Римӧ 9 - Коми Библия 2023

Израиль да Енлӧн бӧрйӧмаяс

¹ Кристос водзын висьтала збыльсӧ, ог пӧръясь – менам сьӧлӧмӧй Вежа Ловкӧд ӧтвылысь вынсьӧдӧны менсьым висьталӧмӧс.

² Менам сьӧлӧмӧй ёна шогсьӧ да дугдывтӧг бӧрдӧ.

³ Аслам вокъяс вӧсна ме весиг дась лоны ёрӧмаӧн, Кристосысь торйӧдӧмаӧн.

⁴ Израиль войтырӧс ӧд шуӧма Ен пиянӧн, восьтӧма налы Ен дзирдлунсӧ, кӧрталӧма накӧд йитӧдъяс, сетӧма налы Индӧд, сувтӧдӧма найӧс кесъявны Енлы, налы уна кӧсйысьӧма,

⁵ и налӧн эмӧсь батьяс. Тайӧ войтырысь петіс Кристос, Сійӧ чужис морт кодьӧн. Сійӧ став вылас медыджыд Ен. Ошкӧм Сылы нэмъяс чӧж! Аминь.

⁶ Енмыслӧн кывйыс эз вожав. Ӧд абу став израильсаыс Израильлӧн,

⁷ Ӧвраамсянь чужысьяс абу ставныс Ӧвраамлӧн ныв-пи. Вӧлі шуӧма: «Исааксянь чужысьясӧс шуасны тэнад ныв-пиӧн».

⁸ Сідзкӧ, Енлӧн ныв-пиыс абу мортсянь, но Ен кӧсйысьӧмсянь чужысьяс.

⁹ А кӧсйысьӧмыс вӧлі татшӧм: «Дзик тайӧ кадас во мысти Ме бара вола тэ ордӧ. Сэки Сарраыдлӧн лоас пи».

¹⁰ Тадзи вӧлі тшӧтш Ревеккакӧд. Сійӧ сьӧктіс Исаак батьнымсянь кык пиӧн.

^11-12 Пияныслӧн чужтӧдз на, бурсӧ-лёксӧ налӧн вӧчтӧдз на, Енмыс шуис Ревеккалы: «Ыджыдджыкыс кутас кесъявны ичӧтджыкыслы». Енмыс тайӧн петкӧдліс, мый бӧрйӧмыс Сы сайын. Сійӧ бӧрйӧ оз мортлӧн уджъяс серти, но Аслас лӧсьӧдӧм да корӧм сертиыс.

¹³ Гижӧма: «Яков вӧлі Меным муса, а Исавӧс Ме мустӧмті».

¹⁴ Мый шуам? Енмыс абу веськыд? Сійӧ веськыд.

¹⁵ Мӧисейлы Енмыс шуис: «Код дінӧ кӧсъя бурсьӧлӧмтчыны, бурсьӧлӧмтча. Код дінӧ кӧсъя буравны, бурала».

¹⁶ Тадзи ставыс Енлӧн буралӧм сайын, абу мортлӧн кӧсйӧм-зільӧм сайын.

¹⁷ Гижӧдас шуӧма фараонлы: «Ме пукті тэнӧ, мед петкӧдлыны тэ вылын Ассьым вынӧс, медым Менсьым нимӧс тӧдісны став му пасьталаыс».

¹⁸ Тадзи Енмыс код дінӧ кӧ бур сьӧлӧма, а кодӧскӧ Сійӧ чорзьӧдӧ.

Буралӧмыслӧн дозъяс да скӧрлуныслӧн дозъяс

¹⁹ Гашкӧ, тэ юалан: «Мыйысь нӧ Енмыс, сідзкӧ, мыжалӧ? Вермас-ӧ кодкӧ паныд сувтны Енмыслӧн кӧсйӧмлы?»

²⁰ Мортӧй, коді тэ сэтшӧмыс, мый Енкӧд вензян? Вӧчӧмторйыс ӧмӧй вермас шуны вӧчысьыслы: «Мыйла тэ менӧ татшӧмнас вӧчин?»

²¹ Гырнич вӧчысь абу ӧмӧй вына сёй вылас? Оз-ӧ сійӧ ӧти лятисьыс вермы вӧчны быд лунӧ вӧдитчан и торъя лунъясӧ вӧдитчан доз?

²² Тадзи Енмыс кӧсйӧ петкӧдлыны Ассьыс скӧрлунсӧ да вынсӧ. Ыджыд терпитӧмыс вӧсна Сійӧ видзӧ на бырӧдны шуӧм ”скӧрлуныслысь дозъяссӧ”,

²³ медым петкӧдлыны Ассьыс помасьлытӧм дзирдлунсӧ ”буралӧмыслӧн дозъяс” вылын, кодъясӧс дасьтӧма дзирдавны.

²⁴ ”Буралӧмыслӧн дозъясыс” – тайӧ ми, ӧд Ен корис миянӧс. Корис эз сӧмын иудейясӧс, но тшӧтш мукӧд войтыръясӧс.

²⁵ Осий небӧгын Сійӧ висьталӧ: – Кодъяс эз вӧвны Менам войтырӧн, найӧс шуа Аслам войтырӧн, мустӧмӧс шуа мусаӧн.

²⁶ Кӧні вӧлі шуӧма: «Ті абу Менам войтыр», сэні найӧс шуасны ловъя Енлӧн ныв-пиӧн.

²⁷ Израиль йылысь Исай тадзи висьталӧ: – Израиль войтырлӧн лыдыс кӧ лоӧ весиг саридздор лыа мында, мездмас сӧмын колясыс.

²⁸ Регыд Господь вӧчас Аслас шуӧмыс серти, му вылын пӧртас олӧмӧ Ассьыс мыждана шуӧмсӧ.

²⁹ Исай водзвыв висьтавліс: – Господь Саваоф кӧ эз видз коляс войтырсӧ, ми эськӧ бырим Содом моз, миянӧс эськӧ суис сійӧ жӧ, мый Гомораӧс.

Израильлӧн эскытӧмлун

³⁰ Сідзкӧ, мый артмӧ? Ентӧдтӧмъяс эз корсьлыны веськыдлунсӧ, но босьтісны сійӧс эскӧм пыр.

³¹ Израиль войтыр, мӧдарӧ, Индӧд отсӧгӧн корсис веськыдлунсӧ, но тайӧ эз ло сылы.

³² Мыйла? Веськыдлунсӧ найӧ зілисны шедӧдны Индӧд серти уджъяснас, эз эскӧмнас. Тадзи найӧ изйӧ крукасисны.

³³ Та йылысь гижӧма: – Сионӧ Ме пукта из, кытчӧ найӧ крукасясны-усясны. Но Сылы эскысь оз янав.