Римӧ 6 - Коми Библия 2023

Важ мортсӧ тувъялӧма

¹ Мый нӧ шуам? Пондам ӧмӧй водзӧ овны мыжас, медым буралӧмыс содіс? Дерт, огӧ.

² Ми кулім мыжыслы, позьӧ ӧмӧй водзӧ овны мыжас?

³ Онӧ ӧмӧй тӧдӧй, мый ми ставным пыртчиганым йитчим Исус Кристоскӧд да Сылӧн кулӧмкӧд?

⁴ Пыртчӧмнаным ми кулім Кристоскӧд да миянӧс вӧлі гуалӧма Сыкӧд. Но Батьыслӧн дзирдлунӧн Кристосӧс вӧлі ловзьӧдӧма, та вӧсна ми тшӧтш вермам овны выль олӧмӧн.

⁵ Ми кӧ йитчим Сылӧн кулӧмкӧд, сідзкӧ, йитчам тшӧтш Сылӧн ловзьӧмкӧд.

⁶ Ми тӧдам: миянлысь важ мортсӧ тувъялӧма Кристоскӧд, медым тайӧ мыжа вир-яйыс эз нин ыджыдав, и ми эгӧ нин вӧлӧй мыжыслӧн кипод улынӧсь.

⁷ Ӧд коді куліс, сійӧ мыніс мыжыслӧн кипод улысь.

⁸ Ми кӧ кулім Кристоскӧд, эскам, мый пондам и овны Сыкӧд.

⁹ Ми тӧдам: ловзьӧм бӧрас Кристос оз нин кув, ӧд кулӧмыс Сы вылын оз нин ыджыдав.

¹⁰ Сійӧ куліс мыжыслы ӧтчыдысь да пыр кежлӧ. Ӧні Сійӧ ловъя да олӧ Енмыслы.

¹¹ Тадзи ті лыддьӧй асьнытӧ мыжыслы кулӧмаӧн, а Енмыслы Исус Кристос пытшкын ловъяӧн.

¹² Энӧ лэдзӧй мыжсӧ ыджыдавны тіян кулана вир-яйын да ыштӧдны тіянӧс аслас лёк кӧсйӧмъясӧн.

¹³ Вир-яйныдлысь весиг ӧти юкӧн энӧ сетӧй мыжыслы лёксӧ вӧчӧм вылӧ. Ӧні ті – кулӧмысь ловзьӧмаяс. Сідзкӧ, сетӧй асьнытӧ да вир-яйныдлысь быд юкӧн Енмыслы, мед вӧчны веськыд уджъяс.

¹⁴ Мыжыс оз вермы ыджыдавны тіян вылын, ӧд ті буралӧм улынӧсь, абу Индӧд улынӧсь.

Ӧні ті Енлӧн кесйӧгъяс

¹⁵ Мый артмӧ? Ми кӧ абу Индӧд улынӧсь, а буралӧм улынӧсь, пондам ӧмӧй вӧчны лёксӧ? Огӧ.

¹⁶ Ті ӧмӧй онӧ тӧдӧй: кодлы ті сетанныд асьнытӧ кесъявны, сылӧн ті и кесйӧгъяс. Кывзысянныд кӧ мыжыслысь – куланныд, Енмыслысь кӧ кывзысянныд – веськыдӧн лоанныд.

¹⁷ Ошкӧм Енлы, ӧд коркӧ ті вӧлінныд мыжыслӧн кесйӧгъяс, ӧні ті став сьӧлӧмнаныд кутчысянныд тіянлы висьталӧм велӧдӧмас.

¹⁸ Мыжысь мынӧм бӧраныд ті лоинныд веськыдлуныслӧн кесйӧгъяс.

¹⁹ Ме сёрнита тіянкӧд быдлунъя олӧмсьыс босьтӧм кывъясӧн, медым ті верминныд гӧгӧрвоны менӧ. Водзын кӧ ті вир-яйныдлысь быд юкӧн сетінныд пежыслы вӧчны лёк уджъяс, ӧні быд юкӧн сетӧй веськыдлуныслы вӧчны вежа уджъяс.

²⁰ Мыжыслы кесъяліганыд ті энӧ вермӧй кесъявны веськыдлуныслы.

²¹ Кутшӧм вотӧс ті сэки чукӧртінныд? Ӧні сыысь весиг аслыныд яндзим, ӧд сійӧ вайӧ кулӧм.

²² Ті мынінныд мыжсьыс, и ӧні ті Енлӧн кесйӧгъяс. Тіян вотӧсныд – вежалун, и тайӧ вайӧдӧ тіянӧс помтӧм олӧмӧ.

²³ Мыжыс ӧд мынтысьӧ кулӧмӧн, а Енмыс сетӧ помтӧм олӧм миян Господь Исус Кристос пытшкын.