Руфа 3 - Коми Библия 2023

Руфа Вооз дінын

¹ Ноеминь шуис Руфа моньыслы: «Нылӧй, кӧсъя тэныд верӧс аддзыны, медым тэныд бур вӧлі.

² Тэ ӧд тӧдан Воозӧс, сійӧ миян рӧдысь. Сылӧн кесйӧг аньясыскӧд тэ ӧктысин. Рытнас сійӧ гумла вылас кутас идсӧ тӧлӧдны.

³ Тэ вай мыссьы, мавтчы чӧскыд дука выйӧн, [мичаа] пасьтась да мун гумла вылас. Но Воозлы рытъя сёйӧм-юӧм бӧрӧдзыс син улас эн петкӧдчы.

⁴ Видзӧд, кытчӧ сійӧ водас узьнысӧ. Мун, лэптышт кокладорсьыс шебрассӧ да вод кок улас. А мый тэныд водзӧ вӧчнысӧ, сійӧ ачыс висьталас».

⁵ Руфа шуис: «Вӧча ставсӧ, кыдзи тэ тшӧктін».

⁶ Руфа муніс гумла вылӧ да вӧчис энькаыслӧн тшӧктӧм серти.

⁷ Вооз сёйис-юис да долыдпырысь водіс узьны нянь тэчас бокӧ. Руфа гусьӧникӧн матыстчис, лэптыштіс Воозлӧн кок увсьыс шебрассӧ да водіс.

⁸ Войнас Вооз сыркмуніс, бергӧдчис да аддзис кок улас куйлысь аньӧс.

⁹ «Коді тэ?» – юаліс Вооз. Ань вочавидзис: «Ме Руфа, тэнад кесйӧг. Ло меным дорйысьӧн, ӧд тэ миян рӧдысь, миян вӧсна кывкутысь».

¹⁰ Вооз шуис: «Господь мед бурсиас тэнӧ, нылӧй! Ӧні тэ воддза дорсьыд бурджыка на вӧчин – эн кут корсьны гӧль ни озыр том мортӧс.

¹¹ Эн пов, нылӧй, ме вӧча тэныд ставсӧ, мый коран. Тайӧ карас став войтырыс тӧдӧ, мый тэ зэв шань.

¹² Дерт, ме верма босьтны тэ вӧсна кывкутӧм, но миян рӧдвужын эм на матыссаджык морт, кодлы колӧ тэ вӧсна кывкутӧмсӧ босьтны.

¹³ Войсӧ узь тані, а аски тыдовтчас, кӧсйысяс оз сійӧ кывкутны тэ вӧсна. Кӧсйысяс кӧ, бур. Оз кӧ, – ловъя Господь водзын кыв сета – ме босьта тэ вӧсна кывкутӧм. Узь тані асылӧдзыс».

¹⁴ Руфа узис асылӧдзыс Воозлӧн кок улын да чеччис югдытӧдзыс на, медым йӧзыс эз аддзывны сійӧс. Вооз мӧвпыштіс: «Мед эськӧ некод оз тӧдмав аньлысь гумла вылӧ волӧмсӧ».

¹⁵ Руфалы сійӧ шуис: «Вай ассьыд вевттьӧдтӧ, кутышт сійӧс». Руфа кутіс вевттьӧдсӧ, а Вооз кисьтіс сэтчӧ квайт куд тыр ид. Сэсся Вооз пуктіс ид тыра нопсӧ Руфалы пельпом вылас. Та бӧрын Вооз муніс карӧ.

¹⁶ Руфа локтіс энькаыс ордӧ. Энькаыс юаліс: «Но мый, нылӧй?» Руфа висьталіс Воозлӧн кӧсйысьӧм йылысь.

¹⁷ Сэсся содтіс: «Вооз сетіс меным квайт куд тыр ид да шуис, энькаыд ордӧ пӧ куш киӧн эн мун».

¹⁸ Ноеминь шуис: «Виччысь, нылӧй, мый водзӧ лоӧ. Тайӧ мортыс оз лӧнь, кытчӧдз талун помӧдз оз вайӧд мӧвпыштӧмсӧ».