Римӧ 5 - Коми Библия 2023

Енкӧд бурасьӧм

¹ Сідзкӧ, эскӧм вӧсна миянӧс шуӧма веськыдӧн, Исус Кристос Господьным пыр миян эм Енкӧд бурасьӧм.

² Эскӧм пыр Кристос восьтіс миянлы Енлӧн буралӧмӧ ӧдзӧссӧ. Буралӧмас олігӧн ми лача кутӧмӧн нимкодясям, ӧд лоам Енлӧн дзирдлунас.

³ Сьӧкыдсӧ нуигӧн тшӧтш нимкодясям, ӧд тӧдам: сьӧкыдсӧ нуӧмыс чужтӧ зумыдлун,

⁴ зумыдлуныс – сьӧкыдсӧ венӧм, сьӧкыдсӧ венӧмыс – лача.

⁵ А лачаыс миян абу весьшӧрӧ, ӧд Ен сетӧма миянлы Вежа Ловсӧ да Сы пыр кисьтӧма сьӧлӧманым Ассьыс муслунсӧ.

⁶ Кор на ми вӧлім жебӧсь, индӧм кадӧ Кристос куліс ми коддьӧм Ентӧг олысьяс вӧсна.

⁷ Ӧдвакӧ кодкӧ сетас олӧмсӧ веськыда вӧчысь вӧсна. Гашкӧ, бурсӧ вӧчысь вӧсна и вермас на сетны олӧмсӧ.

⁸ Но кор ми олім мыжас на, Кристос куліс миян вӧсна. Тайӧн Енмыс петкӧдліс миян дінӧ Ассьыс муслунсӧ.

⁹ Ӧні Кристослӧн вирыс пыр миянӧс шуӧма веськыдӧн, сідзкӧ, дерт нин, Кристос пыр ми мынам локтана скӧрлунысь.

¹⁰ Ми кӧ, Енмыслы коркӧя паныд сувтысьяс, бурасим Сыкӧд Пиыслӧн кулӧм пыр, дерт нин, ӧні ми, бурасьӧмаяс, мездмам Кристослӧн олӧм пыр.

¹¹ Но тайӧ абу на ставыс. Ми нимкодясям нӧшта Енмӧн, ӧд Исус Кристос Господьным пыр миян эм Енкӧд бурасьӧм.

Адам да Кристос

¹² Ӧти морт пыр муюгыдас пырис мыжыс, мыжнас – кулӧмыс. Тадзи кулӧмыс вуджис быд морт вылӧ, ӧд ставныс мыжмисны.

¹³ Дерт, Индӧдсӧ сеттӧдз мыжыс вӧлі нин муюгыдас, но Индӧдтӧгыс мыж вӧчӧмыс оз лыддьыссьы мыжӧн.

¹⁴ Кулӧмыс ыджыдаліс Адамсянь Мӧисейӧдз. Ыджыдаліс весиг на вылын, кодъяс эз вӧчны Адам моз мыжсӧ. Адам вӧлі Локтысьыслӧн пертас.

¹⁵ Но мыж вӧчӧмсӧ оз позь ӧткодявны буралӧмкӧд. Ӧти мортлӧн мыжыс вайис ставныслы кулӧм, и тшӧтш ӧти морт пыр, Исус Кристос пыр, дзик ставныслы уна пӧвстӧн вичмӧ Енсянь буралӧм да сетӧмторъяс.

¹⁶ Буралӧмсӧ оз позь ӧткодявны ӧти мортлӧн мыж вӧчӧмкӧд. Ӧд ӧтилӧн мыж вӧчӧм вӧсна локтіс мыждӧм, а буралӧмсӧ сетӧма, медым уна мыжа йӧзӧс вӧчны веськыдӧн.

¹⁷ Ӧтилӧн мыж вӧчӧм вӧсна кӧ пондіс ыджыдавны кулӧм, сэки, дерт нин, ӧти морт пыр, Исус Кристос пыр, Енсянь ыджыд буралӧмсӧ да веськыдлунсӧ босьтысьяс пондасны ыджыдавны олӧмас.

¹⁸ Ӧтилӧн мыж вӧчӧм вӧсна кӧ мыждӧма став мувывса йӧзсӧ, тадзи ӧтилӧн веськыда вӧчӧм вӧсна став йӧзсӧ шуӧма веськыдӧн да сетӧма налы олӧм.

¹⁹ Ӧтилӧн кывзысьтӧм вӧсна кӧ ставӧн лоисны мыжаӧсь, тадзи ӧтилӧн кывзысьӧм вӧсна ставӧн лоасны веськыдӧсь.

²⁰ Индӧдсӧ сетӧма, медым петкӧдлыны, кутшӧм уна мыж вӧчӧмыс. Кӧні мыж вӧчӧмыс уна, сэні ёнджыка на петкӧдчӧ буралӧмыс.

²¹ Кыдзи мыжыс ыджыдаліс да кыскис кулӧмас, тадзи буралӧмыс тшӧтш ыджыдалӧ веськыдлуннас да вайӧдӧ миянӧс Исус Кристос Господьным пыр помтӧм олӧмас.