Римӧ 7 - Коми Библия 2023

Индӧдыс кӧрталӧ

¹ Вокъяс, висьтала тіянлы, Индӧдсӧ тӧдысьяслы. Ті бура тӧданныд, мый Индӧдыс вына морт вылын ловъя дырйиыс.

² Верӧс сайӧ петӧм аньӧс Индӧдыс кӧрталӧ ловъя верӧсыскӧд. Верӧсыс кӧ кулӧ, сійӧ мынӧ кӧрталан Индӧдсьыс.

³ Ловъя верӧс дырйиыс кӧ петас мӧд сайӧ, лоӧ гозъякост олӧм пежалысьӧн. Верӧсыс кӧ кулӧ, сійӧ мынӧ гозъякост олӧм индӧдсьыс. Сэки петас кӧ мӧд сайӧ, оз ло гозъякост олӧм пежалысьӧн.

⁴ Тадзи тшӧтш ті, вокъясӧй, Кристос вир-яйӧ йитчӧмнаныд кулінныд Индӧдыслы да лоинныд Мӧдыслӧн, кулӧмысь Ловзьысьыслӧн, медым вайны Енлы вотӧс.

Ми кулім Индӧдыслы

⁵ Тшыкӧм вир-яйын оліганым лёк кӧсйӧмыс ыджыдаліс миян пытшкын Индӧдыс отсӧгӧн, сэки ми вайим вотӧс кулӧмыслы.

⁶ Ӧні ми кулім Индӧдыслы, мынім сылӧн став кӧртӧдысь. Ми кесъялам Енмыслы выль ногӧн, Лов серти, а огӧ важ мозыс, Индӧдлӧн шыпас серти.

⁷ Мый шуам татчӧ? Индӧдыс ӧмӧй мыжыс? Дерт, абу. Индӧдыс восьтіс меным мыжсӧ. Индӧдыс кӧ эз висьтав: «Эн ышты», ме эськӧ эг и гӧгӧрволы ыштӧмсӧ.

⁸ Тадзи Индӧдыс пыр мыжыс кыпӧдіс ме пытшкын быдпӧлӧс ыштӧмсӧ. Мыжыс ӧд Индӧдтӧгыс кулӧма.

⁹ Водзынсӧ ме олі Индӧдсӧ тӧдтӧг, но тшӧктӧмсӧ кылі да, мыжыс ловзис,

¹⁰ и ме кулі. Тадзи олӧмсӧ сетысь Индӧдыс вайис меным кулӧм.

¹¹ Индӧдлӧн тшӧктӧмыс пыр мыжыс кежӧдіс менӧ да виис сы отсӧгӧн.

¹² Но Индӧдыс вежа, тшӧктӧмыс тшӧтш вежа, веськыд да бур.

¹³ Сідзкӧ, бур Индӧдыс ӧмӧй вайис меным кулӧмсӧ? Эз. Бур Индӧдыс пыр мыжыс вайис меным кулӧмсӧ. Тадзи мыжыс восьтіс ачыс асьсӧ – тшӧктӧмыс пыр лоис лёксьыс-лёкӧн.

Енлӧн Индӧд да мыжыслӧн индӧд

¹⁴ Ми тӧдам, мый Индӧдыс Ловсянь, а менӧ, тшыкӧм вир-яйын олысьӧс, вузалӧма мыжыслы.

¹⁵ Ачым ог гӧгӧрво, мый вӧча: кӧсъянасӧ ог вӧч, а мустӧмсӧ вӧча.

¹⁶ Вӧча кӧ сійӧ, мый ог кӧсйы, сэки гӧгӧрвоа, мый Индӧдыс бур вылӧ.

¹⁷ Збыльвылас, ог ме тайӧс вӧч, но ме пытшкын олысь мыжыс вӧчӧ.

¹⁸ Тӧда, мый ме пытшкын, менам тшыкӧм вир-яйын, бурыс абу. Бурсӧ вӧчны кӧсйӧмыс эм, но сійӧ оз артмы.

¹⁹ Бурсӧ кӧсъя да, ог вӧч, лёксӧ ог кӧсйы да, вӧча.

²⁰ Ме кӧ вӧча кӧсйытӧмсӧ, сідзкӧ, сійӧс ог нин ме вӧч, но ме пытшкын олысь мыжыс вӧчӧ.

²¹ Казяла ас пытшкысь татшӧм индӧд: кӧсъя кӧ вӧчны бурсӧ, менам артмӧ лёкыс.

²² Менам пытшкӧсса мортыс нимкодьпырысь сибӧдӧ Енлысь Индӧдсӧ,

²³ но вир-яйысь ме аддза мӧдпӧлӧс индӧд. Сійӧ паныд сувтӧ пытшкӧсса индӧдлы да кӧрталӧ менӧ вир-яйын олысь мыжыслӧн индӧдӧн.

²⁴ Коньӧр ме морт! Коді мездас менӧ тайӧ кулана вир-яйсьыс?

²⁵ Аттьӧала Енмӧс миян Господь Исус Кристосысь! Тадзи менам пытшкӧсса мортыс кывзысьӧ Ен Индӧдлысь, а тшыкӧм вир-яйыс – мыжыслӧн индӧдлысь.