыасьӧ:

²² «Дыр-ӧ на ті, мывкыдтӧмъяс, кутанныд овны мывкыдтӧма, ті, омӧльтысьяс, – омӧльтны мывкыдлунсӧ, а ті, вежӧртӧмъяс, – мустӧмтны тӧдӧмлунсӧ?

²³ Кывзӧй менсьым янӧдӧмӧс, ме тырта тіянӧс мывкыдлунӧн, тӧдмӧда тіянӧс аслам кывъясӧн.

²⁴ Ме кори, но ті энӧ кывзысьӧй, киӧс нюжӧді, но некод меным вочасӧ эз пет.

²⁵ Ті ӧтдортінныд менсьым туйдӧдӧмӧс, менсьым янӧдӧмӧс энӧ сибӧдӧй.

²⁶ Та вӧсна ме кута серавны, кор ті кутанныд сьӧкыдсӧ нуны, кута нимкодясьны, кор тіянӧс полӧмыс босьтас,

²⁷ кор полӧмыс гартыштас тіянӧс тӧвныр моз, сьӧкыдыс суас тіянӧс турӧб моз, шогалӧм-дзескӧдӧмыс тіян вылӧ воас.

²⁸ Сэки ті кутанныд чуксавны менӧ, а ме ог кыв, кутанныд корсьысьны менӧ, но онӧ аддзӧй.

²⁹ Ӧд тӧдӧмлунсӧ ті мустӧмтінныд, Господьысь полӧмсӧ энӧ бӧрйӧй,

³⁰ менсьым туйдӧдӧмӧс энӧ сибӧдӧй, менсьым янӧдӧмӧс нинӧмӧ пуктінныд.

³¹ Та вӧсна понданныд сёйны, мый быдтінныд, кутанныд пӧткӧдчыны асланыд лёк мӧвпъясӧн.

³² Мывкыдтӧм мортлӧн асныралӧмыс виас сійӧс, вежӧртӧмлӧн кокньыд оласногыс бырӧдас сійӧс.

³³ Но менӧ кывзысь пондас овны повтӧг да лӧня, сылы оз ков повны лёксьыс».