Руфа 2 - Коми Библия 2023

Воозлӧн му вылысь шеп чукӧртӧм

¹ Ноеминьлӧн Элимелек верӧс рӧдын вӧлі Вооз нима морт. Сійӧ вӧлі озыр да пыдди пуктана.

² Моавса Руфа шыасис Ноеминь дорӧ: «Позяс-ӧ меным видз-му вылӧ петавны? Лэдзасны кӧ, усьласьӧм шепсӧ ӧктышта». Ноеминь вочавидзис: «Ветлы, нылӧй».

³ Руфа локтіс вундысьяс дінӧ да пондіс ӧктыны на бӧрся усьласьӧм шепсӧ. Сійӧ, вӧлӧмкӧ, веськалӧма Воозлӧн видз-му вылӧ.

⁴ Буретш сэки Вооз локтіс Виплиемысь да чолӧмасис ид вундысьяскӧд: «Господь тіянкӧд!» Сылы вочавидзисны: «Господь мед бурсиас тэнӧ!»

⁵ Вооз юаліс вундысьяс бӧрся видзӧдысь кесйӧгыслысь: «Кодлӧн тайӧ том аньыс?»

⁶ Кесйӧгыс вочавидзис: «Моавса сійӧ. Локтӧма Ноеминькӧд Моав муысь.

⁷ Сійӧ менсьым юаліс, позяс-ӧ вундысьяс бӧрся усьласьӧм шепсӧ ӧктыны. Локтіс водз асывнас да шойччывтӧг пыр на ӧктысис».

⁸ Сэки Вооз шыасис Руфа дінӧ: «Кывзы, нылӧй. Мӧд видз-му вылӧ ӧктысьнытӧ эн вудж, кольччы менам кесйӧг аньяскӧд.

⁹ Видзӧд, кутшӧм видз-му кутасны вундыны, сэтчӧ и мун да ветлӧдлы кесйӧг аньяс бӧрся. Ассьым йӧзӧс ме ӧлӧда, мед оз вӧрӧдны тэнӧ. Горшыд кӧ косьмас, верман гырнич дозъясысь менам йӧзкӧд васӧ юны».

¹⁰ Руфа уськӧдчис Вооз водзӧ, муӧдзыс копыртчылӧмӧн шуис сылы: «Мыйла тэ бур сьӧлӧма ме дінӧ да тӧждысян ме вӧсна? Ме ӧд йӧз муысь локтысь».

¹¹ Вооз вочавидзис: «Меным висьталісны, мый верӧс кулӧм бӧрад тэ тӧждысьӧмыд аслад энькаыд вӧсна. Тэ эновтӧмыд бать-мамтӧ, чужан мутӧ да локтӧмыд тӧдтӧм войтыр дінӧ.

¹² Тэнад бур вӧчӧмысь мед тырвыйӧ мынтысяс тэныд Господь, Израильлӧн Ен, кодлӧн борд улӧ тэ пырин, медым аддзыны аслыд дорйӧм».

¹³ Руфа вочавидзис: «Ыджыдӧй, тэ зэв бур сьӧлӧма ме дінӧ. Ме ог шогмы лоны тэныд весиг кесйӧг туйӧ. Но тэ бурмӧдін менсьым сьӧлӧмӧс аслад кывъясӧн».

¹⁴ Пажын кадӧ Вооз корис Руфаӧс, медым локтас да босьтас нянь, кӧтӧдлас уксуса ваӧ да сёяс. Руфа пуксис ид вундысьяскӧд орччӧн. Вооз мыччис сылы пражитӧм тусь. Руфа сёйис пӧттӧдзыс, да сылӧн тусьыс коли на.

¹⁵ Сэсся Руфа чеччис да муніс водзӧ ӧктысьны. Вооз кесйӧгъясыслы шуис: «Лэдзӧй сылы ӧктыны шепсӧ тшӧтш кольтаяс костысь да энӧ увтыртӧй сійӧс.

¹⁶ Мӧдарӧ, вундіганыд кольтаяссьыныд пыркӧдыштӧй шепсӧ да колялӧй сылы, мед ӧктӧ [да сёйӧ]. Энӧ пинялӧй сійӧс».

¹⁷ Рытӧдзыс Руфа ӧктіс шепсӧ видз-му вылысь. Сэсся став ӧктӧмасӧ вартіс, и сылӧн лои ефа мында ид.

¹⁸ Карӧ локтӧм бӧрын Руфа петкӧдліс энькаыслы, мында сылӧн лои чукӧртӧма, сэсся [питшӧгсьыс] перйис пажынысь кольӧм тусьсӧ да мыччис энькаыслы.

¹⁹ Ноеминь юаліс: «Кӧні тэ талун ӧктысин? Кӧні уджалін? Мед лоӧ бурсиӧма сійӧ мортсӧ, коді тӧждысис тэ вӧсна». Руфа шуис: «Код дінын ме талун уджалі, сійӧс шуӧны Вооз».

²⁰ «Мед бурсиас сійӧс Господь, коді бур сьӧлӧма ловъяяс да кулӧмаяс дінӧ! – шуис моньыслы Ноеминь. – Тайӧ мортыс миян рӧдысь, миян вӧсна кывкутысь».

²¹ Руфа шуис: «Сійӧ весиг тшӧктіс меным уджавны кесйӧгъясыскӧд, кытчӧдз найӧ оз помавны вундӧмсӧ».

²² Ноеминь шуис Руфа моньыслы: «Нылӧй, зэв бур, тэ кӧ лоан сылӧн кесйӧг аньяскӧд ӧтлаын, сэки некод оз вӧрзьӧд тэнӧ йӧз видз-му вылын».

²³ Руфа кольччис Воозлӧн кесйӧг аньяскӧд да ӧктіс усьласьӧм шепсӧ, кытчӧдз эз помавны ид да шобді вундӧмсӧ. А оліс Руфа энькаыскӧд ӧтлаын.